Татарстанның креатив индустрия һөнәрчеләре һәм бизнесы «Ел остасы-2024» конкурсында катнаша ала
РФ Икътисадый үсеш министрлыгы «Минем бизнес» үзәкләре базасында һәм Ярмарка Мастеров маркетплейсы − Livemaster һөнәрчеләр һәм креатив индустрия вәкилләре өчен конкурс игълан итә. Татарстан эшкуарлары 2024 елның 25 октябренә кадәр катнашуга гариза бирә ала.
«Россиядә креатив индустрияләр ил икътисадына сизелерлек өлеш кертә: аларның тулаем эчке продукттагы өлеше 4,9% тәшкил итә. Бүген илдә креатив өлкәдән якынча 750 мең компания исәпләнә, һәм сан елдан-ел арта. Аерым алганда, бирегә мода, дизайн, халык сәнгать кәсепләре индустриясе эшкуарлары, ювелирлар, рәссамнар, һөнәрчеләр керә. Мондый эшкуарлар өчен икътисадый үсеш министрлыгы һәм Ярмарка Мастеров маркетплейсы конкурс инициативасы белән чыкты. Эшләнмәләр 14 номинациядә бәяләнәчәк, шул исәптән аерым номинацияләр гаилә остаханәләре, милли мотивлы эшләнмәләр авторлары, сәламәтлек мөмкинлекләре чикләнгән осталар өчен булачак», – дип хәбәр итте РФ икътисадый үсеш министры урынбасары Татьяна Илюшникова.
Авторлар һөнәр төрләре буенча номинацияләрдә катнаша ала – курчаклар һәм уенчыклар, керамика, бизәнү әйберләре, йон һәм күн, агач эшләнмәләр, рәсем һәм рәсем сәнгате, тукымадан эшләнгән әйберләр, чигү, бизәкләү, милли сувенир. Конкурска шулай ук махсус тематик номинацияләр дә кертелгән. Мәсәлән, кием һәм аяк киеме дизайнерлары халык мотивларын кулланып «Рус стиле» бүлегенә гариза бирә алачак. Гаилә остаханәләре үз эшләнмәләрен «Гаилә эше» номинациясендә, ә сәламәтлек мөмкинлекләре чикләнгән осталар «Инклюзия» номинациясендә тәкъдим итә алачак.
Конкурста кулдан эшләнмәләр ясаучы эшкуарлар, үзмәшгульләр һәм физик затлар катнаша ала. Ярмарка Мастеров маркетплейсында гамәлдәге кибет булганда, заявканы конкурс сайтында бирергә кирәк. Әгәр кибет юк икән яки ул актив булмаса – Татарстан Республикасының «Минем бизнес» үзәгенә мөрәҗәгать итәргә яки заявканы онлайн җибәрергә була. Бу очракта катнашучы өстәмә бонус: товарны Ярмарке Мастеровта каталогта күрсәтүгә реклама пакеты алачак.
Җиңүчеләр жюри тарафыннан һәм сайтка керүчеләр тарафыннан тавыш бирү юлы белән билгеләнәчәк. Иң яхшы эшләрнең авторлары бүләкләр һәм үз эшләнмәләрен күрсәтү өчен мөмкинлекләр алачак.
Конкурста катнашу – бушлай. Заявка бирү вакыты – 2024 елның 25 октябренә кадәр.
Исегезгә төшерәбез, «Кече һәм урта эшкуарлык» илкүләм проекты кысаларында Татарстан бизнесына ташламалы шартларда ярдәм күрсәтелә.