Татарстан Республикасы Хөкүмәте һәм AAOIFI ислам финанслары өлкәсендә хезмәттәшлекне үстерү максатларында Меморандумга кул куйдылар
Татарстан Республикасы Премьер-министры урынбасары — Татарстан Республикасы икътисад министры Мидхәт Рәфкать улы Шаһиәхмәтов Татарстан Республикасы Хөкүмәте исеменнән AAOIFI Химаячеләр советы рәисе шәех Ибраһим бин Хәлифә Әл Хәлифә белән үзара аңлашу турындагы Меморандумга кул куйды.
Меморандум үзара файдалы элемтәләрне ныгытуга һәм яклар арасында тәҗрибә уртаклашуга юнәлдерелгән киләчәк хезмәттәшлек кысаларын билгели. Документ Россиядә һәм БДБ илләрендә ислам финансларын үстерүгә, шулай ук халыкара стандартларның илкүләм финанс системаларына интеграциясенә ярдәм итүгә гомуми омтылышны чагылдыра.
Меморандум кысаларында яклар хезмәттәшлекнең түбәндәге юнәлешләре турында килештеләр:
• үзара кызыксыну уята торган өлкәләрдә үзара файдалы багланышларны үстерү һәм ныгыту;
• финанс һәм мәгариф оешмалары арасындагы элемтәләрне стимуллаштыру;
• якларның дәүләт территорияләрендә үзара кызыксыну уяткан өлкәләрдә эшчәнлек алып баручы вәкиллекләр яисә оешмалар төзү мөмкинлеген карау;
• ислам финансларын үстерүгә һәм иң яхшы тәҗрибәләр алмашуга юнәлдерелгән консультацияләр, семинарлар һәм конференцияләр уздыру.
Меморандумга кул кую ислам финанс институтлары белән практик хезмәттәшлек һәм тәҗрибә уртаклашу өчен ныклы нигез тудыра. Яклар ислам банкингы, финанс белеме һәм инструментларны стандартлаштыру өлкәсендә халыкара элемтәләрне үстерүгә ярдәм итәчәк