И.Халиков: “Министрлар яңгыраткан фараз күрсәткечләре киеренкелек тудыра һәм көтелмәгән хәлләргә әзер булып торуны таләп итә”

Бүген республика парламентында “Татарстан Республикасының 2014 елга һәм 2015 һәм 2016 елларның планлы чорына бюджеты турында” ТР законы проекты буенча парламент тыңлаулары узды. Парламент тыңлауларында ТР Премьер-министры Илдар Халиков та катнашты.
Ул кайбер мәсьәләләр буенча фикерләрен белдереп, икътисади үсеш динамикасының акрынаюы күзәтелүен билгеләп үтте. “Министрлар үз чыгышларында яңгыраткан фараз күрсәткечләре киеренкелек тудыра һәм көтелмәгән хәлләргә әзер булып торуны таләп итә. Без моны бик яхшы аңларга тиеш”, - диде Татарстан Хөкүмәт башлыгы.
Илдар Халиков аңлатып киткәнчә, республика бюджеты тулаем алганда Россия Федерациясе бюджеты җирлегендә формалаштырыла. “Мин һәм коллегаларым икътисадның 2014 елда ни сәбәпле сизелерлек үсәргә тиешлеген әйтә алмый. Моның өчен нигез дә юк. Әлеге процессларга гомумдөнья һәм Россиякүләм көйләгечләр генә йогынты ясаса гына инде”, - диде ул.
Республиканың бюджет резервларына килгәндә, Хөкүмәт башлыгы куандырмады: резервлар юк. Бюджетның фараз күрсәткечләре дә уртача оптимистик рухта.
Шулай да Илдар Халиков Россия Президентының май аенда чыккан Указларының, һичшиксез, үтәләчәген белдерде. Бюджетка авырлык килгән очракта да, бу юнәлеш тормышка ашырылачак. Монда сүз бюджет өлкәсендә эшләүчеләрнең хезмәт хакын арттыру турында бара.
Ел саен депутатлар ятим балаларны торак белән тәэмин итү мәсьәләсен күтәреп чыга. Башка елларны парламентның Социаль сәясәт комитеты рәисе Светлана Захарова бу проблемага игътибарны юнәлтсә, быел депутат Рифат Ганибаев сорау бирде. Илдар Халиков, бу сорауга җавап биреп, әлеге максатларга федераль бюджеттан да, республика бюджетыннан да акча каралуын билгеләп үтте. Барлык сумма – 246 млн сум. Дүшәмбегә быел ел ахырына кадәр торак алачак балалар саны тәгаенләнеп бетәчәк. Сүз 220-230 бала турында бара.
Премьер-министр республика максатчан программаларын тормышка ашыруга кагылышлы сорауга аңлатма биреп, 2014 елда программаларның яңалары да барлыкка киләчәген, бер өлеше бетереләчәген хәбәр итте. ТР Финанс министры Радик Гайзатуллин билгеләп үткәнчә, 2014 елда социаль яктан әһәмиятле 23 программа эшләячәк һәм моның өчен 6,5 млрд. сум акча каралачак. Әмма иң мөһиме - бу мәсьәлә түгел, ә программаларның нәтиҗәле эшләве. Илдар Халиков сүзләренә караганда, бу өлкәдә шикаятьләр бар.