ЯҢАЛЫКЛАР

2013 елның 7-8 ноябре көннәрендә Казанда уза торган «Россия төбәкләре икътисады һәм интелектуаль милке» Халыкара форумы кысаларында 2013 елның 7 ноябрендә «Интеллектуаль милек өлкәсендә предприятиеләрнең һәм университетларның сәясәте. Технологияләр трансферы» Халыкара семинар-практикумы үтте.

Россия дәүләт интеллектуаль милек академиясе ректоры, Россия Федерациясе Сәүдә-сәнәгать палатасының интеллектуаль милек буенча комитеты рәисе Иван Близнец, Бөтендөнья интеллектуаль милек оешмасының (БИМО) алга киткән һәм күчеш икътисадлы илләр буенча департаментының бүлек башлыгы Сауле Тлевлесова, Бизнес һәм интеллектуаль милекне бәяләү һәм сертификатлаштыру федераль институтының генераль директоры, БИМО эксперты Борис Леонтьев, «Татарстан ФТМҮ» ТР ДУП генераль директоры урынбасары Радий Сәлимов семинар-практикумның модераторлары булдылар. Семинарда Россия Федерациясе, шулай ук чит илләр вузларында, фәнни-тикшеренү институтларында, предприятиеләрдә интеллектуаль милекне бәяләүгә һәм интеллектуаль милек өлкәсендә алып барылган сәясәткә кагылышлы мәсьәләләр тикшерелде.

Татарстан Республикасында Россия Федерациясе Президентының 2012 елның 7 маендагы указларын гамәлгә ашыру максатларында Татарстан Республикасы Министрлар Кабинетының «Россия Федерациясе Президентының 2012 елның 7 маендагы указларында билгеләнгән бурычларның үтәлеше нәтиҗәлелеген бәяләү индикаторлары турында» 2013 елның 31 октябрендәге 819нчы карары расланды. Әлеге карар белән Россия Федерациясе Президентының 2012 елның 7 маендагы указларында билгеләнгән бурычларның үтәлеше нәтиҗәлелеген бәяләү индикаторларының чик күрсәткечләре бюджет өлкәсе тармакларында әлеге указларны гамәлгә ашыруның «юл карталарында» да расланды. Индикаторларның чик күрсәткечләре алдарак Татарстан Республикасы Премьер-министрының Беренче урынбасары, Россия Федерациясе Президентының 2012 елның 7 маендагы 596-606нчы указлары үтәлешен оештыру буенча республика эшче төркеме рәисе Равил Моратов каршында уздырылган Россия Федерациясе Президентының 2012 елның 7 маендагы указлары үтәлеше индикаторлары буенча киңәшмәләрдә каралган һәм хупланган иде.

Татарстан Республикасы Икътисад министрлыгы хезмәткәрләре 2013 елның 8 ноябрендә Россия Федерациясе Икътисадый үсеш министрлыгында узачак Контракт системасын үстерү буенча төбәкләрнең экспертлар советы утырышында катнашачак. Контракт системасын үстерү буенча төбәкләрнең экспертлар советы Россия Федерациясе Премьер-министры Дмитрий Медведевның күрсәтмәсен үтәү йөзеннән «Дәүләт һәм муниципаль заказлар буенча илебез белгечләре гильдиясе» тарафыннан оештырылган. Гильдия төбәк бүлекләре йөзендә Россия Федерациясенең 56 субъектын, дәүләт заказлары өлкәсендә вәкиллекле органнар җитәкчеләре, федераль ведомство вәкилләрен, шулай ук сатып алу эшчәнлеге экспертларын берләштерә.

