«2014 – 2020 елларга «Ачык Татарстан» Татарстан Республикасында мәгълүмати һәм коммуникацион технологияләрнең үсеше» дәүләт программасы расланды

Татарстан Республикасы Министрлар Кабинетының 2013 елның 17 декабрендәге 1000нче Карары белән «2014–2020 елларга «Ачык Татарстан» Татарстан Республикасында мәгълүмати һәм коммуникацион технологияләрнең үсеше» Татарстан Республикасы дәүләт программасы расланды.
Программаның максаты – эшчәнлекнең барлык өлкәләренә мәгълүмати коммуникация һәм инновацияле технологияләрне кертү һәм аларны киң куллану, Татарстан Республикасында бердәм мәгълүмати җәмгыять булдыру һәм Татарстан Республикасын глобаль мәгълүмати җәмгыятькә интеграцияләү.
Программа чараларын гамәлгә ашыру 2020 елга түбәндәгеләргә ирешергә мөмкинлек бирәчәк:
- дәүләт идарәсенең һәм җирле үзидарәнең, гражданлык җәмгыятенең һәм бизнесның дәүләт хакимияте органнары белән үзара эш итүенең нәтиҗәлелеген күтәрү; дәүләт хезмәте күрсәтүнең тизлеген һәм сыйфатын арттыру;
- Татарстан Республикасы территориясендә заманча мәгълүмати һәм телекоммуникацион инфраструктура булдыру, аның нигезендә сыйфатлы хезмәт күрсәтү һәм халык өчен мәгълүмат һәм технологияләрнең югары дәрәҗәдә ачыклыгын тәэмин итү;
- мәгълүмати һәм телекоммуникацион технологияләрне куллану нигезендә мәгарифнең, медицина хезмәте күрсәтүнең, халыкны социаль яклауның, мәдәни агарту системасы үсешенең сыйфатын күтәрү;
- мәгълүмати һәм телекоммуникацион технологияләрне куллану нигезендә республика икътисадын үстерү;
- транспорт чаралары белән идарә итүнең нәтиҗәлелеген, пассажир йөртүләрнең, махсус һәм куркыныч йөкләрне ташуларның куркынычсызлыгы дәрәҗәсен арттыру;
- гамәлдәге норматив документларга ярашлы рәвештә дәүләт хакимияте органнары мәгълүмати ресурсларын саклауны тәэмин итү.