Индустриаль парклар район эшмәкәрләренә якыная

Татарстанда кече һәм урта эшмәкәрлекне үстерүнең яңа юлларын эзләү дәвам итә. 20 август көнне моңа бәйле тагын бер яңалык билгеле булды - тиздән республика районнарында эшмәкәрләр өчен махсус индустриаль парклар төзи башларга мөмкиннәр.


Җитәкчеләр әлеге карарны юкка гына кабул итмәгән. Хәзерге вакытта үз эшеңне ачып, җитештерү өлкәсендә эш башлау өчен күп көч сарыф итәргә кирәк. Махсус бина табу, аны тиешенчә җиһазлау, эш урыннарын югары әзерлекле кадрлар белән тәэмин итү җиңел түгел. Эшмәкәрләрнең байтагын нәкъ менә әлеге проблемалар куркыта. Күбесе җитештерү эшчәнлеген яхшылап башлап та җибәрә алмыйча, оештыру эшчәнлегенең кайсыдыр этабында туктап калырга мәҗбүр.

Эшмәкәр үз бизнесы турында гына уйларга тиеш

Республиканың төрле шәһәр һәм районнарында махсус индустриаль парклар андый проблемаларны тулысынча юкка чыгарып, үз эшен яңа гына башлап җибәргән эшмәкәрләргә тулысынча үз бизнесы турында гына уйларга мөмкинлек бирәчәк.

«Татарстанның бизнес өлкәсе эшмәкәрлек белән шөгыльләнү өчен тулысынча әзер мәйданнар ясауның табышлырак булганын аңлый башлады. Әгәр дә без республиканың һәр муниципаль берәмлегендә шундый индустриаль парклар булдырсак, кече һәм урта эшмәкәрләр тулысынча әзер, заманча җиһазлар белән тулыландырылган махсус бинага килеп утырачак. Аларга дәүләт белән мөнәсәбәтләрне җайларга, махсус килешүләр төзергә туры килмәячәк», - дип сөйләде «ТАТМЕДИА» матбугат һәм массакүләм коммуникацияләр агентлыгында узган чарада Татарстанның икътисад министры урынбасары, эшмәкәрлеккә ярдәм Департаменты җитәкчесе Рөстәм Сибгатуллин.

Җитештерү өчен шартлар булмау бизнес үсешен тоткарлый

Эшмәкәрлек белән шөгыльләнә башлау өчен, беренче чиратта, бина кирәк. Продукцияңнең сыйфаты көндәшлеккә сәләтле булуын теләсәң, җиһазларның заманча булуы мөһим. Кызганычка каршы, Татарстанда гына түгел, хәтта Россиядә дә бизнес белән шөгыльләнү өчен уңайлы биналар бармак белән генә санарлык. Булганнарын да яңартырга, үзгәртеп корырга кирәк. Шуңа күрә төрле тармак эшмәкәрләрен берләштерә торган махсус сәнәгать парклары булдыру республикада кече һәм урта эшмәкәрлекне үстерүгә зур өлеш кертәчәк, дип саный Татарстанда эшмәкәрлеккә ярдәм итү үзәге директоры Артем Наумов.

«Танышларым арасында бизнеслары уңышлы барган эшкуарлар бихисап. Беренче карашка барысы да яхшы кебек. Тик чынлыкта исә продукциягә ихтыяҗ зур, ә тагын да күбрәк җитештерү өчен шартлар җитми. Нәтиҗәдә, бизнес үсеше тоткарлана», - дип аңлатты ул журналистларга.

Хәзерге вакытта Татарстанда эшмәкәрлеккә ярдәм итү максатыннан дәүләт технопарк һәм технополислары, шәхси индустриаль парклар эшли. Районнарда шундый парклар төзү эшен 2014 елда башлап җибәрергә планлаштыралар. Бүгенгә әлеге төр җитештерү мәйданчыклары булдыралачак 14 район билгеләнгән инде. Якын киләчәктә исә андый районнар саны 34кә җитәр, дип уйланыла.