Яңа ел ярминкәсендә Татарстанның үзмәшгульләренә 100 бушлай сәүдә урыны биреләчәк

«Кече һәм урта эшкуарлык» илкүләм проекты буенча ярминкәгә заявкаларны «Минем бизнес» төбәк үзәге кабул итә. Ул 18 декабрьдә Б.Рәмиев исемендәге IT-паркта узачак. 

Чара быел ярминкәләр сериясен төгәлләячәк. Быел «Кече һәм урта эшкуарлык» илкүләм проекты буенча оештырылган 14 ярминкә уздырылды. Анда ярты мең кеше катнашты. 

«Татарстан Хөкүмәте һәм Татарстан Республикасы Икътисад министрлыгы төбәк үзенчәлеген чагылдырган республика үзмәшгульләре продукциясен алга сөрү өчен ел саен «Татарстан мин инде ул» бренды белән яңа елда зур ярминкәләр үткәрә. Мондый формат үзмәшгульләргә үзләре һәм үз эшләре турында сөйләргә, яңа клиентлар һәм фикердәшләр табарга ярдәм итә. Алар өчен катнашу бушлай», - дип сөйләде икътисад министрының беренче урынбасары Наталья Кондратова. 

Түләүсез җиһазландырылган сәүдә урыннарында бөтен республикадан үзмәшгульләр ярминкә кунакларына бәйрәм бүләкләре - шоколад, бизәнү әйберләре, уенчыклар һәм милли колоритлы киемнәр, көндәлекләр, открыткалар һәм башкаларны тәкъдим итәчәк.

Шулай ук һөнәри керемгә салым түләүчеләр өчен республика эшкуарлыкны үстерү институтлары чаралар комплексын гамәлгә ашыра. Бу финанс ярдәме чаралары – микрозаймнар, поручительлекләр, шулай ук продукцияне маркетплейсларда, социаль челтәрләрдә алга этәрү, проектларны үстерү һәм масштаблаштыру буенча укыту программалары һәм башкалар. 

Ярминкәдә катнашу өчен гаризаны МСП.РФ цифрлы платформасында сылтама аша калдырырга мөмкин.

Ярминкәләрдә катнашу мәсьәләләре буенча консультацияне «Минем бизнес» үзәгенең кайнар линия телефоны буенча алырга мөмкин: +7(843)524-90-90.