Татарстан эшмәкәрләрен законнарны яхшырту буенча тәкъдимнәр кертергә чакыралар

ТР эшмәкәрләре ТР Икътисад министрлыгына эшмәкәрләргә һәм инвестицион эшчәнлеккә кагылган республика законнарын яхшырту буенча тәкъдимнәрен юллый ала. Бу хакта бүген Казанда үткән матбугат конференциясендә ТР икътисад министры урынбасары Айрат Шәмсиев сөйләде.
2010 нчы елдан РФ Хөкүмәте тарафыннан федераль дәрәҗәдә җайга салып тәэсир итүне бәяләү (механизм оценки регулирующего воздействия - ОРВ) механизмы кертелгән. А.Шәмсиев сүзләренчә, әлеге механизм дөнья тәҗрибәсендә 1974 нче елдан кулланыла. Хәзер әлеге механизм дөньяда якынча 50 илдә, шул исәптән, БДБ илләрендә кулланыла.
ОРВ механизмы бизнес өчен административ киртәләрне киметүгә, закон актларын кабул итүнең нәтиҗәлелеген арттыруга һәм, тулаем алганда, инвестицион җәлеп итүчәнлекне яхшыртуга юнәлдерелгән.
Республиканың икътисад министры урынбасары билгеләвенчә, федераль дәрәҗәдәге башкарма хкакимият органнары өчен, механизм быел 1 нче гыйнвардан мәҗбүри тәртиптә кертелгән. РФ субъектлары өчен мәҗбүри тәртиптә 2014 нче елдан кертелә, җирле үзидарә органнары – шәһәр округлары - өчен әлеге механизм 2015 нче елдан кертелә, калган җирле үзидарә органнары өчен – 2016 нчы елдан.
“Татарстан ОРВ буенча эшкә 2012 нче елда “Яңа проектларны алга җибәрү буенча стратегик инициативалар агентлыгы” оешмасының күзәтчелек советы раслаган уңай инвестицион климатны тәэмин итү буенча башкарма хакимият органнары эшчәнлеге стандартын үтәү кысаларында тотынды, - дип сөйләде А.Шәмсиев. – Бу вакыттан алып, ТР Икътисад министрлыгына эшмәкәрлек өлкәсенә кагылган 300дән артык федераль норматив актлары проектлары килеп ирешкән”. Федераль норматив хокук актлары проектлары тармак министрлыклары һәм ведомстволары белән каралган, һәм алар нигезендә тиешле нәтиҗәләр ясалган.
А.Шәмсиев ТР Икътисад министрлыгының рәсми сайтында републикада ОРВ уздыру буенча норматив һәм методик материаллар, шулай ук хәзерге вакытта ОРВ процедурасы уздырыла торган норматив хокук актлары урнаштырылган бит ачылуын хәбәр итте. Быел ОРВ процедурасын уздыру өчен, гамәлдәге 14 норматив хокук акты һәм кабул итәргә планлаштырылган 21 норматив хокук акты тупланган.
Эшмәкәрләр һәм башка гражданнар норматив хокук актларын карап, алар буенча тәкъдимнәрен кертә ала. Эксперт советы, бизнес-җәмгыять вәкилләреннән, профильле министрлыклар һәм ведомстволар белгечләреннән формалашкан эш төркеме киләчәктә халык алдында консультация уздырачак.
А.Шәмсиев сөйләгәнчә, ТР Икътисад министрлыгы сайтында шулай ук “ТРда эшмәкәрлекне үстерергә нәрсә комачаулый?” баннеры урнаштырылган. Сылтама аша кереп, республика эшмәкәрләре ТР Икътисад министрлыгына, алар фикеренчә, эшмәкәрлек эшен үстерергә комачаулый торган, чыгымнар күп таләп итә торган, административ киртәләр күп булган норматив хокук актлары турында яза ала.
Шул ук вакытта үз бизнесың мисалында чыгымнарны исәпләүне китерергә кирәк. “Эшмәкәрләрнең нормалар булдыру эшчәнлегенә һәм әлеге өлкәдә актларны үзгәртүгә тәэсир итү мөмкинлеге бар”, - дип ассызыклады А.Шәмсиев.