Татарстанда «Эшкуар әни» программасында җиңүчене сайладылар
«Минем бизнес» үзәгендә «Эшкуар әни» федераль программасында катнашучыларны бүләкләү тантанасы узды. Төп бүләккә Анна Жукова лаек булды. Ул Лаеш районының Столбище авылында «Помогатор» балалар клубының бизнес-проектын тәкъдим итте һәм 100 мең сум күләмендә грант алды. Программа Татарстан Республикасы Икътисад министрлыгы ярдәме белән «Кече һәм урта эшкуарлык» илкүләм проекты кысаларында «Минем бизнес» үзәге тарафыннан гамәлгә ашырылды.
Биш көнлек уку кысаларында катнашучылар бизнес алып бару буенча комплекслы белемнәр алдылар. Кызлар алдында маркетинг, электрон сәүдә, бизнес-аналитика һәм башка күп кенә экспертлар чыгыш ясады. Шулай ук укыту программасына предприятиеләргә бизнес-визитлар да кертелгән иде.
Быел декрет ялында булган һәм үз эшен алып барган 100дән артык хатын-кыз гариза биргән иде, шуларның 35ен эксперт комиссиясе алга таба катнашу өчен сайлап алды, ә 31е интенсив укыту финалында эксперт жюриена үз бизнес-идеяләрен тәкъдим итте.
Төп бүләкне – 100 мең сум күләмендәге грантны «Помогатор» балалар клубына нигез салучы һәм аның хуҗасы Анна Жукова алды. Җиңүчегә сертификатны ТР Эшкуарлыкка ярдәм итү үзәге җитәкчесе Елена Шевцова тапшырды. Анна алынган акчаны мастер-класслар һәм түгәрәкләр үткәрү өчен җиһазлар сатып алуга сарыф итәргә ниятли.
Барлык катнашучылар да чараның партнерларыннан бүләкләр алды. Алеся Аполонова һәм Гүзәл Ибраһимова ВКонтакте социаль челтәрендә үз бизнес-проектларын алга сөрү өчен 10 мең сум акча оттылар. Рушания Купкенова VDOOH тышкы реклама маркетплейсыннан 40 мең бонус сум күләмендә приз алды.
«Эшкуар әни» программасы Татарстанда өченче тапкыр гамәлгә ашырыла. Елдан-ел катнашу өчен гаризалар саны арта, бу безгә хатын-кызларның эшлекле активлыгы артуын күрсәтә. Һәм безнең бурыч – бу потенциалны стимуллаштыру һәм үстерү. «Эшкуар әни» программасы моңа ярдәм итә һәм бизнес-идеяне уңышлы тормышка ашыру өчен кирәкле белем һәм компетенцияләрне туплый», – диде Татарстан Республикасы икътисад министрының беренче урынбасары – Эшкуарлыкны үстерү департаменты директоры Наталья Кондратова.
Программа «Кече һәм урта эшкуарлык һәм шәхси эшкуарлык инициативасына ярдәм» илкүләм проекты буенча гамәлгә ашырыла. Оештыручы: Россия Икътисадый үсеш министрлыгы. Оештыруда ярдәм күрсәтүчеләр: «Безнең киләчәк» фонды, Россия хатын-кызлар берлеге катнашында КУЭ корпорациясе. Генераль партнер: Wildberries маркетплейсы. Проект партнерлары: VK компаниясе, VDOOH тышкы реклама маркетплейсы.