ТР Икътисад министрлыгында Татарстан икътисадының тотрыклы үсеше турында фикер алыштылар
Кичә Татарстан Республикасы Икътисад министрлыгында төбәк икътисадының тотрыклы үсешен тәэмин итү буенча эш төркеменең чираттагы утырышы булды. Чара Татарстан Республикасы Премьер-министры урынбасары – Татарстан Республикасы икътисад министры Мидхәт Шаһиәхмәтов рәислегендә тармак министрлыклары, ведомстволары, федераль хакимият органнарының территориаль органнары һәм муниципаль берәмлекләр вәкилләре катнашында узды.
Татарстан Республикасы Рәисе Рөстәм Миңнеханов тотрыклы икътисадый үсешнең төп факторы буларак кече һәм урта бизнесның әһәмиятен ассызыклады: «Без эшкуарлыкка ярдәм итү инструментларын киңәйтүне, муниципалитетларда яңа үсеш нокталары булдыруны һәм эшкуарлык культурасын формалаштыруны дәвам итәчәкбез».
Утырышта муниципалитетларда урнаштыру чараларын классификацияләү һәм эшкуарлыкны үстерү күрсәткечләре мәсьәләләре каралды. Илкүләм аккредитация институтының Федераль автоном учреждениесе генераль директоры урынбасары Александр Андринатьев Росаккредитациянең туристлык юнәлеше турында сөйләде, булган проблемаларны һәм аларны хәл итү ысулларын билгеләде. Ул искәрткәнчә, РФ субъектларына үзбәя узуны 2025 елның 1 сентябренә кадәр төгәлләргә кирәк.
Татарстан Республикасы Туристлык буенча дәүләт комитеты рәисе Сергей Иванов республикада урнаштыру чараларын классификацияләү һәм үзбәя узу процедурасы эшен оештыру турында мәгълүмат бирде.
ТР икътисад министрының беренче урынбасары Наталья Кондратова муниципаль берәмлекләрдә кече һәм урта эшкуарлык үсеше күрсәткечләре турында хәбәр итте. Тәкъдим ителгән мәгълүматларга караганда, республикада КУЭ өлкәсендә уңай динамика күзәтелә, әмма республикадагы уртача күрсәткечләрдән шактый артта калган районнар булуы ачыкланган.
Утырышта төркемнең 2025 елның август-декабрь айларына эш планы тәкъдим ителде. Чараны тәмамлап, Мидхәт Шаһиәхмәтов 2025 елда республиканың социаль-икътисадый үсеш күрсәткечләрен үтәү буенча системалы эшне дәвам итүнең мөһимлеге турында ассызыклады.