20 ноябрьдә стратегия һәм бизнес белән идарә буенча Татарстан чемпионаты старт алачак

Бүген Татарстан Республикасы Икътисад министрлыгында чемпионатны үткәрү буенча Оештыру комитеты белән команда әгъзаләре очрашуы узды. Очрашуда алдагы чемпионат турында фикер алыштылар.

Чемпионат яшь менеджерларга үзләрендәге идарә итү талантын ачарга, тагын да тәҗрибәлерәк идарәчеләр командалары белән ярышырга ярдәм итә, аларга карьера баскычында күтәрелү өчен этәргеч бирә. Ә компанияләр җитәкчеләренә бу чемпионат үз хезмәткәрләренең потенциалын ачарга һәм оешманың кадрлар резервын формалаштырырга мөмкинлек бирәчәк.

Чемпионатта катнашу бушлай. Бары тик 19 ноябрьгә кадәр команданы җыеп www.16.globalmanager.ru сайтында теркәлергә генә кирәк.

Чемпионат барышында бишәр кешедән торган командалар бер үк старт күрсәткечләре булган төрле виртуаль компанияләр белән идарә итүгә алыначак, бер-берсе белән ярышып, алар идарә чишелешләре комплексын һәм стратегия әзерләячәк. Катнашучылар алдында торган төп бурыч – һәр атнада маркетинг, җитештерү, кадрлар, финанс, логистика өлкәләренә кагылышлы 60тан артык стратегик карар кабул итү, имитацияле фонд биржасында үз компанияләре акцияләренең югары бәясен тәэмин итү.
Татарстан чемпионатының беренче этабы 20 ноябрьдән декабрь азагына кадәр Интернет аша онлайн-режимда узачак. Шул рәвешле, чемпионатта катнашучылар төп эшләреннән аерылмыйча гына ярыша ала. Чемпионатның финал этабы киләсе елның февралендә Казанда узачак. Аның барышында беренче этапта җиңгән 16 команда арасыннан Татарстан чемпионы билгеләнәчәк.

Җиңүче команда стратегия һәм бизнес белән идарә буенча Бөтенроссия чемпионатының финал этабында республика данын яклаячак. Ул киләсе елның мартында Мәскәүдә узачак. Чемпионатның халыкара финалын апрель аенда Бухарест (Румыния) кабул итә. Мәгълүм булганча, Global Management Challenge (GMC) менеджмент буенча дөньядагы эре белем бирү чемпионатларының берсе санала.