Мидхәт Шаһиәхмәтов: предприятиеләргә һәм бизнеска бүгенге икътисадый шартларда үз эшчәнлеген активлаштырырга кирәк
Икътисад министры Мидхәт Шаһиәхмәтов җитәкчелегендә Республика икътисадының тотрыклы үсешен тәэмин итү буенча эшче төркем вәкилләре бизнеска һәм халыкка ярдәм итү чараларының яңа пакеты, шулай ук муниципалитетлар тарафыннан урыннарда эшкуарлык җәмәгатьчелеге белән актив эш алып барырга кирәклеге турында фикер алышты. Киңәшмә видео-конференциянең гадәти форматында узды.
Икътисад министры билгеләп үткәнчә, республиканың күпчелек предприятиеләре һәм оешмалары эшкә керешкән инде. Шул ук вакытта барлык эпидемиологик нормаларны һәм таләпләрне катгый тәэмин итү мәҗбүри шарт булып тора. Предприятиеләргә һәм бизнеска килеп туган икътисадый шартларда үз эшчәнлеген активлаштырырга, ә районнар вәкилләренә эшкуарларга эшне яңадан торгызуда ярдәм итәргә кирәк.
Турыдан-туры көн тәртибенә күчкәнче, Мидхәт Шаһиәхмәтов санитар-эпидемиологик хәл турында киңәшмә кысаларында РФ Президенты Владимир Путин тарафыннан җиткерелгән икътисадка ярдәм итүнең яңа чаралары турында әйтеп узды. Министр, федераль дәрәҗәдә кабул иткәннән соң, Татарстан районнарында яңа чараларны оператив рәвештә гамәлгә кертү, шулай ук ярдәм итүнең гамәлдәге механизмнарын алу буенча эшкуарлар белән эшне активлаштыру кирәклеген ассызыклады.
«Безнең бурыч – бу чараларга дәгъва белдерү хокукына ия республика предприятиеләре һәм компанияләренең максималь рәвештә алардан файдалана алуын тәэмин итү. Шуның белән бергә, хәзерге вакытта Татарстан оешмаларының гамәлгә ашырыла торган ярдәм программаларына җәлеп ителү дәрәҗәсенең түбән булуы күзәтелә. Беренче чиратта, бу аларның кризиска каршы программалар турында җитәрлек дәрәҗәдә хәбәрдар булмавыннан килә. Шуңа бәйле рәвештә, муниципалитетлардан урыннарда бизнес белән актив эш алып баруларын, предприятиеләргә инде гамәлгә ашырыла торган һәм яңа чаралар турында үз вакытында хәбәр итүләрен, ярдәм алуның барлык этапларында ярдәм итүләре турында сорыйм», – дип ассызыклады Мидхәт Шаһиәхмәтов.
Эшче төркем әгъзалары белән шулай ук эчке ихтыяҗны стимуллаштыру, кооперация эчендәге элемтәләрне торгызу һәм импортны алыштыру кысаларында товарларның яңа төрләре исемлеген формалаштыру мәсьәләләре буенча да фикер алыштылар. Моның өчен Татарстанда Дәүләт заказы агентлыгы базасында Республика маркетинг үзәге эшли. Үзәк Татарстан җитештерүчеләре белән тәэмин итүчеләр арасында хезмәттәшлекне активлаштырырга һәм аларны республика эчендә заказлар белән тәэмин итәргә мөмкинлек бирә.
Үзәк бер ел элек Татарстанда җитештерелә торган продукцияне алга этәрү системасын оештыру проектының бер өлеше буларак эшли башлаган иде. Бу бурычны Президент Рөстәм Миңнеханов билгеләде. Килеп туган икътисадый вәзгыятькә бәйле рәвештә глобаль һәм аеруча перспективалы бурыч ул. Концепция нигезендә, Татарстанда җирле җитештерүчеләрне бүгенге көнгә кадәр республикадан читтә продукция җитештерүче инвестиция урыннарына яки секторларга күчерү мөмкинлеге булдырылырга тиеш. Бу максатлар өчен бүген яңа компанияләр булдырыла яки гамәлдәге производстволар үзгәртеп корыла.
Бер ел эчендә мәйданчыкта 3 меңгә якын товар белән тәэмин итүче предприятие теркәлгән, аларның Агрегаттагы алыш-бирешләрдән кергән табышы 28 млрд.сумнан артык тәшкил иткән.