«1764» ташламалы кредит федераль программасы кысаларында финанс ярдәме күләме буенча Татарстан лидерлар арасында

2024 елның беренче кварталы нәтиҗәләре буенча КУЭ субъектлары «1764» ташламалы кредит федераль программасы кысаларында 5,1 мең кредит килешүе төзегән. Татарстан әлеге программа буенча кредитлар бирү буенча ТОП-10 регионнар исемлегенә керде.

Кече бизнес, шул исәптән микропредприятиеләр тарафыннан ташламалы кредитларның гомуми күләменнән 70% җәлеп ителгән, уртача 30%. Кредитлар буенча уртача үлчәү ставкасы еллык 13,4% тәшкил итә.  «1764» программасы Россия Президенты  Владимир Путин инициативасы белән оештырылган «Кече һәм урта эшкуарлык» илкүләм проекты кысаларында гамәлгә ашырыла, аны РФ Хөкүмәте Рәисе урынбасары Александр Новак алып бара.

«2024 елның беренче кварталында гына да бизнес «1764» программасы кысаларында ташламалы кредитлар рәвешендә 130 млрд сумнан артык акча алган. Инструмент өстенлекле тармаклар – югары мультипликатив эффекты булган тиз үсеш алучы өлкәләрнең үсеш тенденциясенә көйләнгән. Бу, мәсәлән, эшкәртү производстволары, технология компанияләре, туризм. Барлык кредитларның 70% артыгы кече бизнеска туры килә, шул ук вакытта без микропредприятиеләр арасында инвестиция кредитларының үсешен күзәтәбез. Димәк, максатчан дәүләт ярдәме дөрес төзелгән һәм кечкенә компанияләргә үсәргә һәм масштаблы булырга мөмкинлек бирә», – дип хәбәр итте РФ икътисадый үсеш министры Максим Решетников.

«1764» программасын гамәлгә ашыруда 90 банк катнаша. Эшкуарлар финанслауның иң зур күләмнәрен Сбербанк ГАҖ, ВТБ Банк (ГАҖ), «ПРОМСВЯЗЬБАНК» ГАҖ, «СОВКОМБАНК» ГАҖ, «АЛЬФА-БАНК» ГАҖ аша алганнар.

«1764»  программасы буенча барлык кредит акчаларының яртысыннан артыгы (68,4 млрд.сум) – эшкәртү производствосындагы эшкуарларга, 17 млрд.сумнан артыгы – транспорт компанияләренә һәм склад комплексларына, 7,6 млрд.сумы – авыл хуҗалыгы компанияләренә, 5,2 млрд.сумы кунакханә бизнесына бирелгән.

Россия Банкы мәгълүматлары буенча, кайбер сәнәгать тармакларында «1764» программасы буенча кредитлар өлеше ел башыннан бирле КУЭ субъектларына бирелгән кредитларның гомуми күләменең 25% артыгын тәшкил итә. Кәгазь һәм кәгазь әйберләр җитештерү өлкәсендә ташламалы кредитлар өлеше – 33 процентка, дарулар һәм медицина материаллары – 32 процентка, кием 27 процентка җиткән.

Эшкуарлар әйләнешле акчаларны тулыландыруга 86 млрд.сумнан артык акча җәлеп иткән, шул исәптән эшкәртү производствосында – 25,1 млрд.сум (азык-төлек продуктлары, резин һәм пластмасса әйберләр, әзер металл әйберләр, машиналар һәм җиһазлар җитештерү). Инвестицион проектларны гамәлгә ашыруга КУЭ субъектларына 35,6 млрд.сум акча бирелгән, шуларның 8 млрд.сумга якыны – транспортлау һәм саклау өлкәсендә (коры җир һәм торба үткәргеч транспорты эшчәнлеге, склад хуҗалыгы).

Шул ук вакытта кече һәм урта предприятиеләр өчен 2024 елның беренче кварталында әйләнешле максатларга ташламалы заем акчаларын җәлеп итү хас булса (кече предприятиеләрдә мондый кредитлар өлеше 72% тәшкил иткән, уртачаларда – 86%), микропредприятиеләр арасында инвестиция кредитларына ихтыяҗның артуы күзәтелгән (40% артык).

Дәүләт ярдәме белән КУЭ субъектлары җәлеп иткән кредитларның уртача күләме 30-46 млн.сум тәшкил итә.

«1764» ташламалы кредит программасы «Кече һәм урта эшкуарлык» илкүләм проекты кысаларында эшли башлады. Ул кече һәм урта бизнес өчен ташламалы субсидия булып тора, аның ярдәмендә эшкуарлар түбән ставкалы кредит ала ала. Кредитларны инвестиция максатларына, әйләнештәге акчаларны тулыландыруга һәм рефинанслауга алырга мөмкин.