Татарстанда социаль бизнесны үстерү тәҗрибәсе белән уртаклаштылар
23-24 октябрьдә Татарстанда матбугат туры узды. Анда катнашучылар социаль предприятиеләрдә булдылар, ярдәм чаралары һәм социаль җайлаштырылган бизнесны үстерү программалары турында белделәр.
Чараны «Наше будущее» фонды оештырды (Мәскәү). Фонд Россиядә социаль эшкуарлыкны үстерүче беренче дәүләтнеке булмаган институт булып тора. Матбугат турында республика социаль эшкуарлары, Казан федераль университеты, ТР Икътисад министрлыгы, шулай ук «Наше будущее» фонды һәм массакүләм мәгълүмат чаралары вәкилләре катнашты.
Социаль предприятиеләрдә булудан тыш, матбугат турында катнашучылар Татарстанда социаль эшкуарлыкка кайда укырга, һөнәри квалификацияне кайда күтәрергә яки үз бизнесыңны эшләтеп җибәрүгә ярдәм чараларын кайдан алырга мөмкин булуын белделәр.
Делегация Татарстан Республикасы Икътисад министрлыгы карамагындагы Татарстан Республикасы Эшкуарлыкка ярдәм фондының «Минем бизнес» үзәгендә булды. Катнашучыларга Татарстанга финанс һәм финанс булмаган ярдәмнең актуаль программалары тәкъдир ителде. Шулай ук спикерлар халык өчен белем бирү программаларын үстерү мөмкинлекләре турында да фикер алыштылар.
Матбугат турында катнашучылар шулай ук Казан федераль университетының «Социаль эшкуарлык өлкәсендә белем бирү программалары» түгәрәк өстәлендә һәм Татарстанның социаль предприятиеләрендә дә булдылар.
Предприятиеләр исемлегенә Тимур Николаевның 2023 елда «Наше будущее» фондының #ЯМеняюМир конкурсында җиңүче булган «Диабетик көндәлеге» проекты, Виктория Рәхимованың «Технокласс» Казандагы робототехника һәм уйлап табу клублары челтәре, Диләрә Газизованың «Казаныш» Казандагы нейропсихологик диагностика һәм коррекцияләү гаилә мәгариф үзәге, Далия Гайнанованың сәламәтлек үзенчәлекләре булган балалар һәм өлкәннәр өчен җайлаштырылган кием GT Dress бренды керде. Исегезгә төшерәбез, бренд үсеп килүче «Үзебезнекеләрне бел» Бөтенроссия конкурсының «Инклюзия» номинациясендә өченче сезон җиңүчесе булды. Делегация шулай ук Наталья Власованың өй өчен уникаль чигүле җитен текстиль остаханәсендә булды, ул Татарстанда «Эшкуар әни-2024» федераль программасының төбәк этабында җиңүче булды.
Агымдагы елның октябренә Татарстан Республикасында профиль реестрында 123 социаль эшкуар теркәлгән.
Бизнеска ярдәм итү чаралары турында Бердәм элемтә үзәге номеры буенча белергә була: 8 (843) 524-90-90.