ЯҢАЛЫКЛАР

2013 елның 7 ноябрендә Татарстан Республикасы Икътисад министрлыгында 2013 елда Татарстан Республикасы бюджетыннан социаль юнәлешле коммерциячел булмаган оешмаларга конкурс нигезендә субсидияләр бирү буенча конкурс комиссиясенең йомгаклау утырышы узды. Утырышта Татарстан Республикасы Иҗтимагый палатасы рәисе Анатолий Фомин рәислек итте. Утырышта конкурс сайлап алуында катнашуга бирелгән гаризалар рейтингының катнашучы җиңүче дип табылган минималь күрсәткече билгеләнде, шулай ук конкурс сайлап алуында җиңүчеләр исемлеге расланды.

2013 елның 7-8 ноябре көннәрендә Баулы шәһәрендә Баулы муниципаль районы яшьләре форумы узды. Форум эшендә муниципаль берәмлек башкарма комитеты, Татарстан Республикасы Икътисад министрлыгы, шәһәр предприятиеләре, республиканың эшкуарлык җәмәгатьчелеге вәкилләре, яшьләр лидерлары һәм активистлар катнашты. 7 ноябрьдә Форум кысаларында пленар утырыш узды, анда район территориясендә яшьләр сәясәтен гамәлгә ашыруга кагылышлы сораулар, муниципаль берәмлек җитәкчелеге тарафыннан күрелгән чаралар, шулай ук шәһәр предприятиеләре тәҗрибәсе тикшерелде. Моннан тыш, «Баулы муниципаль районында туризм үсеше өчен инвестиция мөмкинлекләре» темасына «түгәрәк өстәл» үткәрелде. Әлеге «түгәрәк өстәл» кысаларында Баулы муниципаль районында туристик маршрутлар төзү сорауларын хәл итү һәм аның эшчәнлеген оештыру өчен инициативалы төркем төзү турында карар кабул ителде.

Бүген «Россия төбәкләренең икътисады һәм интеллектуалъ милке» Халыкара форумы кысаларында Казан дәүләт энергетика университетында «Вузның интеллектуаль милке: төзү, тапшыру, предприятиедә куллану» темасы буенча панель дискуссия уздырыла. Әлеге чара югары уку йортларының инновацияле үсешенә этәргеч бирү һәм аны үстерү, вузларда һәм предприятиеләрдә матди булмаган активлар сыйфатында интеллектуаль милеккә махсус хокукны куллану, лицензияле сатулар мәсьәләләрен тикшерүгә багышланган.

2013 елның 8 ноябрендә ИТ-паркта «Предприятиеләрнең инновацияле үсеше корпоратив программаларын эшләү» семинар-практикумы уза. Әлеге семинар Татарстан Республикасы Икътисад министрлыгы һәм «Татарстан ФТМҮ» ТР ДУП тарафыннан «2013-2020 елларга Татарстан Республикасында интеллектуаль милек базары үсеше» программасын гамәлгә ашыру кысаларында оештырылды. Семинар инновацияле үсеш программаларын эшләү һәм предприятиенең интеллектуаль милкенә технологик аудит уздыруда Россия һәм республиканың иң эре предприятиеләре тәҗрибәсен өйрәнүгә багышланган.

Бүген «Россия төбәкләренең икътисады һәм интеллектуалъ милке» Халыкара форумы кысаларында Казан (Идел буе) федераль университетында «Оешма үсешенең нәтиҗәлелеген күтәрүче фактор буларак интеллектуаль милек белән идарә итү» Халыкара фәнни-гамәли конференциясе уза. Конференциядә интеллектуаль милек булдыру һәм аның белән идарә итү, интеллектуаль милек өлкәсендә объектларны хуҗалык әйләнешенә кертү өлкәсендә төбәк сәясәте мәсьәләләре, шулай ук әлеге өлкәдә хокукый көйләү сораулары да каралачак. Конференция эшендә Россия дәүләт интеллектуаль милек академиясе, Сколково фонды, Ростов дәүләт икътисад университеты, Саха (Якутия) Республикасы Фәннәр академиясенең Интеллектуаль милек үзәгенең әйдәп баручы экспертлары һ.б. катнаша.

