ЯҢАЛЫКЛАР

Бүген узучы 42 нче утырышында “ТР да куллану кәрзине турында”гы республика законы проекты каралды.
Документны депутатлар игътибарына ТР икътисад министры Мидхәт Шаһиәхмәтов тәкъдим итте. Аның сүзләреннән аңлашылганча, яңа закон проекты республикада куллану кәрзинен РФ Хөкүмәтенең 2013 елның гыйнвар карары белән расланган методик рекомендацияләрнең нигезләмәләренә туры китерү максатында һәм 2008 елның августында кабул ителгән “ТР да куллану кәрзине турында”гы законның гамәлдә булу чоры тәмамлануга бәйле рәвештә әзерләнгән. Документны эшләү белән составында Дәүләт Советы депутатлары, министрлык-ведомстволар, профсоюзлар вәкилләре һ.б. булган махсус эшче төркем шөгыльләнгән. Июнь аенда ул республиканың социаль-хезмәт мөнәсәбәтләрен җайга салу буенча өч яклы комиссиясендә каралып, уңай бәяләмә алган

DoorHan компанияләр төркеменең генераль директоры Александр Ханин белән бүген Татарстан Республикасы Президенты Рөстәм Миңнеханов очрашты.

Чарада ТР икътисад министры Мидхәт Шаһиәхмәтов, ТР Президенты ярдәмчесе Айрат Хәйруллин, ТР сәнәгать һәм сәүдә министрының беренче урынбасары Руслан Кәбиров, Лаеш муниципаль районы башлыгы Михаил Афанасьев һәм башкалар катнашты.

Очрашу барышында компания белән киләчәк хезмәттәшлек, Татарстан Республикасы территориясендә төзелеш проектларын гамәлгә ашыруда DoorHan продукциясен куллану турында сүз барды.

Искә төшерик, 2013 елның апрелендә Лаеш муниципаль районына эш визиты кысаларында Рөстәм Миңнеханов анда урнашкан  DoorHan КТ җитештерү мәйданчыкларын карады һәм алар эшләнмәләрен югары бәяләде.

Бүген Түбән Камада Татарстан Республикасы Президенты Р.Н. Миңнеханов җитәкчелегендә Кама инновацион территориаль-җитештерү кластерының һәм “Алабуга” МИЗ янындагы тимер юл инфрастуктурасының тимер юл транспорты инфраструктурасын үстерү мәсьәләсе буенча киңәшмә уздырылды. “Түбән Кама нефть химиясе» ААҖ базасында узган киңәшмәдә шулай ук “Россия тимер юллары” ААҖ филиалы – Куйбышев тимер юлы башлыгы Сергей Соложенкин да катнашты.

Киңәшмә барышында Кама инновацион территориаль-җитештерү кластерының тимер юл инфрастуктурасының үткәрүчәнлек сәләтен арттыру проектын гамәлгә ашыру мәсьәләләре, киләчәктә проектта катнашучыларның уртак гамәлләре һәм мөмкин булган хезмәттәшлек схемалары каралды. Киңәшмәдә катнашучылар 2020 елга кадәр Кама инновацион территориаль-җитештерү кластеры һәм “Алабуга” МИЗ сәнәгать предприятиеләренең үсеш перспективалары, Кама инновацион территориаль-җитештерү кластерының һәм Куйбышев тимер юлының йөкләр җибәрүчеләренең үзара хезмәттәшлеге мәсьәләсе буенча фикер алыштылар.

