Эшләр бара яхшыга

Киләсе елга Татарстан кече һәм урта эшмәкәрлеккә ел башыннан ук ярдәм кулы сузмакчы. Әгәр моңа кадәр эшкуарлар республиканың “Лизинг-грант” программасында июль-август айларыннан башлап кына катнаша алсалар, 2014 елда акчалата ярдәм беренче кварталдан ук бирелә башлар дип көтелә.

Әлеге яңалыкны журналистларга ТРның икътисад министры урынбасары, Эшмәкәрлеккә яр¬дәм итү департаменты җитәкчесе Рөс¬тәм Сибгатуллин җиткерде. Аның сүзләренә караганда, болай эшләү авыл хуҗалыгы өлкәсендә эш алып барган эшмәкәрләр өчен отышлы булачак. Ягъни “Лизинг-грант” программасы нигезендә алар үзләренә кирәкле техниканы язгы чәчүгә керешкәнче юнәтә алачак. Моңа кадәр исә әлеге мөмкинлек елның икенче яртысында гына бирелә иде. Һәм бу аграр бизнес өлкәсендә берни¬кадәр тоткарлыклар китереп чыгаруга сәбәпче булды.

Республиканың кече һәм урта эшмәкәрлеккә ярдәм итү программасы елдан-ел камилләшә баруын уңай факт буларак билгеләп үтмичә булмый. Әгәр программа старт алган 2011 елга кайтсак, ул вакытта үз бәхетен сынап карарга теләгән эшмә-кәрләрнең күпчелеге грант алуга катнашу заявкасын да, бизнес-проектларын да үзләре төзи белмиләр иде. Шул сәбәпле, хаталы документ хуҗалары конкурстан төшеп кала бардылар. Хәзер бу җитеш¬сезлекләр бете¬релгән һәм комиссия конкурска килгән бер генә проектны да игътибарсыз калдырмаган.

Быел эшмәкәрлеккә ярдәм итү программасы өчен бүлеп бирел¬гән акча да артты – 2,6 миллиард сум. Шуның 33 проценты эшмә¬кәрләргә финанс ярдәме өчен, калган 67 проценты эшмә¬кәрлек инфраструктурасы өчен тотыла. “Ли¬зинг-грант” программасына быел 800 эшмәкәр дәгъва кылган булган, бәхет шуларның 742сенә елмайган (узган ел исә җиңүчеләр исем¬легендә 540 эшмәкәр иде). Шу¬ларның өчтән бере авыл хуҗалыгы өлкәсендә эш алып бара. Төзелеш материаллары, азык-төлек продукциясе җитештерү¬челәр, полимерларны эшкәртү¬челәр дә шактый. Аларга 740 миллион сум күләмендә финанс ярдәме күрсәтеләчәк. Тик грант күләме үзгәрергә дә мөмкин икән әле. Рөстәм Сибгатуллин сүзләренә караганда, бәйгенең акчалата ярдәме өлеше тулысынча тәмамланмаган әле – “Лизинг-грант”¬ һәм инновацияләр юнәле¬шендәге программаларны ахырга җиткерәсе бар.

2013 елда кече һәм урта эш¬мәкәрлек белән шөгыль¬ләнүче¬ләрдән субсидияләр алуга гаризалар кабул итү 30 октябрь көнне тәмамланды. Хәзер комиссия әгъзалары эшләрне тикшерү белән шөгыльләнә.
– Безгә килгән проектлар арасында шактый кызыклылары һәм үзенчәлеклеләре бар. Әйтик, полиуретан нигезендә эшләнгән җы¬лыту материалы җитештерү проекты, ракка каршы вакцина эшләп чыгару буенча проект, яңа төрле урам яктырткычлары җитештерү проекты... Быел көндәшлек көчле, шуңа да үз эшләрен яклауга киләчәк эшмәкәрләргә чыгыш ясарга яхшылап әзерләнергә киңәш итәм, – диде Рөстәм Сибгатуллин.