ЯҢАЛЫКЛАР

2015 елның 1 апрелендә Татарстан Республикасы Икътисад министрлыгында  Татарстан Республикасыннан «Сәнәгать (индустриаль) паркларын төзү» чарасы буенча федераль субсидия алучыларның гомуми гаризасына керүне дәгъвалаучы гаризаларны сайлап алу буенча Комиссия утырышы узды.

2015 елның 31 мартында «А.М.Горький ис. Яшел Үзән заводы» ААҖндә Татарстан Республикасы Дәүләт Советы Рәисе Фәрит Мөхәммәтшин җитәкчелегендә, Дәүләт Думасы депутатлары, Татарстан Республикасыннан Россия Федерациясе Федераль Җыенының Федерация Советы әгъзалары һәм Татарстан Республикасы башкарма хакимияте органнары җитәкчеләре катнашлыгында, Россия Федерациясе дәүләт һәм федераль максатчан программалары  кысаларында  республика икътисадына федераль акчаларны җәлеп итү сорауларына багышланган киңәшмә уздырылды.

Киңәшмәдә республика икътисадына федераль акчаларны җәлеп итү буенча агымдагы вазгыять һәм 2016-2017 елларга бурычлар турындагы доклад белән Татарстан Республикасы икътисад министры урынбасары Наталья Таркаева чыгыш ясады.

23 марттан Татарстан территориясендә янгынга каршы махсус режим гамәлдә. Шуның белән бәйле рәвештә, янгын куркынычсызлыгы кагыйдәләрен бозучыларга карата штраф күләме дә икеләтә арттырылды: физик затларга ул 2 меңнән 4 мең сумга, вазифаи затларга 15 меңнән 30 мең сумгача, юридик затларга 400 меңнән 500 мең сумга кадәр тәшкил итә. Янгынга каршы махсус режим гамәлдә вакытта республикада чүп-чар, коры-сары, үлән яндырганы өчен 9 кеше административ җаваплылыкка тартылган инде.

Бу хакта бүген ТР Хөкүмәте йортында үткәрелгән брифингта республиканың янгын күзәтчелеге буенча баш дәүләт инспекторы Сергей Сергеев хәбәр итте. Аның сүзләренә караганда, РФ Гадәттән тыш хәлләр министрлыгының ТР буенча баш идарәсе тарафыннан, ТР Хөкүмәте белән берлектә, Татарстан территориясендә язгы һәм җәйге чорда янгын куркынычсызлыгын тәэмин итүгә юнәлтелгән оештыру һәм гамәли чаралар комплексы эшләнеп, тормышка ашырыла башлаган.


Полиция, янгын сакчылыгы, җирле үзидарә органнары хезмәткәрләре, Бөтенроссия ирекле янгынчылык хезмәтенең Татарстан төбәк бүлеге вәкилләреннән 757 махсус төркем оештырылган. Әлеге төркемнәр, кипкән чирәм, чүп-чар ягуны булдырмау һәм янгын очракларын вакытында ачыклау максатыннан, торак пунктлар территорияләрендә патруль тора. Алар көче белән соңгы айда гына да Яшел Үзән, Лениногорск, Сарман, Кама Тамагы, Алабуга, Азнакай, Мамадыш һәм Кукмара районнарында кипкән үлән янып китүнең 38 очрагы булдырмый калынган.

Моннан тыш, халык арасында янгын куркынычсызлыгы кагыйдәләре турында профилактик аңлату эшләре алып барыла. Хәзерге вакытка республикада 19 меңнән артык кешене колачлаган 754 әңгәмә үткәрелгән, авыл җирлеге башлыкларына 460 мәгълүмати хат җибәрелгән.

Сергей Сергеев бу төр эшчәнлекнең уңай нәтиҗәләре турында да бәян итте. Быел янгынга каршы махсус режим вакытында кипкән үлән янып китүнең 80 очрагы теркәлгән. Бу, узган елның шул ук чоры белән чагыштырганда, 6 тапкырга кимрәк: былтыр шундый 496 очрак ачыкланган иде, дип сөйләде ул. Чыгыш ясаучы шунысына да игътибар юнәлтте: быел кипкән үлән янып китү очракларының күпчелеге Әлмәт (12) районында, Казанда (11), Кама Тамагы (5), Алабуга, Лениногорск һәм Түбән Кама районнарында (4әр) теркәлгән.

