ЯҢАЛЫКЛАР

2013 елның 22 гыйнварында Татарстан Республикасы делегациясе бизнесны алып бару шартларын һәм эшкуарлык климатын яхшырту буенча булган тәҗрибә белән танышу максатында Ульяновск шәһәрендә эш сәфәрендә булды. Делегация Ульяновск өлкәсе Хөкүмәте Рәисенең беренче урынбасары – стратегик үсеш һәм инновацияләр министры Александр Смекалин белән очрашты, шулай ук «Технологияләр Трансферы Ульяновск Үзәге» ҖЧҖндә (Ульяновск наноүзәгендә) дә булды.

2014 елның 25 гыйнварында 15.00 сәгатьтә Шәһәр мәгариф үзәге социаль юнәлешле коммерциячел булмаган оешмалар (СЮКБО) вәкилләрен «СЮКБО: проект эшчәнлегеннән социаль хезмәт күрсәтүләргә» семинар-практикумында катнашырга чакыра. Семинарда түбәндәге мәсьәләләр каралачак: - КБО күрсәтә торган социаль хезмәтләр: характеристика, көндәшлеккә сәләтлелек, хезмәт күрсәтү бәяләрен санау; - дәүләт сатып алулары процедураларында (электрон аукцион, ачык конкурс, котировкаларны сорау) катнашу; сатып алуларда катнашучыларга яңа таләпләр.

Давоска эш визитының беренче көнендә Татарстан Республикасы Президенты Рөстәм Миңнеханов Бөтендөнья икътисадый форумы ачылуында катнашты һәм берничә очрашу уздырды.
ТР Президенты CNBC телекомпаниясенең Көнчыгыш Европа һәм БДБ илләре буенча директоры Евгения Рогожина белән очрашты. Рөстәм Миңнеханов билгеләп үткәнчә, республиканың Invest in Tatarstan PR-проекты кысаларында CNBC белән хезмәттәшлек тәҗрибәсе бар инде. Шулай ук телекомпания - KazanSummit-2013 Россия һәм Ислам конференциясе илләре саммитының төп телевизион хезмәттәше. Давостагы очрашуда ТР Президенты һәм Евгения Рогожина Татарстан һәм CNBC телекомпаниясенең алга таба хезмәттәшлеге турында сөйләштеләр.

«Татарстан Республикасының 2030 елга кадәрге социаль-икътисадый үсеше стратегиясе» проектын эшләү кысаларында «AV Group» идарәче партнеры/идарә рәисе (СЕО) Алексей Крыловский җитәкчелегендәге «Икътисадый үсеш» эксперт төркеме эше башланып китте. 2014 елның 20 гыйнварыннан 23енә кадәр Татарстан Республикасы үсешенең тармак стратегияләрен эшләү өчен, төбәк икътисадының агымдагы торышын диагностикалау буенча республика министрлыкларында һәм ведомстволарында киңәшмәләр үткәрү планлаштырылды. 20 гыйнварда Татарстан Республикасы икътисад министры Мидхәт Шаһиәхмәтов Татарстан Республикасы Икътисад министрлыгында эксперт төркеме белән очрашу уздырды. Киңәшмәдә Татарстан Республикасы Дәүләт Советы депутаты, «Татарстан-2030» проектын гамәлгә ашыру буенча җирле офис җитәкчесе Владимир Грицких та катнашты.

Иннополис объектлары төзелешенә 2014 нче елда якынча 13 милилард сум акча каралган. “Смарт Сити Казан” төзелеше мәйданында башкарылучы проект эшләренә 1 миллиард сум тирәсе акчаны үзләштерү күздә тотыла. Бу хакта бүген ТР Хөкүмәт йортында узган брифингта журналистларга ТР төзелеш, архитектура һәм торак-коммуналь хуҗалык министры Ирек Фәйзуллин хәбәр итте.

