Хезмәт хаклары арткан саен... эшлисе килми

Тиздән Татарстанның һәрбер төбәгендә сәнәгать мәйданчыклары төзелергә тиеш. Беренче чиратта, бу районнарда уңай инвестицион климат булдыру өчен кирәк.

Бу турыда Икътисад министрлыгы белән Сәнәгать һәм сәүдә министрлыгының киңәйтелгән коллегия утырышында Татарстан Президенты Рөстәм Миңнеханов белдерде. Чарада Татарстан премьер-министры Илдар Халиков та катнашты.

Коллегия рәсми рәвештә республика предприятиеләренең инновацион эшчәнлегенә багышланса да, Президентны республикада икътисади үсеш темплары акрынаю мәсьәләсе аеруча борчыды. Рөстәм Миңнеханов 2013 ел нәтиҗәләреннән канәгать булмавын белдерде һәм аларны «республика өчен лаеклы түгел» дип атады.

- Эзләсәк, Татарстанда икътисадый үсеш темплары акрынаюның меңләгән сәбәбен табып була. Тик әлеге аклануларны без кабул итмәячәкбез, чөнки республикада икътисад ел саен якынча 5-6 процентка үсәргә тиеш. Шулай булмаганда, төбәкне камилләштерү турында сүз дә булырга мөмкин түгел. Хәзергә без бу өлкәдәге уңышларыбыз белән теләсәк тә мактана алмыйбыз, - дип белдерде Рөстәм Миңнеханов үзенең чыгышында.

Тулаем продукт күләме буенча Татарстан – бишенче

Республиканың 2013 елдагы социаль-икътисади торышы белән чарада катнашучыларны Татарстанның икътисад министры Мидхәт Шаһиәхмәтов таныштырды.

2013 елда республикада икътисади үсеш башка еллар белән чагыштырганда шактый акрынайган. Дөнья икътисадындагы киеренке вәзгыять нәтиҗәсендә республикада җитештерелгән продукциягә ихтыяҗ кимү, һава торышының начар булуы аркасында авыл хуҗалыгы кеременең тиешле күләмдә булмавы, азык-төлеккә бәя арту - болар барысы да тулаем төбәк продукты үсешенең кимүенә китергән. Хәтта, нефтькә бәянең элеккечә үк югары булып калуы да әлеге вәзгыятькә уңай йогынты ясый алмаган. 2013 елда республикада тулаем төбәк продуктының күләме якынча 1,5 триллион сум тәшкил иткән. Әлеге күрсәткеч буенча Татарстан Россиядә бишенче урында тора.

Хезмәт җитештерүчәнлеген арттыру кирәк

Тагын бер аяныч күрсәткеч - хәзерге вакытта республикада хезмәт хаклары үсеше хезмәт җитештерүчәнлеген якынча ике тапкырга узып киткән. Мәсәлән, 2013 елда Татарстанда хезмәт хаклары якынча 9 процентка үскән, ә менә хезмәт җитештерүчәнлеге исә нибары 4 процентка гына арткан. Әлеге күрсәткеч республика икътисадында баланс югалу турында сөйли.

Хезмәт җитештерүчәнлеге үсүен тоткарлаучы иң мөһим факторлар буларак республикада җитештерелгән продукциягә ихтыяҗның түбән булуы, югары квалификацияле белгечләргә кытлык, тиешле җиһазларның җитмәве яисә инде шактый искергән булуы кебек проблемалар карала.

- Хезмәт җитештерүчәнлеге белән бәйле мәсьәлә системалы рәвештә хәл ителергә тиеш. Төп максат - көндәшлеккә сәләтсез тармак һәм предприятиеләрне ачыклау. Алар бүген-иртәгә банкротлыкка чыгарга мөмкин, - диде Президент.

Районнар кече һәм урта эшмәкәрлекне үстерергә теләми

Мидхәт Шаһиәхмәтов үзенең чыгышында республика районнарында кече һәм урта эшмәкәрлекне үстерү мәсьәләләренә аеруча зур басым ясады. Бу аңлашыла да, чөнки тулаем төбәк продукт күрсәткеченең дүрттән бер өлешен нәкъ менә бизнесның шушы төрләре барлыкка китерә. Министр районнарның күбесендә кече һәм урта бизнесны үстерүгә тиешле игътибар бирелмәвен ассызыклап узды.

- Республикада кече һәм урта эшмәкәрлеккә ярдәм программасы эшли. Тик кызганычка каршы, районнарда бу өлкәне үстерүгә һаман да шактый салкын карыйлар. Бизнесның әлеге төрләрен камилләштерү буенча эшчәнлек тиешле дәрәҗәдә алып барылмый, - дип сөйләде җитәкче.

Аның белән Рөстәм Миңнеханов та килеште. Президент фикеренчә, әгәр дә район башлыклары бу эшкә ныклап тотынмаса, кече һәм урта эшмәкәрлек үсә алмаячак.

Хәзерге вакытта Татарстанда муниципаль карамактагы 10 сәнәгать мәйданчыгы бар. Тик Татарстан Президенты фикеренчә, бу гына аз. Әлеге төр предприятиеләр һәрбер районда булырга тиеш.

- Шул рәвешле без районнарның эшмәкәрләрне җәлеп итү һәм өстәмә эш урыннары булдыру өлкәсендәге эшчәнлегенә бәя бирә алачакбыз. Мәсәлән, бүген республиканың 8 районында бу мәсьәләгә гомумән дә игътибар бирмиләр. Югыйсә, районнарда буш биналар шактый күп - шунда оештырыгыз мондый мәйданчыкларны. Аның өчен сездә барысы да бар, - дип район башлыкларына мөрәҗәгать итте Рөстәм Миңнеханов.

Президент районнарда уңай инвестицион климат булдыру мәсьәләсенә дә тукталды, бу максатны көнүзәк проблемалар рәтенә куйды. Җирле узидарә органнарына исә ул шушы эшчәнлекнең бердәм планын эшләргә боерды.