ЯҢАЛЫКЛАР

Бүген ТР буенча Баш федераль инспектор аппаратында РФ Президенты каршындагы эшмәкәрләрнең хокукларын яклау буенча тулы вәкаләтле вәкил Борис Титов федераль органнарның территориаль органнары җитәкчеләре белән очрашты.
Очрашуда эшмәкәрләрдә туган проблемаларны хәл итү өчен, ведомствоара эш төркемен булдыру турында мәсьәлә күтәрелде.
“Хәзерге вакытта безнең тарафтан ТР территориясендә хокук саклау органнары белән элемтәләр җайга салынган, моннан тыш, эшмәкәрләрнең мөрәҗәгатьләре турында бергәләп сөйләшү тәҗрибәсе бар”, - дип билгеләде ТР Президенты каршындагы эшмәкәрләрнең хокукларын яклау буенча тулы вәкаләтле вәкил Тимур Нагуманов.
“Бүген эшмәкәрләрнең хокукларын яклау буенча тулы вәкаләтле вәкил институтының хокук саклау органнары белән консультатив бердәмлегенең һәм элемтәдә торуының кирәклеге бар. Без беренчеләрдән булып, ТР буенча Баш федераль инспектор һәм ТР Президенты каршындагы эшмәкәрләрнең хокукларын яклау буенча тулы вәкаләтле вәкил арасында багланышлар турында килешү имзаладык.
Минемчә, бүгенге очрашуда сез җитәкләгән ведомстволар вәкилләре катнашында эш төркемен булдыру мөмкинлеге турында мәсьәләне сөйләшү урынлы булыр”, - дип тәкъдим итте ТР буенча Баш федераль инспектор Ренат Тимерҗанов.
Очрашу соңында ведомствоара эш төркеме турында нигезләмә проектын эшләргә карар кылынды.

«Яңа проектларны алга этәрү буенча стратегик инициативалар агентлыгы» АКБО тарафыннан гамәлгә куелган Интернет-инициативаларны үстерү фонды (ИИҮФ) үз эшен агымдагы елда башлап җибәрде. Фонд үз алдына куйган максатларның берсе – проектлар үсешен башлангыч стадиядә үк финанс һәм эксперт ярдәме ягыннан үз канат астына алу. Россиянең һәр гражданины алга таба үсеш өчен финанс таләп ителгән үз интернет-проектын (стартаптан алып уңышлы эш итүче онлайн-бизнеска кадәр) түбәндәге адрес буенча Фонд сайтында терки ала: www.iidf.ru яки www.фрии.рф. Фонд идарәсендәге средстволар күләме 6 млрд сумны тәшкил итә. 3 ел эчендә 400дән артык Россия интернет-проектын финанслау ниятләнә.

Татарстан Республикасы Икътисад министрлыгы һәм Казан (Идел буе) федераль университеты яшьләр эшкуарлыгын үстерүгә юнәлдерелгән чараларны тормышка ашыра башлый. Республика муниципаль районнарында күчмә бизнес-лагерьлар һәм зона конференцияләре, дистанцион бизнес-белем бирү, шулай ук «Форсайт – Татарстан: 2050» һәм «Бер адым алга» республика конференцияләрен уздыру планлаштырыла. Яшьләрне һәм яше 30га кадәрле булган эшкуарларны әлеге чараларда катнашырга чакырабыз.

«Ачык Татарстан» мәгълүмат порталының «Ведомстволар хисабы» бердәм дәүләт хисап системасында Татарстан Республикасында дәүләт һәм муниципаль хезмәтләр күрсәтү буенча күпфункцияле үзәкләр (КФҮ) оештыру һәм аларның эше турында муниципаль районнар һәм шәһәр округлары буенча хисап урнаштырылган. Хисапта күпфункцияле үзәкләрнең муниципаль районнарда урнашкан урыны, КФҮдә кабул итү тәрәзәләренең саны һәм хисап периоды эчендә күрсәтелгән хезмәт күләме урын алган. Хисапка шулай ук КФҮ урнаштырылачак биналарга капиталь төзекләндерү эшенең барышы турында мәгълүмат та кертелгән. Биредәге мәгълүмат атна саен яңартылып торачак.