Министр сүзләренә караганда, быел республиканың Югары Ослан районында урнашачак яңа Иннополис шәһәре территориясендә 16 торак йорт, 40 мең кв. м. мәйданга ия технопарк, IT-университет биналары комплексы (уку, тикшеренүләр уздыру, торак, спорт корпуслары), транспорт һәм инженерлык инфраструктурасының күп санлы объектларын төзү планлаштырыла. Быел Иннополис территориясендә 200 мең кв.м га якын күчемсез милек файдалануга тапшырылыр һәм Иннополис үзендә яшәргә килүчеләрнең беренчеләрен 2014 нче ел азагында ук каршы алыр, дип фаразлана.

2014 елның 17 гыйнварында Татарстан Республикасы Икътисад министрлыгында РТ икътисад министры Мидхәт Шаһиәхмәтовның эшкуарлык җәмәгатьчелеге мәнфәгатьләрен кайгыртучы республика иҗтимагый оешмалары вәкилләре белән очрашуы узды. Очрашуда Татарстан Республикасы Кече һәм урта бизнес предприятиеләре ассоциациясе президенты Хәйдәр Хәлиуллин, кече һәм урта бизнес предприятиеләре ассоциациясе вице-президенты Рафыйк Шәйхетдинов, Татарстан Республикасы Сәүдә-сәнәгать палатасы Идарәсе рәисе урынбасары Артур Николаев катнашты.

2014 елның 17 гыйнварында Министрлыкта финанс ярдәме алган бизнес-проектларны гамәлгә ашыру процессында барлыкка килә торган сорауларны карау буенча комиссиянең чираттагы утырышы узды. Утырыш барышында 2010-2012 елларда «Лизинг-грант», «Социаль эшкуарлык», «Инновацияләр» программалары кысаларында дәүләт ярдәме алган һәм үз бизнес-проектларын гамәлгә ашыруда проблемалары булган республиканың 17 эшкуары мөрәҗәгате тикшерелде.

Кара һәм төсле металл калдыкларын җыю, саклау, эшкәртү һәм сату эшчәнлеге белән шөгыльләнүче эшкуарлар игътибарына. Сезнең игътибарыгызны лицензияләү (лицензия алу, лицензияне яңадан рәсмиләштерү, лицензия дубликатын алу) буенча дәүләт пошлинасын күчергәндә түләү поручениесе реквизитларын тутыруның дөреслегенә юнәлтәсебез килә. 2013 елда Татарстан Республикасы буенча Федераль казначылык Идарәсенә күчерелгән дәүләт пошлиналарын түләүләргә ясалган анализлар лицензиягә дәгъва кылучылар, лицензиатлар тарафыннан 104 (бюджет классификациясе коды – КБК), 105 (ОКАТО коды) түләү поручениеләре бланкларын тутырганда ясалган хаталар нәтиҗәсендә ачыкланмаган түләүләр булуын күрсәтә.

2013 елның 23 июлендәге 248-ФЗ номерлы Федераль закон белән Россия Федерациясе Салым кодексының 11 бүлеге - «Салым һәм җыемнарны түләү буенча йөкләмәләрне үтәүне тәэмин итү ысуллары»на кертелгән үзгәрешләргә ярашлы рәвештә, инвестицияле салым кредитын кайтару буенча йөкләмәләрне үтәүне тәэмин итү ысулы булып банк гарантиясе тора ала. Банк гарантиясе салым салу максатларында банк гарантияләрен кабул итүгә куелган таләпләргә җавап бирә ала торган банклар исемлегенә кертелгән банк тарафыннан бирелә.

2014 елның 17 гыйнварында Стратегик инициативалар агентлыгында «Көндәшлекне үстерү һәм монополиягә каршы сәясәтне камилләштерү» «юл картасын» мониторинглау буенча эшче төркем утырышы узды. Стратегик инициативалар агентлыгы тарафыннан «юл картасына» ярашлы рәвештә эшләнгән Россия Федерациясе субъектларында Көндәшлекне үстерү стандартын тикшерү көн тәртибенең төп мәсьәләсе булды. Стандартка кертү өчен тәкъдимнәр әзерләү вакытында эшче төркем эшчәнлегендә Стратегик инициативалар агентлыгы, «СКОЛКОВО» Мәскәү идарә мәктәбе экспертлары, шулай ук Татарстан Республикасы Икътисад министрлыгы вәкилләре актив катнашты.