Бүген республикада шәхси эшмәкәрләр саны 98 мең тирәсе калган

Узган ел Татарстанда 111 мең шәхси эшмәкәр исәпләнсә, бүгенгә аларның саны 98 мең тирәсе калган. Эшмәкәрләр санының кимүенә китергән төп сәбәпләрнең берсе дип бүген Хөкүмәт йортында узган брифингта икътисад министры Мидхәт Шаһиәхмәтов ел башыннан илдә иминият кертемнәре ставкасының күтәрелүен атады. Әлеге проблема министрлыкның республика шәһәр-районнарына чыгып эшмәкәрләр белән оештырган очрашуларында да күтәрелгән.
Министр ассызыклаганча, проблеманың никадәр актуаль булуын аңлап, Татарстан иминият кертемнәре ставкасын төшерү турында закон чыгару инициативасы белән беренчеләрдән булып федераль органнарга мөрәҗәгать иткән. Әлеге инициатива федераль дәрәҗәдә хуплау тапкан. Бүген моңа кагылышлы закон проекты РФ Дәүләт Думасында карала.
Муниципалитетларда Икътисад министрлыгы оештырган очрашуларда эшмәкәрләрдә борчу тудыручы башка проблемалар да аталган. Алар – финанс ресурсларының җитмәве, тарифларның күтәрелүе, квалификацияле кадрлар кытлыгы, эшмәкәрләр җитештергән продукцияне сатудагы кыенлыклар, аренда түләүләренең күтәрелүе, дәүләт ярдәме чаралары хакында эшмәкәрләрнең аз мәгълүматлы булуы һ.б. “Әлеге проблемалы мәсьәләләрнең чишелеше ТР Икътисад министрлыгы тарафыннан быел кече һәм урта эшмәкәрлеккә ярдәм программасын формалаштырганда нигезгә алынды”, - дип ассызыклады Мидхәт Шаһиәхмәтов. Ул шулай ук узган еллар тәҗрибәсе анализланып, республиканың стратегик үсеш юнәлешләре белән бәйле өстенлекле бурычлар билгеләнүен искәртте.
Аның сүзләренә караганда, өстенлекле бурычларда эшмәкәрләргә дәүләт ярдәменә мөһим урын бирелә. Министр ышандыруынча, быел да узган еллардагы кебек эшмәкәрләргә финанс чаралары җитмәү проблемасын чишүдә “Лизинг-грант”, шулай ук инновацияләрне кулланылышка кертүгә ярдәм программалары булышлык итәргә тиеш.
Тарифлар үсешенә бәйле рәвештә, эшмәкәрләрнең электр һәм җылылык челтәрләренә ялгану чыгымнарын өлешчә компенсацияләү дә быел өстенлекле бурыч булып кала. Тышкы сату базарына чыгучы эшмәкәрләргә, предприятиеләргә мәгълүмати, консультатив ярдәм бирү дә өстәлә.
Мидхәт Шаһиәхмәтов сүзләренә караганда, белем бирү программаларын гамәлгә ашыру чыгымнарын субсидияләү чарасы исә кече һәм урта бизнес өчен квалификацияле кадрлар әзерләүгә ярдәм буларак карала.
Министр быел эшмәкәрләрдән ярдәм чаралары буенча конкурсларга заявкалар алуның бердәм регламенты эшләнүен, аның заявкалар бирү тәртибен гадиләштерүен ассызыклады. Гамәлдәге ярдәм программаларын эшмәкәрләр белеп бетерми. Шуны күздә тотып, 2013 ел башында республикада Эшмәкәрлеккә ярдәм үзәге төзелгән иде. Бүген аның 8 муниципаль берәмлектә вәкиллекләре эшли. Әлеге үзәк эшмәкәрлек субъектларына маркетинг, юридик, консультатив, мәгълүмати ярдәм күрсәтәчәк, персонал туплап, аны укытуда, инновацияле товарларны сертификатлаштыру хезмәтләре күрсәтәчәк, кече һәм урта эшмәкәрлек үсешенә кагылышлы форум-семинарлар оештырачак. Ул эшмәкәрләрдән конкурска заявкалар кабул итү белән дә шөгыльләнә. Министр эшмәкәрләрне ярдәм программаларында актив катнашырга чакыра.
ТР икътисад министры ассызыклавынча, республикада кече һәм урта эшмәкәрлек үсешенә бүген муниципалитетларда төзелүче сәнәгать мәйданнары да этәргеч бирергә тиеш. Алар Татарстанда кече һәм урта бизнесны үзенә тартучы үсеш нокталары буларак уйланылган, мондый сәнәгать үзәкләрен барлык муниципаль районнарда булдыру бурычы куелган.