Татарстанда Ozon тарату үзәгенең икенче чираты ачылды
Татарстанда республика Рәисе Рөстәм Миңнеханов катнашында «Зеленодольск» сәнәгать паркы территориясендә Ozon күмәртә-бүлү үзәгенең икенче чираты ачылды. Чарада Вице-премьер – икътисад министры Мидхәт Шаһиәхмәтов катнашты.
Логоүзәкнең икенче чиратын эшләтеп җибәрү белән саклау мәйданы ике тапкыр диярлек артачак – 23 мең квадрат метрдан 43 мең квадрат метрга кадәр җитәчәк. Фулфилмент-үзәк төрле категориядәге 10 млн товарны урнаштыруны тәэмин итәчәк, ә объектта 2 меңгә якын кеше эшләячәк. Зеленодольсктан сатып алучыларга көн саен 200 мең посылка җибәрелә, ә сезонның иң югары ноктасында – 345 меңгә кадәр. Параллель рәвештә өченче чират төзелә, аны эшләтеп җибәргәннән соң объектның мәйданы тагын 2 тапкыр артып, 84 мең квадрат метрга җитәчәк.
Рөстәм Миңнеханов Ozon компаниясенә Татарстан территориясендә масштаблы инвестиция проектларын гамәлгә ашырганнары өчен рәхмәт белдерде. «Бүген мөһим вакыйга – Озон компаниясе икенче чиратын эшләтә башлый. Татарстанда электрон сәүдә үсеше темплары бик югары, шуның белән бергә республикабыз клиентларына хезмәт күрсәтү сыйфаты да арта. Татарстанның 8 мең тәэмин итүчесе продукцияне Ozon системасы аша алга этәрә», – дип ассызыклады ТР Рәисе.
Ozon идарәче директоры Сергей Беляков билгеләп узганча, Татарстанда электрон коммерция-бизнес һәм республика җитәкчелеге арасында уңышлы синергия үрнәге. «Шуның аркасында төбәктә сатучылар һәм товар бирү пунктлары хуҗалары саны ике тапкыр арта. Без эшкуарлыкны үстерү мәсьәләсендә төбәкнең прогрессив карашын хөрмәт итәбез һәм шуңа күрә кече һәм урта бизнеска ярдәмне арттырабыз. Республикада инде 1 меңнән артык тапшыру пункты бар», – дип хәбәр итте ул.
«Бүгенге көнгә кадәр Рөстәм Нургалиевич белән Зеленодольскка килгәнебезне хәтерлим, ул вакытта логистика үзәге урынында чиста кыр иде. Республика, тиздән бу урында бөтен сәнәгать шәһәре „үсәчәк“, ә Татарстан әйткәннәрнең барысы да чынбарлыкка әвереләчәк, дип вәгъдә итте. ВЭБ.РФ төркеме барлык резидентлар өчен кирәкле инфраструктураны төзүгә 900 млн сумнан артык акча бүлеп бирде. Моннан тыш, әлеге мәйданчыктан өч эшкуарга үз бизнесларын үстерү өчен ташламалы кредитлар бирдек. Без Зеленодольскның ничек үсеш алуын күреп шатланабыз», – диде ВЭБ.РФ Шәһәр үсеше буенча баш идарәче партнеры Ирина Макиева.
«Ozon – „Зеленодольск“ сәнәгать паркының иң эре резидентларының берсе. Бүген без фулфилмент-үзәгенең икенче чиратын эшләтеп җибәрдек, өченче чираты төзелә. Бу – яңа эш урыннары, салым керемнәре һәм тулаем районның социаль-икътисадый үсеш дәрәҗәсен күтәрү. Бүген алгарышлы социаль-икътисадый үсеш территориясе резидентлары булып 25 компания тора, 11 меңнән артык эш урыны булдырылган», – дип сөйләде Зеленодольск районы башлыгы Михаил Афанасьев.
Аннары министр делегация составында Казан таможня постында булды, октябрьдә ул «Зеленодольск» сәнәгать паркы территориясенә күченде. Пост җаваплылыгы зонасына Казан, Зеленодольск һәм республиканың тагын 18 районы керә, аларда 600 катнашучы тышкы икътисадый эшчәнлек алып бара. Алар арасында Татарстанның «Нәфис», «ПОЗиС», «Эгида», «Денофлекс», Технофорт» һәм башка эре предприятиеләре бар.
Аннары катнашучылар «Саэльра» ҖЧҖнең онлы туңдырылган ярымфабрикатлар җитештерүе белән таныштылар. Объект быел август аенда файдалануга тапшырылган. Биредә ит һәм итле ярымфабрикатлар, икмәк-булка эшләнмәләре һәм башка төр продукция җитештерелә.
Мидхәт Шаһиәхмәтов шулай ук Рөстәм Миңнеханов рәислегендә «ВЭБ.РФ» үсеш дәүләт корпорациясе белән Татарстанның алга таба хезмәттәшлеге мәсьәләсе буенча киңәшмәдә катнашты.
Белешмә өчен:
2023 елның 9 ае йомгаклары буенча үз товарларын маркетплейсларда сатучы Татарстан сатучылары саны 55 мең 919 берәмлек тәшкил итте. Үсеш 2022 елның шул ук чорына карата 35% артык тәшкил итте. Хәзер бу Татарстанда теркәлгән юридик затларның һәм үзмәшгульләрнең 12 проценты. Алдан исәпләүләр буенча, аларның кереме 46 млрд сум тәшкил итә.