Узган ел йомгаклары буенча Татарстанда төп капиталга инвестицияләр күләме триллион сумнан артып киткән
Бу санны ведомствоның киң вәкиллекле йомгаклау утырышында Татарстан Республикасы вице-премьеры – икътисад министры Мидхәт Шаһиәхмәтов әйтте.
2023 ел йомгаклары буенча төп капиталга инвестицияләр күләменең үсеш темпы 111% дәрәҗәсендә тәэмин ителгән. Икътисадның барлык тармакларында диярлек уңай динамика билгеләнә. Төп үсеш предприятиеләрнең үз акчалары хисабына тәэмин ителә, аларның өлеше 70% артык тәшкил итә.
«Инвестицион активлыкны саклау икътисадның тотрыклы үсешен тәэмин итү өчен мөһим фактор булып тора», – дип ассызыклады спикер.
Министр шулай ук шәхси инвестицияләрнең үсеш темпларын саклап калу өчен түбәндәгеләрне кирәк булуын билгеләде:
- институциональ мохитне алга таба үстерү һәм инвестицион климатны яхшырту;
- инвесторлар өчен шартларның тотрыклылыгы,
- проектлар өчен инфраструктураны алдан ук әзерләү,
- технологик яктан катлаулы проектларга инвестицияләрне стимуллаштыру.