2013 елның 6-8 ноябре көннәрендә Татарстан Республикасында Пермь крае делегациясенең эш визиты үтә. 7 ноябрьдә Татарстан Республикасы Икътисад министрлыгында Пермь крае Сәнәгать, эшкуарлык һәм сәүдә министрлыгы вәкиле Михаил Немытов белән очрашу узды. Очрашуны Татарстан Республикасы икътисад министры урынбасары Айрат Шәмсиев алып барды. Чарада шулай ук «ТР МК каршындагы ИСТҮ» ДБУ җитәкчесе урынбасары Олег Миронов та катнашты. Очрашу вакытында Татарстанның банкротлык процедурасы башланган оешмаларындагы эш тәҗрибәсе, Татарстан Республикасында банкротлык процедурасының һәм арбитраж идарәчеләре эшчәнлеген контрольдә тотуның нәтиҗәлелеген күтәрү кысаларында төрле органнар һәм ведомстволарның үзара хезмәттәшлеге мәсьәләләре каралды.
Моннан тыш, делегация вәкилен республикада предприятиеләрнең финанс-хуҗалык эшчәнлеген анализлау һәм мониторинглау буенча алып барылган эш белән таныштырдылар.

2013 елның 7 ноябрендә Матбугат һәм массакүләм коммуникацияләр буенча республика агентлыгында Татарстан Республикасы эшкуарлык өлкәсендә ришвәтчелекне профилактикалау буенча 2013 елгы эш йомгакларына багышланган матбугат конференциясендә катнашты. Матбугат конференциясендә Эшкуарларның хокукларын яклау буенча Татарстан Республикасы Президенты каршындагы вәкил Тимур Ногманов, Татарстан Республикасы икътисад министры урынбасары – Эшкуарлыкны үстерү департаменты башлыгы Рөстәм Сибгатуллин, Татарстан Республикасы Президентының Коррупциягә каршы сәясәт мәсьәләләре буенча Идарәсенең оештыру бүлеге мөдире Алексей Панкратов һәм Татарстан Республикасы Президенты каршындагы Коррупциягә каршы тору буенча совет әгъзасы, «Мәйдан» ҖКФ» ҖЧҖ генераль директоры Мария Горшунова катнашты.

2013 елның 7-8 ноябре көннәрендә Казанда «Россия төбәкләре икътисады һәм интеллектуаль милке» Халыкара форумы уза. Халыкара форумның уздырылуы Татарстан Республикасы Министрлар Кабинетының 2013 елның 15 гыйнварындагы 11нче карары белән расланган «Татарстан Республикасында интеллектуаль милек базарын үстерү» озакка исәпләнгән максатчан программада каралган. Форум чаралары белем бирү юнәлешендә уза, интеллектуаль милек өлкәсендә киң фикер алышуларны күз уңында тота, үз эченә семинарлар, панель дискуссияләр үткәрүне ала.

2013 елның 7 ноябрендә Казанда «Интеллектуаль хокук базарын үстерүдә Россия төбәкләренең роле» темасына Россия Федерациясе Федераль Җыенының Федерация Советы Рәисе каршындагы Интеллектуаль милек мәсьәләләре буенча советның күчмә утырышы узды. Анда интеллектуаль милек өлкәсендә төбәкләр сәясәте мәсьәләләре каралды. Утырышта сәламләү сүзе белән Россия Федерациясе Федераль Җыенының Федерация Советы Рәисе Валентина Матвиенко һәм Татарстан Республикасы Президенты Рөстәм Миңнеханов чыгыш ясадылар. Татарстан Республикасы икътисад министры Мидхәт Шаһиәхмәтов та доклад ясады. Үзенең чыгышында Мидхәт Шаһиәхмәтов интеллектуаль милек объектларын булдыру һәм аларны саклау өлкәсендәге проблемалы мәсьәләләрне яктыртты, агымдагы елның гыйнварында Татарстан Республикасы Министрлар Кабинеты тарафыннан расланган «2013-2020 елларга Татарстан Республикасында интеллектуаль милек базарын үстерү» озакка исәпләнгән максатчан программаны тормышка ашыру барышы турында сөйләде.