2013 елның 9 ае эчендә Татарстан Республикасында үз керемнәребез 117,4 млрд. сум күләмендә тупланган. Бүген бу хакта Татарстан Республикасы Президенты Р.Н. Миңнеханов Татарстан Республикасы финанс, казначылык һәм салым органнарының республика киңәшмәсендә хәбәр итте.
Киңәшмә Татарстан Республикасы Хөкүмәте Йортында республиканың барлык муниципаль берәмлекләре белән видеоконференцэлемтә режимында узды.
“2013 елның 9 ае эчендә безнең территориядән акча кертүләр 248,9 млрд. сум тәшкил иткән, бу 2012 елның шул чоры белән чагыштырганда артыграк булып чыга, - диде Рөстәм Миңнеханов. – Төп өлеше - 141,7 млрд. сум - нефтькә таможня пошлинасыз чаралар, ягъни чиста салым түләүләре, аларны Татарстан Республикасы федераль бюджетка кертте”.

ТР Икътисад министрлыгы агымдагы елның 9 аенда Татарстан муниципалитетларының социаль-икътисади үсеше рейтингын әзерләгән.
ТР Икътисад министрлыгы тарафыннан агымдагы елның гыйнвар-сентябрь айларына Татарстан муниципалитетларының социаль-икътисади үсеше рейтингы төзелгән. Рейтинг мәгълүматлары ведомство сайтында дөнья күргән.
Бу чорда рейтингта беренче позицияне Казан били. Икенче урында – Әлмәт районы, өченчедә – Лаеш районы.
2013 елның 1 октябренә булган мәгълүматларга караганда, ТР буенча теркәлгән эшсезләр дәрәҗәсе 0,89 процент тәшкил иткән. Казанда бу күрсәткеч – 0,62 процент. Эшсезлек буенча иң югары күрсәткеч Чаллыда (0,98). 18 муниципаль берәмлектә күрсәткеч республикадагы уртача күрсәткечтән түбән.
Агымдагы елның гыйнвар-сентябрь айларында Татарстанда тапшырылган торак йортларның гомуми мәйданы бер җан башына 0,4 кв. метр туры килә. Лаеш районында бу күрсәткеч иң югары – 1,7 кв м, Тукайда – 1,6 кв. м һәм Питрәчтә – 1,5 кв. м.
Республика буенча бер җан башына туры килгән тулай авыл хуҗалыгы продукциясе 6,1 мең тәшкил иткән. Бу күрсәткеч республиканың Әтнә районында югары (31,52 мең)

Теләче районында кече һәм урта эшмәкәрлеккә ярдәм итүдә дәүләт идарәсе перспективалары буенча фикерләштеләр. Бүген Теләчедә “ТР территориясендә кече һәм урта эшмәкәрлеккә ярдәм итүдә дәүләт идарәсе перспективалары һәм проблемалары” темасына багышланган киңәшмә узды. Аны ТР Дәүләт Советының икътисад, инвестицияләр һәм эшмәкәрлек комитеты оештырды.
Киңәшмә алдыннан Дәүләт Советы депутатлары, министрлыклар һәм ведомстволар, муниципаль берәмлекләр һәм иҗтимагый оешмалар, шулай ук эшлекле даирә вәкилләре “Теләче” индустриаль-сәнәгать паркы кысаларында үз эшчәнлекләрен ачкан яки ачарга җыенучы кече бизнес предприятиеләрендә булдылар. Аларга Сәгыйть Гиниятуллинның чабыш атлары үрчетү фермасы, җитештерү цехлары тәкъдим ителде. Җирле эшмәкәрләр Теләче районының бизнес өчен җәлеп итүчән булуын һәм җитәкчелекнең бизнесменнарның эш шартлары һәм проблемалары белән кызыксынуын белдерде.
Киңәшмәдә ТР Дәүләт Советының икътисад, инвестицияләр һәм эшмәкәрлек комитеты рәисе Марат Галиев муниципаль хакимиятләр белән җирле бизнес арасындагы мөнәсәбәтләр уңаеннан, теләчелеләрнең үрнәк булуын белдерде.
ТР икътисад министры урынбасары – Эшмәкәрләргә ярдәм департаменты җитәкчесе Рөстәм Сибгатуллин республиканың муниципаль районнарында кече һәм урта бизнес үсеше турында сөйләде. Татарстанда (Теләче, Биектау, Зәй, Алабуга муниципаль районнарында) сәнәгать мәйданчыгы эшли, Теләче проекты иң перспективалыларның берсе булуын билгеләп үтте.

