Татарстан экспортерларын дустанә илләр базарларын яуларга өйрәтәчәкләр
Эшкуар йортында Татарстан Республикасының кече һәм урта бизнес компанияләре вәкилләре өчен белем бирү программасы башланып китте. Россия экспорт үзәгенең Экспорт мәктәбе тарафыннан эшләнгән лекцияләр курсы төбәктә ТР Икътисад министрлыгы ярдәме белән үткәрелә.
Укыту программасы Татарстан экспортерларында яңа экспорт базарларын нәтиҗәле үзләштерү өчен белем, компетенцияләр һәм гамәли инструментлар комплексын формалаштыруга юнәлдерелгән. Татарстан 2022 елда бу программаны пилот режимында гамәлгә кертүче 15 Россия төбәгенең берсе булды. Көндезге һәм дистанцион форматта 7 кече һәм урта бизнес компаниясе белем алачак. Бу җылылык һәм тавыш үткәрми торган материаллар, нефть һәм газ скважиналары өчен җиһазлар, азык-төлек, төрү җиһазлары җитештерү һәм сату, орлык һәм электр товарлары сәүдәсе.
«Кече һәм урта эшкуарлык субъектлары өчен экспорт стандарты» программасы тәҗрибәле экспортерларга экспорт эшчәнлегеннән керемнәр күләмен арттыру һәм экспорт базарларында позицияләрне ныгыту юлларын билгеләү буенча бизнес-план әзерләргә мөмкинлек бирә торган компанияләр экспортының үсеш драйверы булырга тиеш.
Программа ике ай дәвамында үткәрелә торган биш модульдән тора. Укулар кысаларында катнашучылар предприятиенең экспортны үстерүгә, бизнес-разведка үткәрүгә әзерлеген анализлау өлкәсендә белемнәрен камилләштерәләр, чит ил клиентлары өчен кыйммәтле тәкъдимнәр булдыру инструментларын өйрәнәләр, балансланган күрсәткечләр системасын җентекләп тикшерәләр, экспортны тарату стратегиясен билгелиләр, предприятиенең бизнес-процессларының нәтиҗәлелеген бәялиләр.
Беренче модуль буенча укуларны Россия экспорт үзәге Экспорт мәктәбенең экспорт семинарлары программалары буенча федераль тренер-остазы Алена Федоткина үткәрә.
Агымдагы елда тулаем Россия буенча, вәзгыятьне исәпкә алып, яңа базарларга юнәлеш алына, алар арасында Якын Көнчыгыш Һәм Көньяк-Көнчыгыш Азия илләре дә бар. Татарстан эшкуарлары элек тә Якын Көнчыгышта партнерлар белән эшләгәннәр, Якын Көнчыгыш базарларының үзенчәлекләрен яхшы беләләр, «хәләл» продукциясен сертификацияләү тәҗрибәсе бар һәм сөйләшүләр алып бару үзенчәлеген аңлыйлар. Татарстан бизнесында шулай ук продукцияне таныту өчен гаять зур базар тәкъдим итүче Кытай юнәлеше зур кызыксыну уята.
Курслар «Кече һәм урта эшкуарлык һәм шәхси эшкуарлык инициативасына ярдәм» илкүләм проекты ярдәмендә бушлай үткәрелә.