ЯҢАЛЫКЛАР

Бүген Россия Федерациясе Президенты Владимир Путин "Яңа проектларны эшләтеп җибәрү буенча стратегик инициативалар агентлыгы"ның (АСИ) Күзәтчелек советы утырышын уздырды, дип хәбәр итә ТР Президенты матбугат хезмәте.
Чара Ново-Огаревода үткәрелде. Утырышта Татарстан Республикасы Президенты Рөстәм Миңнеханов катнашты.
Күзәтчелек советы вәкилләре илкүләм рейтинг һәм Россия Федерациясе субъектларында инвестицион климат торышы мәсьәләләре, илдә эшлекле климатны яхшырту, социаль өлкәдә берничә инициатива, шулай ук Кырымның кече һәм урта бизнесына хокукый мәгълүмат җиткерүне оештыру турында сөйләштеләр.

Бүген ТР Премьер-министры Илдар Халиков Кырымның Бакчасарай районына ярдәм итү мәсьәләләре буенча киңәшмә уздырды. ТР Хөкүмәте Йортында булган киңәшмәдә республика министрлыклары һәм ведомстволары җитәкчеләре катнашты.

Киңәшмәне ачып, ТР Хөкүмәте башлыгы, Кырымның Бакчасарай районы Татарстан Республикасына методик һәм матди ярдәм алу өчен беркетелгәнен искә төшерде.

Бүген Илдар Халиков министрларга Бакчасарай районындагы коллегалары белән элемтәгә чыгуны йөкләде. Беренче чиратта тармак министрлары Бакчасарай районындагы охшаш тармакларга характеристика бирергә тиеш, шулай ук алар методик һәм матди ярдәмне билгеләргә тиеш.

Кичә Бакчасарай районы җитәкчеләре белән очрашуда һәм Дмитрий Козак уздырган киңәшшмәдә яңгыраган иң җитди мәсьәләләр исәбендә- язгы кыр эшләрендә ярдәм итү, кышка әзерләнү, 1 сентябрьгә мәктәпләрне әзерләү эшләре санала. Шулай ук 1 октябрьгә территориаль планлаштыру схемасын, муниципалитетлар төзелешенең генераль планнарын әзерләргә кирәк.

Бүген, Дубайда ел саен уздырыла торган AIM инвестиция форумы алдыннан, Татарстан Республикасы делегациясе Шарҗ әмирлеге сәүдә-сәнәгать палатасы рәисе Әхмәд Мөхәммәд әл Мидф белән беренче очрашуын уздырды. ТР делегациясе составында ТР Президенты ярдәмчесе Радик Гыйматдинов, Татарстан Республикасының БГӘдәге сәүдә-икътисад вәкиле Тимур Хәйретдинов, “Иннополис” махсус икътисади зонасы” ААҖ генераль директоры Игорь Носов һәм ТР Сәүдә-сәнәгать палатасы идарәсе рәисе Шамил Агеев бар, дип хәбәр итә ТР Президенты матбугат хезмәте.
Очрашу барышында Татарстан делегациясе өчен Шарҗ әмирлегенең икътисади һәм инвестиция потенциалын тәкъдир иттеләр, һәм шулай ук Сәүдә-сәнәгать палатасының эшчәнлеге һәм өстенлекле юнәлешләре үсеше турында сөйләделәр. Шарҗда егермеләп сәнәгать зонасы булдырылган. Монда нигездә химия сәнәгатенең урта һәм кече предприятиеләре тупланган һәм ирекле икътисади сәүдә зонасы оештырылган.

Бүген Дубайда ТР Инвестиция үсеше агентлыгы җитәкчесе Линар Якуповның Хосусый сектор үсеше буенча Ислам корпорациясе төбәк бүлекчәсе (Азия) директоры Әхмәд Халид белән очрашуы булды.

Очрашу IV инвестиция форумы (Annual Investment Meeting, AIM) кысаларында узды. Очрашу барышында “Хаҗ” инвестицион-туплау фондын булдыру вариантлары турында фикер алыштылар. Ике яктан да катнашучылар үрнәк сыйфатында Малайзия хаҗилары өчен булган фондның бизнес-моделен карадылар.

