Депутатлар Татарстан бюджетын кабул итте

21 ноябрьдә Дәүләт Советы депутатлары парламентның чирттагы утырышына җыелды. Сессия Казан аэропортындагы һәлакәт корбаннарын бер минут тынлык белән искә алудан башланып китте.

Бүгенге утырышта төп игътибар 2014-2016 елларга республика бюджеты турындагы закон проектына кертелгән төзәтмәләр турында фикер алышуга бирелде. Чара Татарстан президенты Рөстәм Миңнеханов, Дәүләт Киңәшчесе Минтимер Шәймиев һәм Премьер-министр Илдар Халиков катнашында узды.

Бюджет турындагы закон проектына тәкъдим ителгән төзәтмәләр турында депутатларга Дәүләт Советының Бюджет, салымнар һәм финанс комитеты рәисе Морат Гаделшин сөйләде.

Аның сүзләренә караганда, беренче укылышта кабул ителгән закон проектына барлыгы 371 төзәтмә кертү тәкъдим ителгән, шуларның 286сы - Министрлар Кабинеты тарафыннан. КПРФ фракциясе депутатлары гына да закон проектына 53 төзәтмә кертү кирәк дип саный.

- Депутатлар тарафыннан тәкъдим ителгән төзәтмәләрнең барысы да Татарстанның Финанс министрлыгы тарафыннан яхшылап тикшерелде, Президент Рөстәм Миңнеханов та аларны игътибар белән карап чыкты. Төзәтмәләрнең кайберләре буенча актив эшчәнлек башланды инде – төрле идарә органнарына тиешле күрсәтмәләр бирелде, - дип билгеләп үтте комитет җитәкчесе үзенең чыгышында.

Морат Гаделшин белдергәнчә, закон проектында китерелгән барлык чаралар тиешле күләмдә каралган. Хезмәт хаклары, юл эшләре, милли сәясәтне тормышка ашыру, Бөек Ватан сугышы ветераннарын фатирлар белән тәэмин итү, экологик вәзгыять белән бәйле мәсьәләләрнең барысы өчен дә финанслар җитәрлек дип табылган.

Фикер алышу барышында депутатлар барлык төзәтмәләрнең 294ен кирәкле дип тапты һәм аларны хуплап тавыш бирде. Кире кагарга дип табылган 100гә якын төзәтмәнең һәрберсен утырышта катнашучылар яңадан тикшерде. Әйтергә кирәк, әлеге категориягә кертелгән төзәтмәләрнең күбесе, гадәттәгечә, КПРФ фракциясе вәкилләренә карый. Аларның тәкъдимнәре нигездә социаль мәсьәләләргә кагылышлы.

Шактый вакытка сузылган фикер алышулардан соң, депутатлар “2014-2016 елларга Татарстан Республикасы бюджеты турында”гы закон проектын кертелгән төзәтмәләре белән бергә берьюлы өч укылышта кабул итү урынлы булачак, дип тапты. Нәтиҗәдә, бу закон проекты тулысынча кабул ителде.

Кабул ителгән законда 2014 елга бюджет керем һәм чыгымнарының фаразлана торган гомуми күләме беркадәр арттырылды. Керем якынча 142,2 миллиард, ә чыгымнар - 151,8 миллиард сум булачак, дип билгеләнгән. Бюджет кытлыгы исә 9,7 миллиард сум тәшкил итәр, дип фаразлана. Дәүләт бурычына килгәндә, киләсе елга бу сан 87,4 миллиард сумга җитәчәк.

- Казна белән бәйле мәсьәлә шактый катлаулы. Аның керем белән бәйле өлешен караганда бик сак эш итү һәм бу эшчәнлеккә аеруча зур игътибар бирү кирәк. Вәзгыять чагыштырмача авыр булуга да карамастан, закон проектының социаль ягын уңышлы тормышка ашырып булыр дип ышанам, - дип белдерде Татарстанның Дәүләт Советы рәисе Фәрит Мөхәммәтшин үзенең чыгышында.

Җитәкче җаваплы идарәчелекләргә әлеге закон проектын тормышка ашыруда уңышлар теләде.