Мидхәт Шаһиәхмәтов Идел буе федераль округында Инвестицион климатны яхшырту, административ киртәләрне киметү һәм кече һәм урта эшкуарлыкны үстерү буенча комиссия утырышында чыгыш ясады

2013 елның 18 декабрендә Киров шәһәрендә Россия Федерациясе Президентының Идел буе федераль округындагы тулы вәкаләтле вәкиле Михаил Бабич рәислегендә Идел буе федераль округында Инвестицион климатны яхшырту, административ киртәләрне киметү һәм кече һәм урта эшкуарлыкны үстерү буенча комиссия утырышы узды.
Утырыш эшендә Эшкуарларның хокукларын яклау буенча Россия Федерациясе Президенты каршындагы вәкил Борис Титов, Яңа проектларны алга этәрү буенча стратегик инициативалар агентлыгы генераль директоры Андрей Никитин, Россия Федерациясенең Төбәкләр үсеше министры урынбасары Михаил Крук, Россия Федерациясе Генераль прокуроры урынбасары Сергей Зайцев һәм комиссиянең башка әгъзалары катнашты.
Татарстан Республикасыннан утырышта ТР икътисад министры Мидхәт Шаһиәхмәтов катнашты.
Утырыш барышында Мидхәт Шаһиәхмәтов доклад белән чыгыш ясады. Үзенең докладында ул «Төбәктә уңай инвестицион климат тәэмин итү буенча Россия Федерациясе субъекты башкарма хакимияте органнары эшчәнлеге стандарты»н кертүдә Татарстан ирешкән уңышларны, «Яңа проектларны алга этәрү буенча стратегик инициативалар агентлыгы» АКБО белән эшләү юнәлешләрен, Милли эшкуарлык инициативасы кысаларында гамәлгә ашырыла торган «юл карталарын» кертүнең якынча нәтиҗәләрен яктыртты.
Утырыш йомгаклары буенча, Михаил Бабич Идел буе федераль округы төбәкләрендә инвестицион стандартларны һәм «юл карталарын» гамәлгә кертергә кирәклегенә басым ясады.