Валентина Матвиенко:Төбәкләр үсеше министрлыгының милли сәясәт хәзер төп вәкаләте булыр дип уйлыйбыз

Бүген Интеллектуаль милек мәсьәләләре буенча РФ Федерация Советы рәисе карамагындагы советның күчмә утырышыннан соң Федерация Советы рәисе Валентина Матвиенко милләтләр эше буенча илдә аерым министрлык булдыруга кагылышлы фикерләрен җиткерде. “Күпмилләтле, төрле конфессия вәкилләре яшәгән Россия дәүләтендә милләтара мөнәсәбәтләр өлкәсендә дәүләт сәясәте нигезләрен эшләү белән шөгыльләнүче, төбәкләрдәге вазгыятькә күзәтчелек итүче ведомство булырга тиеш. Ул ил һәм аерым төбәкләрдәге вазгыять хакында федераль һәм төбәк парламентлары өчен еллык докладлар әзерләргә дә тиеш. Бу ведомствода профессионаллар, экспертлар, дәүләт сәясәте идеяләрен генерацияләргә сәләтле кешеләр эшләргә тиеш”, -ди ул.

Билгеле булганча, моңа кадәр ил Хөкүмәте дәрәҗәсендә милләтара мөнәсәбәтләр буенча җаваплы орган вазифасын РФ Төбәкләр үсеше министрлыгы башкарды. “Әлеге министрлык компетенцияләренең һәм карый торган проблемаларның киңкырлы булуын исәпкә алганда, милләтара мөнәсәбәтләр белән милли сәясәт аның эшчәнлегендә беренче планда булмады. Шуңа күрә бу өлкәдә эшне көчәйтү, әлеге өлкәгә кагылышлы махсус федераль хезмәт яки комитет төзү ихтималын күтәреп чыккан идек”, -ди Россия төбәкләре палатасы җитәкчесе.

Хәзерге вакытта РФ Төбәкләр үсеше министрлыгыннан төзелеш һәм торак-коммуналь хуҗалык блогын аерып чыгарып, аның буенча аерым министрлык төзү турында карар кабул ителгән. Мәгълүм ки, моңа кадәр торак-коммуналь һәм төзелеш блогы Төбәкләр үсеше министрлыгының игътибар үзәгендәге төп блок иде. Димәк, хәзер министрлыкның төбәкләрнең социаль-икътисади үсеше, дәүләт программалары һәм милли сәясәт белән иркенләп шөгыльләнергә мөмкинлеге туа. “Алга таба Төбәкләр үсеше министрлыгында милли сәясәткә зур игътибар бирелер, ул аның төп вәкаләте булыр дип уйлыйбыз. Шуңа күрә милләтара мөнәсәбәтләр буенча аерым министрлык төзү кирәк түгел дип уйлыйм. Министр урынбасары вазифасына, департаментка әлеге мәсьәләгә кураторлык итүче, һөнәри яктан шөгыльләнүче вәкаләтле кешеләр килер дип өметләнәм”, -ди Валентина Матвиенко.