Кытайның кайбер дәүләт банклары, шул исәптән Кытай үсеш банкы, Мәскәү - Казан югары тизлекле тимер юл магистрален төзүгә кредитлар рәвешендә 250 миллиард сум акча бирергә әзер, дип яза "Коммерсантъ" сөйләшүләр барышы белән таныш чыганакка сылтама белән.

"Тагын 50 миллиард сумны проект белән шөгыльләнәчәк компаниянең устав капиталына взнос рәвешендә "China Railway" бүлеп бирә. "Россия тимер юллары" ААҖ "China Railway"дән паритет нигездә уртак предприятие төзү турында тәкъдим алган, хәзерге вакытта сөйләшүләр бара", - дип өстәгән басма.

Бүген Татарстан Республикасы Президенты вазыйфаларын вакытлыча башкаручы Рөстәм Миңнеханов Internationalда Берләшкән Гарәп Әмирлекләре рәсми делегаты Мөбәрәк Әл-Шәмиси белән очрашты.


Очрашу Рөстәм Миңнехановның Берләшкән Гарәп Әмирлекләренә эш сәфәре кысаларында узды.


Яклар WorldSkills халыкара хәрәкәтен үстерү, эшче һөнәрләре дәрәҗәсен арттыру һәм һөнәри белем бирүне үстерү, шулай ук заманча базар таләпләре нигезендә квалификацияле кадрлар әзерләү мәсьәләләре хакында фикер алыштылар.

Кичә Казанда “Туган авылым” комплексында Россия Мөселман эшмәкәрләре ассоциациясенең төбәк бүлеген рәсми ачу антанасы уздырылды. Чарада Ассоциация президенты Марат Кабаев, Россия Мөселман эшмәкәрләре ассоциациясе беренче вице-президенты, оешманың башкаручы директоры Айдар Шаһимәрданов, шулай ук Россия Мөселман эшмәкәрләре ассоциациясенең вице-президенты һәм Татарстан бүлеге җитәкчесе Радик Габдрахманов катнашты.

Р.Габдрахманов аңлатма бирүенчә, Ассоциациянең максаты – мөселман бизнесменнары консолидациясе, бизнес-проектларны этәрү, инвестицияләр җәлеп итү, хакимиятнең барлык органнары белән дә хезмәттәшлектә булу. Моннан тыш, Татарстан бүлегендә бизнес нигезләренә өйрәтү ниятләнә.

“Безнең оешма Россия эшмәкәрләренә, беренче чиратта, берләшү, бөтен ил буенча үз бизнесларын күрсәтү һәм сөйләү мөмкинлеге бирә. Владивостоктан безнең мәгълүматлар базасына эләккән бизнесмен үз товарларын һәм хезмәтләрен Калининградтан алып Камчаткага кадәр тәкъдим итә ала”, - дип ассызыклады Айдар Шаһимәрдәнов.

Россиянең дүрт төбәге, шул исәптән Татарстан, 2015 елда мәшгульлек программасы буенча субсидия ала. Бу хактагы карарны бүген РФ Премьер-министры Дмитрий Медведев имзалады.

“Хөкүмәтнең Татарстан Республикасында, Алтай краенда, Самара һәм Тверь өлкәләрендә хезмәт базарындагы киеренкелекне киметүгә юнәлдерелгән кризиска каршы планы буенча быел 1870,4 млн сум гомуми күләмдә субсидия бүлеп бирелә, бу 35 мең чамасы хезмәткәрнең мәшгульлеген саклау мөмкинлеге бирәчәк”, - диелгән РФ Хөкүмәте сайтында.

Төбәк хакимиятләре акчаларны эш югалтучыларны яки югалтырга мөмкин булган кешеләрне укытуга һәм стажировкага, вакытлы эш урыннары булдыруга сарыф итә ала. Моннан тыш, кризис вакытында эш табу кыен булган яшьләргә һәм инвалидларга эш урыннары булдыру өчен дә тотарга була.