“Ел саен Татарстанда хаҗ кылучылар саны арта бара, һәм хәзер мондый фонд булдыру мәсьәләсе бик актуаль”, -дип белдерде Линар Якупов. Аның сүзләренчә, мондый фонд кешеләргә акчаларын салып куеп , ә кирәкле сумма туплангач хаҗ кылырга бару мөмкинлеген бирәчәк.

Бүген Әлмәт политехника техникумы базасында Татарстанның 7 районы авыл җирлекләре башлыклары өчен зона семинар-киңәшмәсе узды.

Семинарда катнашучыларны ТР Муниципаль берәмлекләр советы рәисе Минсәгыйть Шакиров, ТР Президентының Территорияләр белән эшләү идарәсе башлыгы урынбасары Андрей Нефедов, Әлмәт муниципаль районы башлыгы Мәҗит Салихов сәламләде.

Район башлыгы кунакларны Әлмәт районында гамәлгә ашырыла торган өстенлекле юнәлешләр белән таныштырды. Авыл җирлекләрен үстерү мәсьәләсенә аерым игътибар бирелде.

Мондый семинарлар үткәрү инде күркәм традициягә әверелде. Авыл җирлекләре башлыкларыннан тыш, аларда Татарстан министрлыклары һәм ведомстволары җитәкчеләре, аларның урынбасарлары да катнаша. Алар үз эшчәнлекләре юнәлешләре буенча актуаль темаларга чыгышлар ясый. Чараның төп максаты – җирле үзидарә органнары вәкилләре һәм Татарстан дәүләт хакимияте органнары җитәкчеләре арасында җанлы диалог урнаштыру.

Районның барлык эшмәкәрләре катнашында узган җыелышта әлеге “юл картасы” мәсьәләсен кузгатмасалар да, бизнесны үстерү юллары турында эшлекле фикерләр күп яңгырады.
Татарстанда Кече һәм урта бизнес предприятиеләре ассоциясе вице- президенты Рәфыйк Шәйхетдинов, эшмәкәрлекне үстерү өчен, җирле хакимият, иҗтимагый советлар белән үзара хезмәттәшлек ныклы булырга тиешлегенә тукталып, Татарстан Президентының еллык юлламасындагы чыгышыннан өзек тә китерде: “Гражданлык җәмгыяте институтларын эзлекле рәвештә үстерү, коммерциячел булмаган оешмалар инициативаларын арттыру һәм бу процесска бизнес җәмәгатьчелекне актив җәлеп итү мөһим.” Шул ук вакытта ул, Татарстан районнарындагы эшлекле климат һәм эшлекле активлыкка анализ ясап, бездә эшлекле климат индексының югары булмавына тукталды. Дөрес, индекс 2008-2012 еллардагы күрсәткечләргә карап чыгарылган. Бизнесны алга таба үстерү өчен эш башлаучы эшмәкәрләргә һәрьяклап ярдәм итү, эшмәкәрләргә дәүләт программаларына керергә булышу, моның өчен район сайтында эшмәкәрлеккә кагылышлы барлык мәгълүматларны куеп бару, хәбәрдарлык кирәклегенә басым ясады.

Татарстанда авыл туризмын үстерү турында җитди уйланырга карар иттеләр. Моның өчен хәзерге вакытта махсус программа эшләнелә. Бүген ТР яшьләр һәм спорт министрлыгында киңәшмәдә бу юнәлешне булдыру һәм алга этәрү өчен нәрсә кирәк, шулай ук республикада туризм продуктлары торышы турында фикер алыштылар.Чарада, ТР Дәүләт туризм комитеты рәисе Сергей Ивановтан тыш, ТР Яшьләр оешмалары советы рәисе урынбасары Руфия Мөхәмәдиева, 4 чакырылыш Дәүләт Советы депутаты Илсур Сафиуллин республиканың муниципаль районнары башкарма комитеты җитәкчеләре, шулай ук Татарстанда авыл туризмы юнәлешләрен үстерүче эшмәкәрләр катнашты.
Руфия Мөхәмәдиева белдерүенчә, республикада авыл туризмы проектларын уңышлы гамәлгә куючы Россия Федерациясе һәм чит илләр тәҗрибәсен өйрәнеп, Татарстан тәкъдимнәре күп милләтле һәм этник үзенчәлекләрне исәпкә алып үсеш алырга тиеш, дигән карарга килделәр.