РФ икътисади үсеш министрына ТР инновацион проектларын тәкъдим иттеләр

7 нче сентябрьдә Казанда Россия икътисади үсеш министры Алексей Улюкаевка Татарстанның инновацион инфраструктурасы үсеше һәм Россия Инновацион төбәкләре ассоциациясенең РФ Икътисади үсеш министрлыгы һәм РФ Финанслар министрлыгы белән багланыш мәсьәләләре буенча киңәшмәдә берничә инновацион проектны тәкъдим иттеләр.
Киңәшмә Казан IT-паркының конференц-залында үтте. Киңәшмә эшендә ТР Президенты Рөстәм Миңнеханов, ТР мәгълүматлаштыру һәм элемтә министры Роман Шәйхетдинов, ТР икътисад министры Мидхәт Шаһиәхмәтов, ТР мәгариф һәм фән министры Энгель Фәттахов, ТР министрлыклары һәм ведомстволары вәкилләре һәм ТРның зур предприятиеләре җитәкчеләре катнашты.
Иннополис шәһәре төзелеше турында Роман Шәйхетдинов сөйләде. Әлеге IT-проект төбәк, ил икътисады үсешенең яңа ноктасы, диде ул.
Министр проект максатлары һәм төп бурычлары турында тулырак сөйләде. Без шәһәрнең үз бәясен аклый торган инфраструктура булдырырга телибез, диде ул, 2014 нче ел ахырына беренче чират объектларын тапшырырга планлаштырабыз.
Киңәшмә барышында Рөстәм Миңнеханов билгеләвенчә, “Иннополис” проекты Татарстан һәм Россия өчен зур әһәмияткә ия, анда яңа эш урыннары, IT-белгечләр өчен яхшы шартлар булдырылачак, IT-университет ачылачак.
ТР Президенты сүзләренчә, республика РФ Икътисади үсеш министрлыгы йөзендә проект үсеше һәм Россиядә инновацияләр үсеше белән кызыксынган ышанычлы партнерны күрә. Миңнеханов билгеләвенчә, бүген IT-университет өчен иң мөһиме – финанслау. Аның сүзләренчә, студентларны әзерләүгә дөнья дәрәҗәсендәге белгечләрне җәлеп итү планлаштырыла.
“Иннополис” МИЗ үсеше турында аның генераль директоры Игорь Носов сөйләде. Без үз алдыбызга амбициоз бурыч куябыз – Иннополисны илнең IT-башкаласы итү, диде ул.
Алга таба ТР Кама инновацион территориаль-производство кластеры үсеше проекты каралды. Рөстәм Миңнеханов хәбәр иткәнчә, Кама кластеры территориясендә автомобиль һәм тимер юллары инфраструктурасын үстерергә, газ ташу күләмен арттырырга, энергетиканы арттырырга кирәк.
Алексей Улюкаевка “Нижнекамскнефтехим” ААҖ үсеше перспективалары, предприятиедә полиэтилен, полипропилен җитештерү күләмнәре һ.б. турында сөйләделәр.
А.Н.Туполев исемендәге Казан илкүләм тикшеренү техник университеты (КНИТУ-КАИ) ректоры Альберт Гыйльметдинов “КАИ-Лазер” инжиниринг үзәген булдыру проекты турында хәбәр итте.
Моннан тыш, Россия икътисади үсеш министрына химик технологияләр өлкәсендә инжиниринг төбәк үзәген (Кама инновацион территориаль-производство кластеры үсеше кысаларында), медицина симуляторларын («Эйдос» компаниясен проекты) булдыру проектларын тәкъдим иттеләр, дип хәбәр итә ТР Президенты матбугат хезмәте.