Иннополиста беренче тапкыр шәһәр эчендә дроннар белән товар китертүне сынап караячаклар
Эксперименталь хокукый режим (ЭПР) кысаларында беренче тапкыр шәһәр чикләрендә пилотсыз очу аппаратларын эксплуатацияләүгә рөхсәт бирү планлаштырыла. Эксперимент 2024 елда Иннополиста (Татарстан) башланырга мөмкин. Бу хакта Икътисадый үсеш министрлыгының Цифрлы икътисад департаменты директоры Владимир Волошин «ЦИФРОВАЯ ТРАНСПОРТАЦИЯ» танспорт һәм логистика өлкәсендә цифрлы технологияләр халыкара форумында чыгыш ясаганда белдерде.
«Эксплуатация 2024 ел башында планлаштырыла. Бу шәһәр аэромобильлеге буенча беренче ЭПР программасы. Хәзер Иннополиста пилотсыз очкычларның барлык төрләре дә кулланылачак: җир өстендәге ташучылар, автоном роботакси һәм хәзер – дроннар белән аэрокитертү», – дип сөйләде Владимир Волошин.
Компаниянең телекоммуникация проектлары буенча директоры – «Пилотсыз транспорт чаралары хәрәкәтен оештыру үзәге» ҖЧҖ ЭПР булдыру инициаторы Максим Мысев сүзләренчә, проектның технологик нигезе булып пилотсыз аппаратлар хәрәкәте белән идарә итүче цифрлы интеграцияле очыш-мәгълүмати хезмәт күрсәтү платформасы тора.
«Дроннар өере» – бер оператор идарә иткән программалар кысаларында үз маршрутлары буенча автоматлаштырылган рәвештә хәрәкәт итүче берничә пилотсыз аппарат. Цифрлы платформа хәзерге вакытта эшли, әмма аны төзегәндә салынган принциплар пилотсыз аппаратларның хәрәкәтен һавада саны артканнан соң да оештырырга мөмкинлек бирәчәк. ЭПР аерым үзенчәлеге булып аны гамәлгә ашыруның шәһәр мохите тора. Россиянең теләсә кайсы торак пунктына масштаблаштырырга мөмкин булачак шәһәр аэромобильлеге механизмын булдырырга өметләнәбез», – дип билгеләп үтте Максим Мысев.
Пилотсыз аппаратларны куллануга икътисадның күп кенә секторларында ихтыяҗ бар. ЭПР урнаштыру тәҗрибәсеннән чыгып, аэрологистика, авыл хуҗалыгы, янгыннарны мониторинглау һәм сүндерү, аэрофотога төшерү һәм авиация эшләренең башка төрләре өлкәләрендә дроннарны куллану масштаблана.
«Бүген бездә Россия Федерациясенең 21 субъектында пилотсыз һава транспорты буенча 6 ЭПР урнаштырылган. 56 төрле компания пилотсыз технологияләрне апробацияләү өчен ЭПР механизмын куллана, алынган тәҗрибә киләчәктә гомуми көйләүне камилләштерү өчен нигез булачак», – дип ассызыклады Владимир Волошин.
Бүген бөтен ил буенча төрле юнәлешләр буенча 12 ЭПР программасы эшли. Аларны урнаштыру практикасы 2022 елның мартында башланды. Бу 95 катнашучы компаниягә технологияләрне сынап карарга мөмкинлек бирә: пилотсыз җир һәм һава транспорты, медицина технологияләре, шул исәптән телемедицина (28 компания катнаша), территориядә эксперимент, дәүләт хезмәтләре.
ЭПР механизмын гамәлгә ашыру пилотсыз авиацияне үстерү стратегиясе һәм РФ Хөкүмәте Рәисенең беренче урынбасары Андрей Белоусов кураторлыгындагы «Пилотсыз авиация системалары» илкүләм проекты максатларына турыдан-туры туры килә.