Мидхәт Шаһиәхмәтов «Казаньоргсинтез» иҗтимагый советы утырышында катнашты
Татарстан Республикасы премьер-министры урынбасары – Татарстан Республикасы икътисад министры Мидхәт Шаһиәхмәтов, «Казаньоргсинтез» директорлар советы әгъзасы буларак предприятиенең Иҗтимагый советы утырышында катнашты. Утырышның төп темалары «Казаньоргсинтез» кулланган экологик технологияләр, полимерларның яңа маркаларын эшләү һәм производствоны модернизацияләү булды.
Мидхәт Шаһиәхмәтов предприятие Директорлар советының һәр утырышында экология мәсьәләләре каралуын сөйләде. 2026 елга кадәр үсеш планында каралган «Казаньоргсинтез»ның барлык проектлары үтәлергә тиешле экологик параметрларны үз эченә ала.
«Казаньоргсинтез» һәм «Нижнекамскнефтехим»да масштаблы инвестицион проектлар гамәлгә ашырыла. Казанда изопропилбензол җайланмасын модернизацияләделәр, «В» реакторын реконструкцияләү тәмамлана, ә Түбән Камада «Казаньоргсинтез»ны чимал белән тәэмин итәчәк иң масштаблы проекты – ЭП-600 төзелә. СИБУР кабул иткән карарлар әйләнә-тирә мохиткә, мәсәлән, «Казаньоргсинтез»да йогынтыны 14-15% ка киметергә мөмкинлек бирә. Калдыкларны җыю юнәлешендә дә мөһим нәтиҗәләр күзәтелә. Предприятие экологик технологияләр һәм модернизация буенча чаралар эшли башлый. Бу – төп икътисади күрсәткечләр белән беррәттән. «Казаньоргсинтез»да янәшәдәге тармакларда 25 меңләп эш урыны булдырыла, һәм бу эш урыннарында Татарстанның кече һәм урта бизнесының шактый өлеше бар. Предприятиедә җитештерелгән продукциянең 30% тан артыгы республика эчендә эшкәртелә», – дип сөйләде Мидхәт Шаһиәхмәтов.
Министр сүзләренчә, СИБУРның «Тәэминатчы көне» контрагентлары белән үзара эшчәнлегенең нәтиҗәле формасы кертелгән (потенциаль тәэмин итүчеләр һәм СИБУР арасында турыдан-туры элемтәләр урнаштырырга мөмкинлек бирүче чаралар).
«Компания үз планнарын җентекләп бәян итә, нәтиҗәләр күрсәтә, биремнәрне ничек хәл итүен аңлата. Һәм без аларның нәтиҗәләре яхшы икәнен күрәбез», – дип өстәде ул.
Утырыш кысаларында Мидхәт Шаһиәхмәтов шулай ук предприятиедә «Казаньорсинтез»ның экология атналыгы кысаларында узган балалар рәсемнәре конкурсында җиңүчеләрне бүләкләде. Иң яхшы өч рәсемнең авторы – предприятие хезмәткәрләренең балалары дипломнар һәм велосипедлар алды.