Россиянең Бөтендөнья сәүдә оешмасына керүе нәтиҗәсендә Татарстан автосәнәгате һәм нефть химиясе риск зонасына эләгергә мөмкин

Бу хакта бүген ТР Дәүләт Советы утырышында республика икътисад министры Мидхәт Шаһиәхмәтов белдерде. Бүген ТР икътисад министры Мидхәт Шаһиәхмәтов Татарстан Дәүләт Советы утырышында хөкүмәт сәгате кысаларында, ТР Министрлар Кабинетының Бөтендөнья сәүдә оешмасы кагыйдәләре шартларында республиканың ныклы инновацион үсешен тәэмин итү буенча чаралары турында сөйләде.
Министр сүзләренә караганда, Россиянең шулай ук Татарстанның дөнья икътисадына интеграция процессы дәвам итә, бу халыкара партнерлар белән элемтәләрне җайга салуда һәм тышкы сәүдә әйләнешен үстерүдә чагыла. Мисал өчен, 2000 елдан 2012 елга кадәр Татарстан экспорты күләме 7 тапкырдан да артты.
Кагыйдәләр буенча күчеш чорында, ягъни 2019 елга кадәр таможня пошлиналары төшәчәк, бу Татарстан өчен өстенлекле булган сәнәгать, автосәнәгать һәм нефть химиясе секторларын риск зонасына кертергә мөмкин. Бу вакыт эчендә предприятие үз производствосын ВТО таләпләренә адаптацияләр, продукциянең көндәшлелеккә сәләтлелеген күтәрер дип көтелә. Күчеш чорында пошлинаны төшерүнең Россия тауар җитештерүчеләренә йогынтысы анализлана. Чит ил җитештерүчеләре ягыннан намуссыз көндәшлек фактлары ачыклаган очракта ВТО кысаларында саклану чараларын куллану максатыннан тикшерү үткәреләчәк.
Предприятиеләргә яңа шартларда эшчәнлек алып барырга ярдәм итү өчен ТР да ведомствоара эшче төркем оештырылган, анда министрлыклар һәм ведомстволар җитәкчеләреннән тыш Эшмәкәрләр ассоциациясе, Сәүдә-сәнәгать палатасы, Татарстан таможнясы һәм фәнни бергәлек вәкилләре керә. Аның тарафыннан эшмәкәрләр өчен РФ Икътисад үсеше министрлыгының әйдәп баручы экспертларын чакырып семинарлар һәм конференцияләр үткәрелгән. Эшче төркем федераль дәрәҗәдә норматив базасын камилләштерү буенча тәкъдимнәр булдырган.