Өстәмә ярдәмне бу төбәкләрнең авыр икътисади вазгыятьтә калган предприятиеләре алачак, төгәлрәге, - автомобиль сәнәгате. Шуңа күрә шундый субъектлар һәм предприятиеләр сайланган. Алар - «КАМАЗ», «АвтоВАЗ», «Алтайвагон», «Тверь вагон төзү заводы».

Бүген Татарстан Республикасы Президенты вазыйфаларын вакытлыча башкаручы Рөстәм Миңнеханов Берләшкән Гарәп Әмирлекләре (БГӘ) икътисад министры Солтан Әл- Мансури белән очрашты. Очрашу бу көннәрдә Дубай шәһәрендә уздырыла торган "Annual Investment Meeting" инвестицион форумы (AIM-2015) кысаларында оештырылды. Очрашуда шулай ук БГӘдә Россия Федерациясенең Гадәттән тыш һәм Тулы вәкаләтле Илчесе Александр Ефимов, Татарстан Республикасының Дубай шәһәрендәге сәүдә-икътисадый вәкиле Тимур Хәйретдинов, Татарстан Республикасы Инвестицион үсеш агентлыгы җитәкчесе Талия Миңнуллина, Татарстан Республикасы яшьләр эшләре һәм спорт министры Владимир Леонов, Татарстан Республикасының Туризм буенча дәүләт комитеты рәисе Сергей Иванов һәм башкалар катнашты.

Рөстәм Миңнеханов Солтан Бин Сәед Әл-Мансурига кунакчыллыклары һәм инвесторлар өчен эчтәлекле һәм файдалы форум өчен рәхмәт белдерде. Безнең Әмирлекләр белән хезмәттәшлек өчен мөмкинлекләр күп, безнең мөнәсәбәтләр киңәя бара, диде.

«Татарстан Стратегиясе – минем Стратегиям!» Яшьләр бәйгесенә йомгак ясау, призерларны бүләкләү, җиңүчеләрне игълан итү 2015 елның 28 мартында «Сәләт» йортында узды.
Чараны Халыкара яшьләр дипломатиясе академиясе башкарма директоры Дилбәр Садыйкова алып барды, ул бәйгенең тәмамлануын игълан итте һәм катнашучыларны килгән кунаклар белән таныштырды.
Татарстан Республикасы икътисад министры урынбасары Наталья Таркаева «Татарстан Стратегиясе – минем Стратегиям!» Яшьләр бәйгесендә катнашучыларга, призерларга һәм җиңүчеләргә бүгенге көндә эш сәфәрендә булган Татарстан Республикасы икътисад министры Артем Здунов исеменнән сәламләү сүзе белән мөрәҗәгать итте. Үзенең чыгышында ул актив катнашкан, иҗади якын килгән, кызыклы һәм җентекле эшләнгән проектлар өчен, һәм гомумән, Стратегия проектын формалаштыруга карата күрсәтелгән энтузиазм өчен рәхмәтен белдерде. (Татарстан Республикасы икътисад министры Артём Здунов мөрәҗәгатенең тулы тексты).

Бүген вакытлыча Татарстан Республикасы Президенты вазыйфаларын башкаручы Рөстәм Миңнеханов һәм Төркия икътисад министры Нихат Зәйбәкчи “Алабуга” махсус икътисадый зонасы территориясендә “Хәят Кимья” заводы ачылуында катнаштылар.

Чарада Татарстан Республикасы Премьер-министры урынбасары – сәнәгать һәм сәүдә министры Равил Зарипов, “Алабуга” СПТ МИЗ” ААҖ генераль директоры Тимур Шаһивәлиев, “Хәят Холдинг” идарә рәисе урынбасары Мәхмәт Авни Кигылы, Төркия делегациясе вәкилләре, ТР министрлыклары һәм ведомстволары җитәкчеләре һәм башкалар катнашты.

Ачылу тантанасындагы чыгышында Рөстәм Миңнеханов “Хәят Кимья” җитәкчелегенә җитештерү мәйданчыгы итеп “Алабуга” МИЗны сайлаулары өчен рәхмәт белдерде һәм инвестицион проектның уңышлы булуында һәм Татарстан җитәкчелеге тарафыннан тиешенчә ярдәм булуында ышандырды. Ул искәрткәнчә, бу - “Алабуга” МИЗ территориясендә гамәлгә кертелгән 15нче завод.