Бу хакта бүген ТР Дәүләт Советы утырышында республика икътисад министры Мидхәт Шаһиәхмәтов белдерде. Бүген ТР икътисад министры Мидхәт Шаһиәхмәтов Татарстан Дәүләт Советы утырышында хөкүмәт сәгате кысаларында, ТР Министрлар Кабинетының Бөтендөнья сәүдә оешмасы кагыйдәләре шартларында республиканың ныклы инновацион үсешен тәэмин итү буенча чаралары турында сөйләде.
Министр сүзләренә караганда, Россиянең шулай ук Татарстанның дөнья икътисадына интеграция процессы дәвам итә, бу халыкара партнерлар белән элемтәләрне җайга салуда һәм тышкы сәүдә әйләнешен үстерүдә чагыла. Мисал өчен, 2000 елдан 2012 елга кадәр Татарстан экспорты күләме 7 тапкырдан да артты.
Кагыйдәләр буенча күчеш чорында, ягъни 2019 елга кадәр таможня пошлиналары төшәчәк, бу Татарстан өчен өстенлекле булган сәнәгать, автосәнәгать һәм нефть химиясе секторларын риск зонасына кертергә мөмкин. Бу вакыт эчендә предприятие үз производствосын ВТО таләпләренә адаптацияләр, продукциянең көндәшлелеккә сәләтлелеген күтәрер дип көтелә. Күчеш чорында пошлинаны төшерүнең Россия тауар җитештерүчеләренә йогынтысы анализлана. Чит ил җитештерүчеләре ягыннан намуссыз көндәшлек фактлары ачыклаган очракта ВТО кысаларында саклану чараларын куллану максатыннан тикшерү үткәреләчәк.

Россия инновацион регионнары ассоциациясенең (АИРР) комитетлары утырышын бүген Томскта АИРР Советы рәисе, Татарстан Президенты Рөстәм Миңнеханов уздырды. INNOVUS XV Томск инновация форумы-2013 кысаларында узган утырыш эшендә Россия Федерациясе Президентының Себер федераль округындагы вәкаләтле вәкиле Виктор Толоконский, Томск өлкәсенең Закон чыгару Думасы рәисе Оксана Козловская, АИРР башкарма директоры Иван Бортник катнаштылар.

Комитетлар эшчәнлеге турында докладлар белән аларның җитәкчеләре чыгыш ясады. Татарстанның икътисад министры Мидхәт Шаһиәхмәтов АИРР квалификация комитеты эшчәнлеге турында чыгыш ясады. Комитет, шул исәптән, технопарк структуралары эшчәнлегенең критерийларын булдыру белән дә шөгыльләнгән. Технопаркларны аккредитацияләү проекты әзерләнгән, ул Татарстанда һәм тагын берничә регионда сыналачак.

Фәнни эшләнмәләр һәм инновацияләрне гамәлгә кертү Татарстан икътисадының традицион тармакларын – нефть чыгару, нефть эшкәртү, машина төзелешен үстерү өчен мөһим шарт булып тора. Мондый фикерне бүген Татарстан Республикасы Президенты Р.Н. Миңнеханов бүген Томск шәһәрендә INNOVUS XV форумы пленар утырышында чыгыш ясаганда әйтте. Форумда Татарстан делегациясе составына шулай ук республиканың икътисад министры Мидхәт ШаҺиәхмәтов, Татарстан Республикасы Президентының икътисад мәсьәләләре буенча ярдәмчесе Айрат Хәйруллин да бар иде.
INNOVUS Томск форумы — Россиядә соңгы елларда инновацион үсеш һәм Россия икътисадын модернизацияләү өлкәсендә хәл итүләрне эшләү мәсьәләләре турында фикер алышу өчен иң абруйлы мәйданчыкларның берсенә әверелгән беренче инновацион форум. Үткән ундүртенче форумда 47 Россия регионнан һәм дөньяның 19 иленнән 3000нән артык вәкил катнашкан иде.

