Россия һәм Чехия фәнни-техник хезмәттәшлек һәм чит ил җитештерү объектларын Татарстанда урнаштыру мөмкинлекләре турында фикер алыштылар
Татарстан делегациясе сәнәгать өлкәсендә хезмәттәшлек итү һәм ике ил арасында икътисадый, сәнәгать һәм фәнни-техник хезмәттәшлек буенча хөкүмәтара комиссияне локальләштерү буенча Россия-Чехия эш төркеменең XII утырышында катнашты. Очрашу Казанда Россия Федерациясе Сәнәгать һәм сәүдә министры киңәшчесе Виктор Семенов һәм Чехия Сәнәгать һәм Сәүдә министрлыгының сектор экспертизасы һәм Сәнәгать сәясәте департаменты эксперты Анна Никодимова рәислегендә узды.
Татарстан Чехия белән фәнни-техник һәм инвестицион хезмәттәшлек өлкәсендә Россиянең иң актив субъектларыннан берсе булып тора. Диалогны үстерү өчен төп юнәлешләр булып Чехия базарына «КАМАЗ» автомобильләрен экспортлау, «Алабуга» МИЗы һәм «Иннополис» МИЗы тибындагы инвестицион мәйданчыкларга потенциаль резидентларны җәлеп итү тора. Моннан тыш, станоклар төзү һәм авиация мотор төзелеше, энергетика һәм югары технологияле медицина җиһазлары белән тәэмин итү, сәнәгать һәм юл төзелеше, энергия саклау һәм биотехнологияләр, автокомпонентлар эшләү, шулай ук туристлык бизнесын һәм курорт дәвалавын үстерү өлкәсендә уртак проектлар гамәлгә ашырыла.
Утырыш кысаларында сәнәгать өлкәсендә хезмәттәшлек итү мәсьәләләре һәм Чехия ширкәтләренең кайбер җитештерү объектларын Россия территориясендә, аерым алганда, Татарстан Республикасында локальләштерү перспективалары турында фикер алыштылар. «Эйдос-Робототехника» һәм «Европласт Казан заводы» ширкәтләре Чехия партнерлары белән үзләре җитештергән сәнәгать роботларын китереп тору кысаларында хезмәттәшлек итү мөмкинлекләре турында фикер алыштылар. Казанның «УЗГА» АҖ вәкиле Л610 самолетларының уртак җитештерү проектын гамәлгә ашыруның барышы турында сөйләде. Бүген «Алабуга» МИЗы резиденты булган «Югострой» Чехия ширкәте гидравлик насослар җитештерү өчен Россия субподрядчылары эзләү белән кызыксынуын белдерде.
Татарстан белән Чехия арасында товар әйләнеше ел саен арта бара. Әйтик, 2018 елда аның күләме 632 млн АКШ доллары тәшкил иткән, узган елга карата үсеш 41% ка арткан. Чехиягә Татарстан экспорт структурасының зур өлешен минераль ягулык, нефть һәм аларны куу продуктлары, каучук, резина, әзер әйберләр тәшкил итә. Республика Чехиядән төрле электр җиһазларын, җир өсте транспорты чараларын, казаннарны, механик җайланмаларны импортлый. Гомумән Россия белән Чехия арасында товар әйләнеше 2018 ел нәтиҗәләре буенча алдагы күрсәткечләргә карата 17,41% ка артты һәм 8,7 млрд АКШ доллары тәшкил итте.