Бүген Казанның IT-паркында “Интеллектуаль милек һәм Россия төбәкләре икътисады” халыкара форумы ачылды. 7-8 ноябрь көннәрендә узачак ике көнлек форум ачылышында РФ Федерация Советы рәисе Валентина Матвиенко, ТР Дәүләт Советы Рәисе Фәрит Мөхәммәтшин катнашты.
Модератор билгеләп узганча, әлеге форумга шундый зур әһәмият бирелүе, Татарстан җитәкчелегенең интеллектуаль милек үсешенә җитди игътибар юнәлтүен дәлилли.
“Бүген Казан Россиянең интеллектуаль башкаласына әверелде. Әле күптән түгел генә тәмамланган РФ Федерация Советы рәисе карамагындагы интеллектуаль милек мәсьәләләре буенча совет утырышы салмак кына халыкара форумга күчте. Без интеллектуаль милек ресурслары үсеше турында гына сөйләшеп калмыйбыз, ә төбәкләрнең шушы мөһим бурычны хәл итүдә катнашуын тәэмин итүдә Россия субъектларының ролена басым ясыйбыз”, - дип башлады чыгышын Валентина Матвиенко. Аның тарафыннан билгеләп үтелгәнчә, РФ Президенты икътисадның инновацияле үсешен төп өстенлек итеп билгеләде. Моңа бәйле рәвештә, интеллектуаль милек үсешеннән башка без илнең чын-чынлап көндәшлеккә сәләтлелеген тәэмин итә алмаячакбыз, ди ул. Валентина Матвиенко ассызыклаганча, бүген узган интеллектуаль милек мәсьәләләре буенча совет утырышы ул – проблемаларны хәл итүдә, файдалы рекомендацияләрне эшләп чыгаруда нәтиҗәле корал булып тора. “Совет эшчәнлеге ярдәмендә без күп кенә идеяләрне алга сөрүгә ирештек. Хөкүмәт интеллектуаль милек үсеше стратегиясен эшләүне дәвам иттерә, бу илнең инновацияле икътисады үсешенә ирештерәчәк. Эшебез бик күп, иң мөһиме, без максатларны төгәл аңлыйбыз һәм бурыч-мәсьәләләрне хәл итү буенча срокларны да тәгаенләдек”, - дип белдерде Россия төбәкләре палатасы башлыгы.

Бүген Татарстанның хакимият органнары һәм эшмәкәрлек вәкилләре 2013 нче елда эшмәкәрлек өлкәсендә коррупциягә каршы тору һәм аны профилактикалау буенча эшчәнлеккә нәтиҗәләр ясадылар. Бу хакта суз Республика матбугат һәм массакүләм коммуникацияләр агентлыгында үткән матбугат конференциясендә барды.
Мәгълүматлар буенча, 2013 нче елның беренче яртыеллыгында Татарстанда якынча 50 мең икътисади актив кече һәм микропредприятие исәпләнелә, бу 2012 нче елның яртыеллыгына караганда, күбрәк. Шулай ук республикада якынча 500 урта предприятие һәм якынча 100 мең индивидуаль эшмәкәр эшли, дип хәбәр итте журналистларга ТР Президентының Коррупциягә каршы сәясәт мәсьәләләре буенча идарәсенең оештыру бүлеге мөдире Алексей Панкратов.
Ул билгеләп үткәнчә, “эшмәкәрлек – коррупцион рисклар белән еш очраша торган өлкә”. Алар техник шартлар алу, административ тоткарлыклар, контроль-күзәтчелек органнары тикшерүләре белән бәйле.

Бүген Татарстан Республикасы Президенты Рөстәм Миңнеханов эшкуарлык эшчәнлеген алып бару сыйфатын һәм шартларын яхшырту өчен мәгълүмат технологияләрен куллану буенча Хөкүмәт комиссиясе утырышында катнашты. Утырышны видеоконференцэлемтә режимында бөтен федерация субъектларының катнашында Россия Федерациясе Хөкүмәте Рәисе Дмитрий Медведев уздырды. РФ элемтә һәм массакүләм коммуникацияләр министры Николай Никифоров чыгыш ясады.
Утырышта катнашучылар Электрон рәвештә дәүләт һәм муниципаль хезмәт күрсәтүнең механизмнарының концепциясе турында, дәүләт һәм муниципаль хезмәт күрсәтү вакытында ведомстволар арасында электрон багланышларны оештыру буенча чараларны гамәлгә ашыруның барышы турында, федераль дәүләт мәгълүмат системаларының мәгълүматларын актуальләштерү мәсьәләсе турында сөйләштеләр.

Бүген Татарстан уйлап табулар буенча Роспатентка бирелгән заявкалар саны буенча ил төбәкләре арасында - бишенче, ә уйлап табуларга алынган һәм файдаланылган патентлар саны буенча дүртенче урында. Республикада сәнәгать һәм хезмәтләр күрсәтү белән бәйле предприятиеләрдә бүген инновацияле продукциянең өлеше 18,4 процент тәшкил итә. Узган ел нәтиҗәләре буенча әлеге күрсәткеч 3,5 процентка үскән. Бу мәгълүматларны бүген Интеллектуаль милек мәсьәләләре буенча РФ Федерация Советы рәисе карамагындагы советның Казан Ратушасында узган күчмә утырышында ТР Президенты Рөстәм Миңнеханов җиткерде. Россия төбәкләре палатасы башлыгы Валентина Матвиенко рәислегендә үткән утырыш ил төбәкләренең интеллектуаль хокук базарын үстерүдәге роленә багышланды.
Рөстәм Миңнеханов утырышта катнашучыларны сәламләү чыгышында интеллектуаль милек базары темасына киң фикерләшү мәйданы итеп Татарстанның сайлануына шатлануын белдерде. Аның ассызыклавынча, әлеге базарны формалаштыру заман икътисады үсешенең мөһим элементы булып тора. Татарстан башлыгы моның илнең барлык төбәкләре өчен актуаль мәсьәлә булуын искәртеп, республиканың инновацияле үсеш стратегиясен сайлавын, шушы юнәлештә һәрдаим эш алып барылуын ассызыклады. Аның сүзләренә караганда, узган ел республика предприятиеләре хезмәткәрләре 21 меңнән артык рационализаторлык тәкъдимнәрен эшләп, теркәгән. Бүген иң күп патент алынган инновацияләр “Татнефть”, “Түбән Кама нефтехим”, “Казан вертолет заводы”, “ПОЗИС” җәмгыятьләрендә.