Бүгенге утырышта ассызыкланганча, хәзер зур индустриаль мәйданнар белән генә яшәп булмый. ТР Дәүләт Советы Икътисад, инвестицияләр һәм эшмәкәрлек буенча комитетының “Кече һәм урта бизнес инфраструктурасын алга таба үстерү һәм Татарстанның инвестицияләр җәлеп итү сәләтен күтәрү турында”гы карары үтәлеше бүген комитет утырышында каралган төп мәсьәләләрнең берсе булды. Депутатлар алдында ТР икътисад министры урынбасары - Эшмәкәрлекне үстерү департаменты җитәкчесе Рөстәм Сибгатуллин хисап тотты.
Департамент җитәкчесенең чыгышында республикада кече һәм урта бизнес үсешенә этәргеч бирүче, төбәкнең инвестицияләр җәлеп итү сәләтен күтәрүгә ярдәм итүче сәнәгать мәйданнары, индустриаль парклар, технополис, махсус икътисади зона, бизнес-инкубаторлар, технопарклар эшчәнлегенә киң урын бирде. Аның ассызыклавынча, бу инфраструктура мәйданнарының республикада яңа эш урыннары булдыру ягыннан да әһәмияте зур. Рөстәм Сибгатуллин 2004 елда төзелгән “Мастер” Кама индустриаль паркын үрнәк буларак атап үтте. Республикадагы әлеге индустриаль мәйдан кече, урта һәм эре бизнесны бәйләүче буын ролен үти. Ул - “КАМАЗ” өчен автокомпонентлар җитештерү буенча махсуслашкан заманча производство. Дөрес, бүген анда актив рәвештә диверсификация процесслары да бара. ТР Хөкүмәте 2007 елда РФ Икътисади үсеш министрлыгы конкурсында катнашып, федераль казна катнашында “Мастер” индустриаль паркының өченче чираты төзелешен финанслау мөмкинлеге алды. Хәзер бу мәйданны алга таба үстерү өчен өстәмә федераль финанслар алу турында сүз бара, ди департамент җитәкчесе.
Рөстәм Сибгатуллин IT-паркның Казан һәм Чаллыдагы мәйданнары, нефтехия продуктларын һәм полимерлар эшкәртү буенча махсуслашкан “Химград” технополисы, “Алабуга” МИЗы, Казан, Чаллы, Алабуга һәм Чистайда эшләп килүче 5 бизнес-инкубатор эшчәнлеге хакында кыскача мәгълүмат бирде. Республикада ТР Кластерлы үсеш үзәге ачылуын, аның составына бүген 50 дән артык эшмәкәр керүе, 500 дән артык эш урыны булдырылуы хакында сөйләде. Күптән түгел Казанда ачылган “Агросәнәгать паркы”нда бүген балык, ит, яшелчә һ.б. продуктлар эшкәртү буенча мәйданнарны җиһазландыру баруы, быел федераль конкурста катнашып, республиканың технологик җиһазлар алу өчен субсидияләргә өметләнүен дә бәян итте.
Рөстәм Сибгатуллин ассызыклаганча, югарыда телгә алынган индустриаль мәйданнарның күбесе, нигездә, эре бизнес катнашын күздә тоткан производстволар. Бүгенге көндә республика муниципаль районнар җирлегендә дә кечерәк сәнәгать мәйданнарын төзү идеясен тормышка ашыру белән мәшгуль. Татарстан бу идеяне ил төбәкләреннән беренче булып 2011 елда күтәреп чыккан иде. Әмма муниципаль дәрәҗәдәге сәнәгать мәйданнары форматы әлегә федераль дәрәҗәдә законнар белән көйләнмәгән. Шуңа да әлегә Татарстан бу мәйданнар үсешен финанслауда федераль казнаның да катнашуына өметләнә алмый. Дөрес, зуррак мәйдандагы мондый муниципаль мәйданнарны федераль конкурсларда катнаштыру омтылышлары ясала. Быел, мәсәлән, “Теләче” сәнәгать паркын РФ Икътисади үсеш министрлыгы конкурсында катнаштырырга уйлыйлар.
Республикада бүгенгә муниципаль районнарда шундый 14 сәнәгый мәйдан төзелгән. Перспективада аларны барлык районда да эшләтү ниятләнә. Бүгенге утырышта катнашкан ТР Инвестицион үсеш агентылыгы җитәкчесе Линар Якупов белдергәнчә, бүген муниципаль дәрәҗәдәге мондый сәнәгать мәйданнарына ихтыяҗ бик зур. “Алар эшмәкәрләребезне республика территориясендә калдыру өчен дә хезмәт итәргә тиеш”, - дип ассызыклады ул. Аның фикеренчә, районнарда мондый мәйданнарны эшләтеп җибәрү, үстерүдә федераль яки республика казнасы акчаларына гына өметләнергә кирәкми. Кайбер төбәктә эшне башлап җибәрү өчен аерым мәсьәләләрне җайга салу да җитә. Ул мисал итеп Актаныш районындагы индустриаль мәйданны атады. Ул республикада беренче булып эшләтеп җибәрелгән иде. “Муниципалитет территорияне киртәләде, межалау мәсьәләсен хәл итте, юлын бераз уңайлады, эшмәкәрләргә җир бирде һәм салым ташламалары ясады. Калганын эшмәкәрләр үзләре шатлана-шатлана эшләде. Бу муниципалитетта мондый мәйданнарны үстерүнең бер формасы. Әгәр дә районда булган мәйданнар гына җитми икән, аларны киңәйтү, коммуникацияләр уздыру өчен Хөкүмәттән финанс чыгымнары таләп ителә, монысы инде икенче юлы”, - ди ул.
Линар Якупов ассызыклаганча, бүген зур индустриаль мәйданнар белән генә яшәп булмый, төрле формалар кирәк. “Моны РФ Икътисади үсеш министрлыгы да яхшы аңлый. 2012 ел башында муниципаль мәйданнар турында Россиянең барлык төбәкләренә сөйләдек. Ул муниципалитетларны үстерү өчен үзенә күрә бер модель була ала, аны башка төбәкләргә таратып булачак”, - ди агентлык җитәкчесе.

