Татарстан Икътисад министрлыгы кече һәм урта эшкуарлык субъектлары өчен ташламалы ярдәм чаралары эшләде
Республика территориясендә гамәлгә ашырыла торган федераль чаралар белән беррәттән, Татарстан Икътисад министрлыгы тарафыннан элек федераль һәм республика чаралары белән тәэмин ителмәгән һәм аеруча зыян күргән тармаклар исемлегенә кермәгән КУЭ субъектлары өчен ташламалы ярдәм механизмнары эшләнде. Ярдәм, беренче чиратта, икътисадның реаль секторында эшли торган эшкуарларга кагыла һәм 27 нче апрельдән гамәлгә ашырыла башлаячак.
Татарстан Республикасы Икътисад министрлыгы тарафыннан, үзенә караган структуралар белән берлектә, эшләнгән финанс чараларын гамәлгә ашыру өчен федераль һәм республика бюджетларыннан 1,3 млрд.сум тирәсе акча бүлеп бирү планлаштырыла.
Эшкуарлыкка ярдәм итү фонды республиканың кече һәм урта эшкуарлык субъектларына микрозайм рәвешендә финанс ярдәме күрсәтәчәк. Займ суммасы 2 елга кадәр 100 мең сумнан 2 млн сумга кадәр тәшкил итәчәк. Ташламалы ставкасы беренче 6 ай гамәлдә булачак, аннан соң ставка, алдагы икътисадый вәзгыятькә карап, арттырылачак. 2020 елның мартына карата халыкның кимендә 90%ын эш белән тәэмин итүкән эшкуарлар өчен калган чорга процент ставкасы – РФ Үзәк банкы билгеләгән төп ставканың яртысын, башка очракларда – килешү төзү датасына РФ Үзәк банкы билгеләгән төп ставка күләмендә калачак. Кредит бирү механизмы, шулай ук, кредит буенча төп бурычны 6 айга кадәр кичектереп түләү мөмкинлеген дә күздә тота. Микрозайм бирүнең төп таләбе: 2019 елның уртача айлык кеременә карата керем алу дәрәҗәсенең 30%ка кимүе.
Эшкуарларның куркынычсызлыгы һәм яңа коронавирус йогышы таралуга юл куймау өчен, ТР Икътисад министрлыгы тарафыннан эшләнгән «ФАСТРЕК» порталы ярдәмендә финанс ярдәме чараларыннан файдалану мөмкинлеге гадиләштерелде. Портал аша, 27 нче апрельдән башлап, 1 процентлы ташламалы микрозайм алу өчен гариза рәсмиләштерергә мөмкин. Барлык ярдәм чаралары буенча консультацияләр алу өчен эшкуарлар 8(843)524-90-90 телефоны буенча мөрәҗәгать итә ала.
Татарстан Республикасы Гарантия фонды заем акчаларын җәлеп итү өчен поручительләре булмаган кече һәм урта эшкуарлык субъектларына ярдәм итәчәк. Чаралар пакетында каралган поручительлек суммасы 30 млн. сумга кадәр, шул ук вакытта аның өлеше финанслау суммасының 50 процентыннан артмаска тиеш. Поручительлектән файдалануның беренче 6 ай өчен комиссиягә түләү кичектереләчәк. Шулай ук Гарантия фонды кече һәм урта бизнес өчен поручительстволар портфелен реструктурлаштыра.
Үз чиратында, республиканың Гарфонды базасында төзелгән Бердәм кредит бирү үзәге заем финанславын җәлеп итүдә ярдәм итәчәк. Үзәк хезмәтләреннән бушлай файдаланырга була.
Кече һәм урта эшкуарлыкка ярдәм итү һәм аны үстерү программаларын гамәлгә ашыру үзәге тарафыннан КУЭ субъектларының гамәлдәге кредитлары буенча РФ Үзәк банкы билгеләгән төп ставка күләмендә процент ставкасын субсидияләү планлаштырыла. Программа эшкуарларны 2020 елның 1 нче апреленнән 30 нчы сентябренә кадәр чорда түләнгән кредитлар буенча процент йөкләмәләреннән азат итүгә юнәлдерелгән. Бер кешегә субсидиянең иң чик күләме 1,5 млн.сум тәшкил итәчәк.
Үзәк шулай ук азык-төлек һәм эчемлекләр тәкъдим итү сегментында эшләүче эшкуарларның аш-су китерү буенча сервисларга түләү чыгымнарын да субсидияләүне планлаштыра, чикләү чаралары сакланган очракта, программа дәвам иттереләчәк. Бу чара әлеге сегментта эшкә сәләтлелекне һәм мәшгульлекне саклауга, әзер ризыкларны, ярымфабрикатларны һәм азык-төлек продуктларын бизнес өчен минималь чыгымнар белән китереп бирүне оештыруга юнәлдерелгән.