Артём Здунов Татарстан Республикасының иң яхшы эшлекле журналистларын бүләкләде

2014 елның 18 декабрендә Татарстан Республикасында кече һәм урта эшкуарлыкны үстерү турындагы журналист эшләренә һәм медиа-проектларга V Республика конкурсы җиңүчеләрен бүләкләү тантанасы үткәрелде. Чара «Татарстанның бизнес-нәтиҗәләре – 2014» эшлекле вакыйгалар атналыгы кысаларында узды.
Ел саен уздырыла торган әлеге конкурс Татарстан Республикасында эшкуарлык эшчәнлеген популярлаштыру, эшкуарның уңай образын формалаштыру, кече һәм урта эшкуарлык үсешен яктыртуны көчәйтү максатларында оештырыла.
Икенче ел рәттән Татарстан Республикасы Икътисад министрлыгы конкурсны оештыруның инициаторы булып тора. Традиция буенча конкурсны оештыру партнерлары арасында абруйлы ике иҗтимагый оешма – Татарстан Республикасы Журналистлар берлеге һәм Татарстан Республикасы Сәүдә-сәнәгать палатасы бар.
Татарстан Республикасы икътисад министры Артём Здунов, конкурста катнашучыларны һәм кунакларны сәламләп, болай дип билгеләп үтте: «Икътисад министрлыгының позициясе шунда, без һәрвакыт эшкуарлык җәмәгатьчелеге белән элемтә булдырырга омтылабыз. Ә журналистлар – нәкъ менә халык һәм эшкуарларның үзара бәйләнешен тәэмин итәләр дә».
Массакүләм мәгълүмат чаралары вәкилләренә мөрәҗәгать итеп, Татарстан Республикасы икътисад министры болай диде: «Еш кына эшкуарлык климатына карата мөнәсәбәт сезнең каләм белән формалаша, инвесторлар сезнең күз белән карый, шуңа күрә мин журналистларга фикердәшләрем, көрәштәшләрем буларак карыйм. Алдыбызда чишелергә тиешле билгеле бер бурычлар тора. Икенче елга мин журналистларның халыкның хәбәрдарлыгына, аның финанс грамоталылыгын арттыруга игътибар итүләрен теләр идем».
«Бүген без Татарстан Республикасында кече һәм урта эшкуарлыкны яктыртуга объектив карауга ирешә алганнарны бүләкләргә телибез. Нәкъ менә объектив, чөнки без тәнкыйтьтән курыкмыйбыз, әмма аның конструктив булуын телибез», – дип билгеләп үтте Артём Здунов.
Быел конкурста 70тән артык кеше катнашты, алар конкурс комиссиясе хозурына 600гә якын эш тапшырдылар. Бу басма, электрон, радио һәм телевизион масскүләм мәгълүмат чараларында татар һәм рус телләрендә дөнья күргән журналист эшләре һәм медиа-проектлар.
Һәр номинация буенча җиңүчеләргә конкурс лауреатлары дипломнары һәм 20 мең сумнан алып 40 мең сумгача күләмдә акчалата премияләр тапшырылды.