Бүген Казанда Татарстан Республикасы Президенты Р.Н.Миңнеханов “Россия Сбербанкы” ААҖ Идарәсе рәисе урынбасары Игорь Артамонов белән очрашты. Татарстан Республикасы Хөкүмәте Йортында узган бу очрашуда шулай ук Татарстан икътисад министры Мидхәт Шаһиәхмәтов, Татарстан Республикасы Президентының икътисад мәсьәләләре буенча ярдәмчесе Айрат Хәйруллин, Россия Сбербанкының “Татарстан Банкы” бүлеге идарәчесе Рушан Сәхбиев катнашты.
Очрашу барышында Рөстәм Миңнеханов Россия Сбербанкы җитәкчелегенә республика икътисадын үстерүдә финанс оештыру ягыннан актив катнашканы өчен рәхмәт белдерде. Яклар Татарстан Республикасында агымдагы банк проектларын гамәлгә ашыру һәм хезмәттәшлекнең перспектив юнәлешләре буенча фикер алыштылар.

2013 елның 13 маенда Татарстан Республикасы Сәнәгать һәм сәүдә министрлыгында “2013 – 2016 елларга Татарстан Республикасының машина төзелеше һәм нефть химиясе комплекслары предприятиеләрендә хезмәт җитештерүчәнлеген арттыру” буенча озак сроклы максатчан программаны гамәлгә ашыру буенча киңәшмә булды.
“2013 – 2016 елларга Татарстан Республикасының машина төзелеше һәм нефть химиясе комплекслары предприятиеләрендә хезмәт җитештерүчәнлеген арттыру” буенча озак сроклы максатчан программа Татарстан Республикасы Министрлар Кабинетының 2013 елның 13 февралендәге 99 номерлы карары белән расланды һәм агымдагы елда түбәндәге чараларны гамәлгә ашыруны күздә тота:
– Хезмәт җитештерүчәнлеген арттыру үзәген төзү;
– хезмәт җитештерүчәнлеген арттыру мәсьәләләренә багышланган махсуслаштырылган интернет-сайт булдыру;
– Татарстан Республикасының эре предприятиеләрендә хезмәт җитештерүчәнлеген арттыру проектларын субсидияләү.