Инновацияләрне һәм технологик модернизацияләүне гамәлгә кертү буенча чаралар комплексы программасы буенча субсидия бирү өчен бизнес-проектларны сайлап алу конкурсында катнашуга гариза бирү вакыты 2013 елның 20 нояберенә кадәр озайтылды. Гаризалар Татарстан Республикасы Икътисад министрлыгы һәм Эшкуарлыкка ярдәм күрсәтү үзәге тарафыннан эш көннәрендә Мәскәү вакыты белән 9.00 сәгатьтән 17.00гә кадәр кабул ителә.
Адрес: Казан шәһәре, Мәскәү урамы 55 йорт, 125 каб.

ТР Икътисад министрлыгы 2013 елның гыйнвар-сентябрь йомгаклары буенча муниципаль берәмлекләрнең социаль-икътисади үсеш рейтингын игълан итте.
Аннан күренгәнчә, гомуми рейтингта беренчелек Казан шәһәрендә. Әлмәт муниципаль районы – икенче, Лаеш районы өченче урында.
1 октябрьгә булган мәгълүматларга караганда, республикада рәсми рәвештә теркәлгән эшсезлек дәрәҗәсе 0,89 процент тәшкил итә. 18 муниципаль берәмлектә ул республика буенча уртача күрсәткечтән түбән.
Агымдагы елның 9 ае эчендә Татарстанда кулланылышка тапшырылган торак мәйданы җан башына 0,4 кв метр тәшкил иткән. Җан башына туры килгән иң зур торак мәйданы бу чорда Лаеш, Тукай һәм Питрәч районнарында теркәлгән.
Республикада төяп озатылган продукциянең җан башына туры килгән уртача күләме 286,5 мең сумлык булган. Әлеге күрсәткеч буенча югары нәтиҗәләрне Әлмәт, Түбән Кама, Яңа Чишмә, Алабуга һәм Тукай районнары биргән.
Рейтинг белән тулырак ТР Икътисад министрлыгы порталының “Территориаль үсеш” бүлегендә танышырга мөмкин.

Татарстан Республикасында күп фатирлы торак йортларга капиталь ремонт ясау 99,8%ка үтәлгән. 33 муниципаль берәмлектә капиталь ремонт эшләре тулысынча төгәлләнгән. Бу хакта бүген Татарстан Республикасы Хөкүмәте Йортында узган республика киңәшмәсендә ТР төзелеш, архитектура һәм торак-коммуналь хуҗалык министры Ирек Фәйзуллин хәбәр итте. Киңәшмә Татарстанның барлык муниципаль районнары белән видеоконференцэлемтә режимында үтте, аны Татарстан Республикасы Премьер-министры Илдар Халиков уздырды. Анда Татарстан Республикасы Икътисад министры Мидхәт Шаһиәхмәтов катнашты.
Татарстан Премьер-министры Илдар Халиков муниципаль район башлыкларын балалар бакчалары төзелеше программасына аерым игътибар итәргә чакырды. Ул шулай ук, Татарстан Республикасы Президенты Рөстәм Миңнеханов тарафыннан куелган бурыч - 2014елның 1гыйнварына киләсе елга төзелеш программасы буенча барлык кирәкле документларны эшләүне искә төшерде.