Җинаятьчеллекне кисәтү – парламент комитеты контролендә

11 октябрьдә Законлылык һәм хокук тәртибе комитеты утырышы булды. Анда якын киләчәктәге өч елга республика бюджеты проеты һәм хокук бозуларны кисәтү буенча кабул ителгән закон актларының үтәлеше турында сорау каралды.

Республиканың социаль-икътисадый үсеше фаразы белән депутатларны ТР Икътисад министры Мидхәт Шаһиәхмәтов таныштырды. Ул билгеләп үткәнчә, тулаем бөтендөнья икътисады кичерә торган кыенлыклар аркасында ил икътисадының үсеш темплары да тискәре йогынтыга дучар булачак. Министр, проектка бюджетның чыгымнар өлешен арттыруга китерә торган тәкъдимнәр керткәндә, сак һәм реалистик булырга чакырды.

ТР финанс министры урынбасары Алла Анфимова 2014 елга һәм якын киләчәккә республика бюджеты проектын тәкъдим итте. Документ буенча, 2014 елда Татарстан бюджетының керем өлеше 148,7 млрд сум, чыгымнары 144,9 млрд сум тәшкил итә. Шулай итеп, еллык бюджет дефициты 5,4 млрд сум күләмендә планлаштырыла. Алла Анфимова Законлылык һәм хокук тәртибе комитетының эшчәнлегенә кагылышлы сорауларга конкрет тукталды.

Аннары “2014 елга һәм 2015-2016 еллар план чорына ТР бюджеты” турында ТР законы проекты карап тикшерелде. Фикер алышуларга йомгак ясап, комитет рәисе Шакир Яһудин документны хупларга тәкъдим итте. Утырышта катнашкан депутатлар закон проектны беренче укылышта кабул итәр өчен Дәүләт Советына кертү турында карар кылдылар.

ТР Эчке эшләр министрлыгының участок полиция уполномоченныйлары һәм балиг булмаганнар эшләре буенча бүлекчәләрнең эшчәнлеген оештыру бүлеге начальнигы урынбасары Лариса Осипова “ТРда хокук бозуларны кисәтү турында” ТР Законы үтәлеше турында мәгълүмат бирде. Ул билгеләп үткәнчә, Татарстан парламенты кабул иткән законнар һәм республиканың башка хокукый-норматив актлары бу юнәлештә эшне нәтиҗәле һәм үз вакытында башкарырга мөмкинлек бирә.”Нәтиҗәләр бар, - дип өстәде ул. – Һәм алар булачак та. Бары тик максатчан эшләргә генә кирәк. Полициядә исәпкә куелган һәр кеше белән даими рәвештә конкрет эш алып барырга”.

Бу сорау буенча кабул ителгән карар белән комитет республика хөкүмәтенә мәктәпләрдә өстәмә рәвештә психологлар штатлары куертергә һәм аларның эш урыннарын җиһазларга тәкъдим итә.

Ике закон проектын комитет, беренче һәм өченче укылышта кабул итү өчен, Дәүләт Советына кертергә карар кылды:
- “ТРда гражданнарга түләүсез юридик ярдәм күрсәтү турында” ТР Законының 12 статьясына үзгәрешләр кертү хакында”;
- “ТР Иҗтимагый палатасы турында” ТР Законына үзгәрешләр кертү хакында”.

Утырыш эшендә ТР Юстиция министры Мидхәт Корманов, ТР Иҗтимагый палатасы рәисе Анатолий Фомин, министрлыклар, җәмәгать оешмалары һәм хокук саклау органнары вәкилләре катнашты.