Ярты ел эчендә Татарстанның төп капиталына инвестицияләр күләме 660 млрд.сумнан артып китте

2025 елның беренче яртыеллыгы нәтиҗәләре буенча Татарстан Республикасының төп капиталына инвестицияләр күләме, Татарстан Республикасы Икътисад министрлыгы бәяләве буенча, 660 млрд сум тәшкил иткән. 

Инвестицияләр агымы республика территориясендә предприятиеләрнең эре масштаблы проектларын һәм инфраструктура проектларын гамәлгә ашыру нәтиҗәсендә мөмкин булды. Үсеш темпы 114% тан артык тәшкил итте.

«Инвестпроектларны гамәлгә ашыру тотрыклы социаль-икътисадый үсешне тәэмин итүче төп факторларның берсе булып кала. Бизнес алып бару өчен уңайлы шартлар тудыру буенча төбәкләрнең тырышлыгын бәяләү илкүләм рейтинг кысаларында башкарыла, анда Татарстан, үз позицияләрен саклап, 2 урынны алды», — дип билгеләп үтте Татарстан Республикасы Премьер-министры урынбасары — икътисад министры Мидхәт Шаһиәхмәтов.

Шулай ук министр ассызыклаганча, инвестицион климатны камилләштерү буенча эшне дәвам итәргә кирәк. 

Татарстан 10 ел дәвамында лидерлык позициясен тотрыклы саклый. Регион күрсәткән югары күрсәткечләр – Рөстәм Нургали улы Миңнеханов җитәкчелегендәге республиканың эзлекле сәясәте һәм эше нәтиҗәсе.

Татарстанның лидерлык позициясе ел саен инвестицияләр күләменең артуы һәм югары эшкуарлык активлыгы белән раслана.

Исегезгә төшерәбез, 2024 елның шул ук чорында Татарстанның төп капиталына инвестицияләр 521 млрд сумнан артык тәшкил итте, үсеш темпы – 124,3%. Төп үсеш предприятиеләрнең үз акчалары хисабына тәэмин ителде, аларның өлеше 66% чамасы тәшкил итте.