Социаль проектларга - 35 миллион сум

Татарстанның коммерцияле булмаган оешмалары быел 35 миллион сумлык дәүләт ярдәменә өмет итә ала. Федераль һәм республика бюджетында социаль юнәлештәге иҗтимагый мөһим проектларны тормышка ашыруга шул күләмдә акча каралган.


Бүгенге көндә Татарстанда 6 меңнән артык коммерцияле булмаган оешма теркәлгән. Шуларның 350гә якыны социаль эшчәнлек белән шөгыльләнә. Бер төркем дәүләт функцияләрен башкаруны гражданлык җәмгыяте институтларына йөкләп кенә кайбер өлкәләрдә югары нәтиҗәләргә ирешеп була, дип санала. Шуңа да мондый оешмаларга дәүләт теләктәшлек күрсәтә.

Максаты керем алу булмаган фонд һәм ассоциацияләрнең эшчәнлегенә төп ярдәм булып, әлбәттә, төрле грантлар тора. Ел саен мондый оешмалар Россия Президенты, Татарстан Икътисад министрлыгы, Хезмәт, халыкны эш белән тәэмин итү һәм социаль яклау министрлыгы игълан иткән бәйгеләрдә катнашып, үз проектларына акча юнәтергә тырыша.

Быел Россия Президенты грантларын отучылар билгеле инде. Бәйгедә җиңүчеләр арасында Татарстанннан 18 социаль эшчәнлек алып баручы оешма бар. Федераль бюджеттан аларга 26 миллион сум акча биреләчәк.

10 сентябрьдә исә Татарстан Икътисад министрлыгы бәйге игълан итә, дип хәбәр итте бүгенге матбугат очрашуында министрның беренче урынбасары Сәрия Сираҗиева. Социаль мөһим проектларны тормышка ашыруга үзеннән өлеш керткән коммерцияле булмаган оешмаларга 25 миллион сум күләмендә акча каралган. Фондлар, ассоциацияләр һәм башка шундый оешмалар үз проектларын 13 юнәлеш (физик мөмкинлекләре чикле булган кешеләрне хезмәткә яраклаштыру, сәламәт яшәү рәвешен пропагандалау, ятимнәргә ярдәм итү һ.б) буенча тәкъдим итә ала. Бәйге турында тулырак мәгълүматны министрлык сайтында алырга була.

Шулай ук агымдагы елда Татарстан Министрлар Кабинеты грантларына республика конкурсын уздыру өчен 10 миллион сум акча бүлеп бирелгән. Грант оту өчен коммерцияле булмаган оешмалар үз проектларын Татарстан Хезмәт, халыкны эш белән тәэмин итү һәм социаль яклау министрлыгына юллый ала.

Татарстан иҗтимагый палатасы җитәкчесе Александр Фомин сүзләренчә, җиңүчеләр ноябрьнең икенче яртысында узачак коммерцияле булмаган оешмаларның икенче форумында билгеле булачак.