ТР икътисад министры Мидхәт Шаһиәхмәтов ТР Министрлар Кабинеты утырышында: тулай төбәк продуктының гомуми күләмендә 26 процентын – файдалы казылмалар чыгару, 17,5 процентын эшкәртү производстволары алып тора
2023 ел йомгаклары буенча Татарстан Республикасының тулаем төбәк продукты күләме 3 887,4 млрд сум тәшкил итәчәк, ягъни 2022 елга карата 102% булачак. Бүген ТР Министрлар Кабинеты утырышында ТР Премьер-министры урынбасары – ТР икътисад министры Мидхәт Шаһиәхмәтов шундый мәгълүматлар китерде.
Утырышта 2024-2026 елларга республиканың социаль-икътисадый үсешен фаразлауның төп параметрлары; 2024 елга һәм 2025 һәм 2026 еллар план чорына республиканың берләштерелгән бюджеты һәм Территориаль мәҗбүри медицина иминияте фонды бюджеты фаразы кебек мәсьәләләр каралды.
Утырышны Татарстан Республикасы Премьер-министры Алексей Песошин үткәрде.
Утырышта Татарстан Республикасы Рәисе Рөстәм Миңнеханов, ТР Дәүләт Советы Рәисе Фәрит Мөхәммәтшин һәм башкалар катнашты.
Мидхәт Шаһиәхмәтов хәбәр иткәнчә, тулай төбәк продуктының гомуми күләмендә 26% – файдалы казылмалар чыгару, 17,5% – эшкәртү производстволары, 10,4% – күмәртәләп һәм ваклап сату, 7,7% – төзелеш, 5,6% – транспортлау һәм саклау, 4,3% – авыл хуҗалыгы.
Докладчы түбәндәге фаразланган икътисадый күрсәткечләрне китерде. 2023 ел нәтиҗәләре буенча тулай төбәк продукты күләме 3 887,4 млрд.сум яки 102% (2022 ел дәрәҗәсенә карата) тәшкил итә, сәнәгать күләме – 4 490,8 млрд.сум яки 102%, авыл хуҗалыгы – 292,3 млрд.сум яки 87,5%, төзелеш – 643,3 млрд.сум яки 106,9%, ваклап сату – 1 313,0 млрд.сум яки 105,8%, инвестицияләр – 959,9 млрд.сум яки 102,1%.
Шул ук вакытта сәнәгать җитештерүе икътисадның чагыштырма өлешендә 45,7% тәшкил итә (2023 ел бәяләмәсе буенча). Мидхәт Шаһиәхмәтов хәбәр иткәнчә, 2023 ел нәтиҗәләре буенча озатылган продукция күләме 4 490,8 млрд. сум булыр дип көтелә, 2024 елда – 4 721,9 млрд.сум, 2025 елда – 5 104,0 млрд.сум, 2026 елда – 5 379,8 млрд.сум.
Сәнәгать өлкәсендә фаразны үтәү факторлары арасында Татарстан Республикасы икътисад министры түбәндәгеләрне атады: предприятиеләрнең өзлексез нәтиҗәле эшләвен тәэмин итү, предприятиеләрне чимал, материаллар һәм компонентлар белән тәэмин итү, җиһазларның куркынычсызлыгын саклау һәм тотрыклы эшләвен тәэмин итү, нәтиҗәле логистика төзү, сату базарларын үстерү һәм хезмәт җитештерүчәнлеген арттыру.
Мидхәт Шаһиәхмәтов хәбәр иткәнчә, республикада предприятиеләргә федераль һәм республика ярдәме чаралары кулланыла. Мәсәлән, 2023 елда төбәктә система булдыручы предприятиеләргә ярдәм итүгә 32,8 млрд.сум бүлеп бирелгән (шуның 26,1 млрд. сумы – сәнәгать үсешенә субсидияләр, СҮФ үсеш программалары – 3,8 млрд. сум, ташламалы кредитлар – 2,9 млрд. сум). Кече һәм урта бизнес предприятиеләренә ярдәм итү өчен 49 млрд. сум каралган (шул исәптән инвестиция һәм әйләнеш максатларына ташламалы кредитлар – 18,7 млрд.сум, кредит каникуллары һәм реструктуризация – 5,8 млрд.сум, башка чаралар).
Республика предприятиеләре һәм оешмалары яңа кооперация элемтәләрен җайга салу, логистика чылбырларын үзгәртеп кору, импортны алмаштыру эшен дәвам итәләр, дип йомгаклады министр.
ТР Рәисенең матбугат хезмәте