860тан артык татарстанлы интернет-сәүдәне үстерү буенча мастер-класслар сериясендә катнашкан
«Кече һәм урта эшкуарлык» илкүләм проектын тормышка ашыру кысаларында Татарстан муниципаль районнары халкы «eCommerce уңыш формуласы» электрон сәүдә мәйданчыкларына чыгуга багышланган бушлай укыту мастер-классларында катнашкан. Укытуны Татарстан Республикасы Икътисад министрлыгы ярдәме белән «Минем бизнес» үзәге оештырды.
Бүген, 20 октябрьдә, Казан шәһәренең 100дән артык кешесе интернет-сәүдәне үстерү буенча мастер-класста катнашты. Чара сентябрь-октябрь айларында Татарстан Республикасының 9 муниципаль районында һәм шәһәрендә узган мастер-класслар сериясен төгәлләде.
Гомумән алганда, мастер-классларда Лаеш, Кукмара, Түбән Кама, Бөгелмә, Арча, Зеленодольск һәм Менделеевск муниципаль районнарында, шулай ук Чаллы һәм Казан шәһәрләрендә яшәүче 860тан артык кеше катнашкан.
Проектның максаты – интернет-сәүдә каналлары аша сатуны арттыру мөмкинлекләре турында җирле халыкның мәгълүматлылыгын арттыру. Мастер-класслар барышында экспертлар һәм чакырылган спикерлар төрле мәйданчыкларда интернет-сәүдә үзенчәлекләре турында сөйләделәр, сатып алучыларны җәлеп итү һәм нәтиҗәле логистик схема төзү буенча тәҗрибәләре белән уртаклаштылар, шулай ук катнашучыларның сорауларына җавап бирделәр.
«Без татарстанлыларның интернет-сәүдә базарын үзләштерү һәм челтәрдә сатуны арттыру темасына зур кызыксынуын күрәбез. Мастер-классларда катнашучылар алган мәгълүмат аларга яңа сату каналларын тизрәк һәм җиңелрәк үзләштерергә ярдәм итәр дип ышанам», – диде Татарстан Республикасы икътисад министрының беренче урынбасары – Эшкуарлыкны үстерү департаменты директоры Наталья Кондратова.