“Форд” компаниясенә нигез салучының оныкчыгы Алабугада булды

Бүген “Алабуга” МИЗда “Форд-Соллерс” уртак предприятиесендә тулы цикл технологиясе буенча җыелган беренче Ford Kuga кроссоверы конвейердан төште.
Тантаналы чарада ТР Премьер-министры Илдар Халиков, Ford Motor Company директорлары советы рәисе, компаниягә нигез салучы Генри Фордның оныкчыгы Билл Форд, “Соллерс” ААҖ генераль директоры Вадим Швецов, Алабуга районы башлыгы Геннадий Емельянов катнашты. Шулай ук анда Татарстан Республикасы икътисад министры урынбасары Артем Здунов катнаштты.
“Мин бүгенге вакыйганың сәбәпчеләре булган кешеләргә ТР Президенты исеменнән рәхмәт сүзләрен әйтәсем килә. Бу минем өчен дә үзенчәлекле, чөнки “Соллерс” компаниясенең ТР белән хезмттәшлеге минем күз алдымда үсте, һәм минем күз алдымда Чаллыда һәм Алабугада уникаль заводлар төзелде. Бүгенге вакыйга ул вакытта тормышка ашарлык матур хыял, без дөньяда иң яхшы маркалы заманча автомобильләрне күзаллаган хыял кебек кабул ителде. Без бик күп уникаль заманча эш урыннарын, татарстанлыларга һәм россиялеләргә дөнья дәрәҗәсендәге заманча компаниядә эшләү мөмкинлеген күзаллаган хыял”, - дип билгеләде Илдар Халиков, яңа производствоның башлануы белән котлап.
“Россия – “Форд” бренды өчен иң әһәмиятле базарларның берсе, һәм безнең әлеге төбәктә - бик амбициоз планнар”, - дип сөйләде тантананың махсус кунагы Билл Форд. Аның сүзләренчә, тиздән СП конвейерына тагын ике модельне: “Алабуга” МИЗда - Ford Edge һәм Яр Чаллы заводында – “В” класслы Ford EcoSport кроссоверын - куячаклар. Моның өчен өстәмә эш урыннары булдырылачак. Мәсәлән, Алабугадагы заводта тагын 500 хезмәткәр таләп ителәчәк, бүген монда 1500 кеше эшли.
Билл Форд сүзләренчә, аның гаилә заводында җитештерлә торган автомобильләрнең аерым бер модификациясенә бәйләнеше юк: “Минем һөнәремнең үзенчәлекле ягы шунда: миңа һәр көн яңа машина руле артына утырырга туры килә. Әлбәттә, минем Ford Kugaны йөртү тәҗрибәм бар. Аеруча миңа анда кыш көне Мичиган штатында йөрергә ошый”, - дип билгеләде ул.
Исегезгә төшерик: Ford Kuga Ford Explorerадан соң инде икенче кроссовер, ул башка модификацияләрдән аермалы буларак, тулы цикл технологиясе буенча җыела. Бөтен дөньяда мондый производство бары ике җирдә: Алабугада һәм Штатта.
Бүген заводта әйтеп кителгән автомобильләрдән кала тагын Ford S-MAX, Ford Galaxy, Ford Transit автомобильләрен җыялар.