18 яшьтән кечерәк россиялеләр арасында эшкуарлыкны үстерү проектларын эшләтеп җибәрү өчен Татарстан сынау төбәге булды
Яңа проектларны алга җибәрү буенча Стратегик инициативалар агентлыгы (СИА), РФнең башка 14 субъекты белән беррәттән, Татарстан Республикасын 18 яшькә кадәрге россиялеләрнең эшкуарлык эшчәнлеге өчен шартлар тудыру буенча тәкъдимнәр әзерләү өчен сынау төбәге итеп сайланган. Яшь татарстанлыларга инвесторлар һәм партнерлар белән эшләү аша аларның бизнес-идеяләрен гамәлгә ашыруда, шулай ук югары технологияле эшләнмәләр өлкәсендә һәм грантлар алуда патентлар рәсмиләштерүдә ярдәм күрсәтеләчәк. Әлеге юнәлештә ярдәм чараларын эшләү җирле хакимият тарафыннан яшь эшкуарлар белән тыгыз элемтәдә алып барылыр дип планлаштырыла.
«Татарстан сынау төбәкләренең берсе буларак очраклы сайланмаган. Эшкуарлык секторы илнең алга таба социаль-икътисадый үсешендә мөһим роль уйный, инде хәзердән үк яшь буын шул юнәлештә йөз тотарга тиеш. Моның өчен Татарстанда бүген республика яшьләрендә эшкуарлык потенциалын ачарга ярдәм итә торган шактый күп чаралар уза. Ел саен мәктәп хәйрия ярминкәсе үткәрелә, анда булачак бизнесменнар үз проектларын күрсәтеп кенә калмыйча, үз продукциясен дә сата ала, ә җыелган акчаның бер өлеше хәйриячелеккә җибәрелергә мөмкин. Моннан тыш, 14 яшьтән башлап, яшь эшкуарлар үзмәшгуль буларак теркәлә ала, бу аларга потенциаль клиентлар даирәсен киңәйтеп, рәсми рәвештә үз эшен алып барырга мөмкинлек бирә», - дип билгеләп үтте ТР икътисад министры Фәрит Габделганиев.
Искәртеп үтик, Татарстанда инде берничә ел дәвамында үсмерләр арасында финанс белемен, лидерлык һәм эшлекле компетенцияләр үстерүгә юнәлтелгән төрле чаралар үткәрелә. Алар исәбендә «Эшкуарлык фабрикасы» проектының «Фабрика-Балалар» курсы һәм «Мәктәп бизнес-компанияләре» программасы. 2019 елда республикада шулай ук «RUKAMI» идеяләр һәм технологияләр фестивале, «АгроНТИ-2019» Бөтенроссия авыл укучылары конкурсы кебек инновацияле иҗат һәм эшкуарлыкны якынайтуга ярдәм итүче зур вакыйгалар узды.
СИА сынау проекты контекстында, аерым алганда, бизнес алып баруның гамәли тәҗрибәсе булган остазларны һөнәри юнәлеш бирү һәм җәмгыять белеме буенча дәресләр уздыруга җәлеп итү планлаштырыла; мәктәп укучыларында һәм студентларда эшлекле сөйләшүләр алып бару күнекмәләрен формалаштыру; резидентларны остазлыкка җәлеп итү һәм яшь кеше идеяләрен бизнеска кертү максатында эшкуарлыкка ярдәм итүнең төбәк мәйданчыклары белән эшләү планлаштырыла.