“Химград” технополисы резидентларының агымдагы елда 14 миллиард сумга якын продукция җитештерүе фаразлана

Хәзер технополиста 200 ләп резидент исәпләнә, 2016 нче ел азагына аларның саны 300 гә җитәр дип ниятләнә. Бүгенге көндә “Химград” технополисы уңышлы сәнәгый мәйданчык булып санала. Әлеге заманча индустриаль парк, территориясендә химия һәм полимер продукция эшкәртү өлкәсендә кече һәм урта компанияләр урнашуы өчен кулай. Аның тәҗрибәсе үрнәк буларак Татарстанда гына түгел, Россия Федерациясендә дә кулланыла. Күптән түгел ул оешуына 7 ел тулуны билгеләп үтте. Бу хакта бүген журналистларга Республика матбугат һәм гаммәви коммуникацияләр агентлыгында узган брифингта ТР Икътисад министры урынбасары – Эшмәкәрлек үсешенә ярдәм департаменты башлыгы Рөстәм Сибгатуллин ассызыклап узды.
“Химград” технополисы белән идарә итүче – “Идея Капитал” идарәсе ширкәте” ААҖ генераль директоры Айрат Гыйззәтуллин әйтүенчә, технополиста соңгы вакытта инженер челтәрне реконструкцияләү, канализация челтәрен алмаштыру һәм юл салу буенча эшләр башкарылган. 7,5 миллиард сумга якын акча шушы мәйданчыкка хосусый инвестицияләр сыйфатында җәлеп ителгән. Былтыр резидентларның салым кертемнәре 2 миллиард сумнан артып киткән. Бүгенге көндә территориясендә 200 дән артык ширкәт теркәлгән, 6,5 меңләп эш урыны тудырылган. “Химград” технопаркы резидентлары агымдагы елда 14 миллиард сумга якын продукция җитештерәчәк, дип фаразлана. 2012 нче елда җитештерелгән продукция күләме 11 миллиард сумнан артык булган иде. Дүртенче нче ел рәттән үсеш күрсәткечләрен күрсәтергә телибез. 25-30 процентка тәңгәл үсеш яңа производстволар хисабына тәэмин ителә. Ел азагына кадәр гамәлгә ашырырга уйланган тагын берничә проект бар әле”, - дип белдерде Айрат Гыйззәтуллин.