Якын киләчәктә республикада 14 сәнәгый мәйданчык пәйда булуы ихтимал

ТР Икътисад министрлыгы муниципаль берәмлекләрдә сәнәгый парклар булдыру өстендә эш алып бара. Киләсе елга Татарстанда яңа сәнәгый паркларның саны 14 кә якынлашуы бик ихтимал. Нәкъ менә 14 муниципаль берәмлектә әлеге юнәлештәге проектлар азагына якынлашып килә дияргә була. Бу хакта бүген “Татмедиа” Республика матбугат һәм гаммәви коммуникацияләр агентлыгында узган брифингта билгеле булды. Матбугат очрашуында ТР Икътисад министры урынбасары – Эшмәкәрлек үсешенә ярдәм департаменты башлыгы Рөстәм Сибгатуллин, ТР Эшмәкәрлек үсешенә ярдәм үзәге директоры Артем Наумов, “Химград” технополисы белән идарә итүче – “Идея Капитал” идарәсе ширкәте” ААҖ генераль директоры Айрат Гыйззәтуллин катнашты.
Рөстәм Сибгатуллин Татарстанда сәнәгый мәйданчыклар санын арттыруга зур игътибар юнәлтелүен ассызыклады. Аеруча җитештерүче сәнәгать үсешенә зур басым ясала. Аның әйтүенчә, июль аенда сәнәгый парклар булдыру темасына ТР Икътисади министрлыгында берничә киңәшмә үткәрелгән. Аның эшендә 34 муниципаль берәмлек башлыгы катнашкан. Әмма якын арада сәнәгый парклар булдыру турындагы сүз әлегә 14 муниципаль берәмлеккә кенә кагыла. Болар түбәндәгеләр: Яшел Үзән, Теләче, Яр Чаллы, Лениногорски, Саба, Бөгелмә, Менделеевски, Алабуга, Кама Аланы, Әлмәт, Зәй, Биектау районнары. Аларның кайберләрендә төрле сәнәгый парклар, технопарклар инде гамәлдә, калганнарының 2014 нче елда файдалануга тапшырылуы ихтимал. Аларның проектларына Россиянең Икътисади үсеш министрлыгы экспертлары бәя бирәчәк. Яңа сәнәгый мәйданчыклар дәүләтнеке дә, хосусый да була ала.
“Сәнәгый парк булдыру проектына әле тотынмаган район җитәкчелеге белән аңлату эшләре, сөйләшүләр алып барыла. Җир мәйданы бүлеп бирелә, резидентлар барлыкка килгән очракта, сәнәгый мәйданчыкның эшкә сәләтле булып танылуы аңлатыла. “Муниципалитетларның мәнфәгатьләрен, ихтыяҗларын РФ Икътисади үсеш министрлыгына җиткерергә тырышабыз”, - ди Рөстәм Сибгатуллин.
Технопарк индустриаль парктан нәрсәсе белән аерыла дигән сорауга, ТР Икътисад министры урынбасары: “Технопаркларның “кече энесе” саналган сәнәгый парклар, кагыйдә буларак, муниципаль берәмлекләр территорияләрендә урнаша”, - дип җавап бирде. Аның сүзләренә караганда, быел республиканың “Химград”, КИП “Мастер” кебек технопарклары РФ Икътисади үсеш министрлыгы экспертларында хуплау табып, ярдәмгә ирешә алган. Ә “Теләче” һәм “Саба” сәнәгый парклары ярдәмнән мәхрүм калган. “Киләчәктә без муниципаль районнардагы сәнәгый паркларны да игътибар үзәгенә кертергә омтылабыз”, - дип белдерде Рөстәм Сибгатуллин. “Сәнәгый мәйданчыклар булдыру эшмәкәрлекнең милек формалары белән тигез колачлау мәсьәләсендә ярдәм итеп, авыл районнары бюджетын дифференциацияләүгә мөмкинлек бирәчәк”, - дип саный ул.
“Бүгенге көндә Татарстанда дәүләт технопарклары һәм технополислары кебек милекләтә ярдәм объектлары булдырылды, башлап кына җибәрүче предприятиеләр өчен җиһазланган мәйданнарны арендалауның ташламалы шартлары белән дәүләт бизнес-инкубаторлары челтәре гамәлдә. Республикада шулай ук хосусый җитештерү мәйданнары һәм технопарклар да эшли”, - дип җөпләде Рөстәм Сибгатуллин. Аның фикеренчә, әлеге инфраструктура бизнесны бер мәйданда кластер принципы, кооперация һәм субконтрактация буенча туплау өчен этәргеч булып хезмәт итте.