Бүген Интеллектуаль милек мәсьәләләре буенча РФ Федерация Советы рәисе карамагындагы советның күчмә утырышыннан соң Федерация Советы рәисе Валентина Матвиенко милләтләр эше буенча илдә аерым министрлык булдыруга кагылышлы фикерләрен җиткерде. “Күпмилләтле, төрле конфессия вәкилләре яшәгән Россия дәүләтендә милләтара мөнәсәбәтләр өлкәсендә дәүләт сәясәте нигезләрен эшләү белән шөгыльләнүче, төбәкләрдәге вазгыятькә күзәтчелек итүче ведомство булырга тиеш. Ул ил һәм аерым төбәкләрдәге вазгыять хакында федераль һәм төбәк парламентлары өчен еллык докладлар әзерләргә дә тиеш. Бу ведомствода профессионаллар, экспертлар, дәүләт сәясәте идеяләрен генерацияләргә сәләтле кешеләр эшләргә тиеш”, -ди ул.

Билгеле булганча, моңа кадәр ил Хөкүмәте дәрәҗәсендә милләтара мөнәсәбәтләр буенча җаваплы орган вазифасын РФ Төбәкләр үсеше министрлыгы башкарды. “Әлеге министрлык компетенцияләренең һәм карый торган проблемаларның киңкырлы булуын исәпкә алганда, милләтара мөнәсәбәтләр белән милли сәясәт аның эшчәнлегендә беренче планда булмады. Шуңа күрә бу өлкәдә эшне көчәйтү, әлеге өлкәгә кагылышлы махсус федераль хезмәт яки комитет төзү ихтималын күтәреп чыккан идек”, -ди Россия төбәкләре палатасы җитәкчесе.

2013 елның 7 ноябрендә 11.00 сәгатьтә Татарстан Республикасы Икътисад министрлыгының конференц-залында «Юридик затларның аерым төрләре тарафыннан хезмәт күрсәтүләрне, эшләрне, товарларны сатып алу турында» 223-ФЗ номерлы 2011 елның 18 июлендәге Федераль законны гамәлгә ашыру кысаларында сатып-алуларны оештыру теориясе һәм практикасы» темасы буенча Татарстан Республикасы дәүләт унитар предприятиеләре һәм хуҗалык итүче җәмгыять вәкилләре өчен бушлай белем бирү семинарлары уза. Эш кагыйдәләре 223.agzrt.ru мәгълүмати-сатып алу системасында һәм 223etp.zakazrf.ru сәүдә мәйданчыгында. Cеминар программасында – «Дәүләт заказы, инвестицияле эшчәнлек һәм төбәкара элемтәләр буенча Татарстан Республикасы агентлыгы» ДУП вәкилләре Владимир Аксенов һәм Наталья Грицких чыгышы, шулай ук аудитория биргән сорауларга җаваплар.

2013 елның 4-5 ноябре көннәрендә 2013 елның 28 февралендә Мәскәүдә имзаланган ниятләр турындагы декларация кысаларында Татарстан Республикасына Прованс–Альпы–Лазурный берег – Франциянең көньяк-көнчыгыш төбәге делегациясе килде. Башка чаралар белән беррәттән, кунаклар 2013 елның 4 ноябрендә инжиниринг үзәкләрен оештыру буенча Россия Федерациясе Икътисадый үсеш министрлыгы тарафыннан оештырылган федераль бәйгедә җиңгән «Эйдос» фирмасында, КМТТУда (КХТИда) һәм Туполев ис. КМТТУда (КАИда) булдылар. Очрашулар вакытында үзара хезмәттәшлеккә бәйле көнүзәк мәсьәләләр каралды. 2013 елның 5 ноябрендә Татарстан Республикасы Икътисад министрлыгында делегация Татарстанның авиатөзелеш оешмалары вәкилләре белән очрашты. Әлеге очрашу кысаларында хезмәттәшлек юнәлешләре билгеләнде. Аерым алганда, авиация продуктларын сертификатлаштыру, шулай ук кече авиация өчен двигательләр төзү өлкәсендә хезмәттәшлек оештыру юнәлешләре тикшерелде.