Татарстанда 11 мең укучыны эшкуарлык күнекмәләренә өйрәтәчәкләр
Татарстан мәктәпләрендә яңадан «Мәктәп бизнес-старты» республика программасы буенча укулар башлана. Яңа уку елында «Кече һәм урта эшкуарлык» илкүләм проекты кысаларында тормышка ашырыла торган курс 11 меңнән артык баланы колачлаячак һәм урта мәктәптә бизнес-күнекмәләр нигезләрен салуны дәвам итәчәк. «Мәктәп бизнес-старты» программасын Татарстан Республикасы Икътисад министрлыгы һәм Татарстан Республикасы Мәгариф һәм фән министрлыгы оештыра.
«Узган уку елы программага ихтыяҗ булуын ачык күрсәтте. Без 12 мең баланы эшкуарлык нигезләренә өйрәттек, аларның күбесе үз проектларын булдырды, олы эшкуарлар белән аралашты, табыш алды һәм, чын бизнесменнар буларак үзләрен күрсәтеп, хәйриячелек ярминкәсендә акча белән уртаклаштылар. Быел программа республиканың төрле почмакларыннан 11 меңнән артык кешене колачлаячак! Бу безнең хәзер үк бизнес-лидерларның яңа буынын төзүебез турында сөйли, – дип, бу процессның мөһимлеге турында Татарстан Республикасы Рәисе Рөстәм Миңнеханов бер генә тапкыр әйтмәде. Программада катнашучыларга быел уку елында нәтиҗәле эш алып баруларын телибез», - дип сөйләде Татарстан Республикасы икътисад министрының беренче урынбасары Наталья Кондратова.
Беренче этапта дәресләр эшлекле уен форматында узачак һәм Казан, Чаллы, Әгерҗе, Азнакай, Аксубай, Түбән Кама, Әлмәт, Баулы, Зәй, Мамадыш, Нурлат, Сарман, Спас, Тукай, Алабуга, Бөгелмә, Зеленодольск, Биектау, Питрәч, Алексеевск, Кукмара, Арча, Буа, Тәтеш, Югары Ослан, Чистай, Кайбыч, Саба, Лаеш, Теләче районнары мәктәпләрен колачлаячак.
«Безнең бурыч – бөтен республика буенча балалар арасында эшкуарлык сәләтен ачу. Еш кына аларның күбесе бу һөнәрне сайларга мөмкин булуы турында уйламый да бит. Ә безнең республикага эшкуарлар кирәк: алар мөстәкыйль, якты, җаваплы шәхесләр, алар үз тирәсендә яңа дөнья тудыра. Без Татарстан укучыларын өлкәннәр тормышына әзерләргә, аның нинди кызыклы булуын күрсәтергә, командада эшләргә өйрәтергә һәм үзенең беренче бизнесын булдырырга мөмкинлек бирергә телибез», - ди «Мәктәп бизнес-старты» проекты җитәкчесе Елена Тихонова.
Укулар берничә этапта узачак. Беренчесендә, сентябрь-октябрьдә, 60 кешелек төркемнәргә бүленгән егетләр эшкуарның портретын төзиячәк һәм махсус тестлар узачак, шулай ук үз проектларын тәкъдим итәчәкләр (алдан бизнес-план әзерләп һәм PR-кампания эшләп).
Эшлекле уенны уңышлы башкарып чыккан укучылар киләсе турда эшкуарлык эшчәнлегенең теоретик һәм практик күнекмәләренә тирәнтен өйрәтү узачак. Бу мәктәп компанияләрен булдыруда команда семинарлары булачак, соңында катнашучылар үз проектларын эшкуарларга тәкъдим итәчәк. Бу сынауны узган укучылар проектның икенче дәрәҗәсенә чыгачак. Яңа ел алдыннан аларны хәйрия мәктәп ярминкәсендә, ә аннары бизнес-кейслар чемпионатында көтәләр.
Мәктәп бизнес-компанияләренең финал слеты 2024 елның язына билгеләнгән. Исегезгә төшерәбез, 2022-2023 еллар сезонда проектта җиңүче булган өч команда бүләк итеп Мәскәүнең «Сколково» технопаркында һәм Горький исемендәге киностудиядә булдылар. «Без илебезнең йөрәге – Мәскәүгә сәяхәт ясадык! Бу онытылмаслык тәҗрибә. Уку елы дәвамында безгә тырышырга туры килде, әмма без, чын эшкуарлар кебек, үз хезмәтебезнең нәтиҗәләрен күрдек. Проектны оештыручыларга рәхмәт, без бит хәзер ирешелгәннәрдә тукталып калырга җыенмыйбыз, ә эшкуарлар буларак үсешне дәвам итәчәкбез», - дип фикерләре белән уртаклашты балалар.
«Мәктәп бизнес-старты» программасы «Кече һәм урта эшкуарлык һәм шәхси эшкуарлык инициативасына ярдәм» илкүләм проектын гамәлгә ашыру кысаларында Татарстан Республикасы эшкуарлыкка теләктәшлек фондының һәм Татарстан Республикасы Икътисад министрлыгының «Минем бизнес» үзәге ярдәмендә гамәлгә ашырыла.