РФ Икътисадый үсеш министры Максим Орешкин "Биосфера-Фиш" уникаль балык үрчетү комплексында булып кайтты
Россия Икътисадый үсеш министры Максим Орешкин һәм Татарстан Республикасы Президенты Рөстәм Миңнеханов бүген Лаеш муниципаль районының «Кышкы горка» поселогындагы «Биосфера-Фиш» балык үрчетү комплексында булып кайттылар.
Проект Татарстанда 2017 елның августыннан «балык хуҗалыгы комплексын үстерү» федераль программасы кысаларында гамәлгә ашырыла, ул илнең балык ресурсларын саклауга юнәлдерелгән.⠀
Хәзерге вакытта проектның икенче чиратындагы җиһазларын монтажлау эшләре бара.
"2018 елның декабрендә «Биосфера-Фиш» ҖЧҖенә «Татарстан Республикасы Төбәк лизинг компаниясеннән» еллык 6 процент белән 192,7 млн сум күләмендә ташламалы лизинг финанслау башлатылды», - дип әйтеп узды Татарстан икътисад министры Фәрит Габделганиев. - Бу акчага «Гипрорыбхоз» АҖ җитештергән балык үрчетү хуҗалыгы өчен ябык су белән тәэмин итүче 14 җайланма сатып алына. Җиһазлар өлешләп кертелә һәм урнаштырыла, финанслау траншлар белән уза».
Комплекс 5 млн чөгә балыгы, 1 млн форель маймычы һәм 50 тонна осетрин алу өчен проектланган.
2019 елның мартында «Биосфера-Фиш» ҖЧҖ шулай ук Россия Федерациясе Икътисадый үсеш министрлыгы линиясе буенча еллык 5 елга 6,5% белән 200 млн.сум күләмендә ташламалы финанслау алды («Программа 1706»).
Проектның төбәктә аналогы юк. Җитештерү Татарстан базарын җирле җитештерүдәге сыйфатлы балык продукциясе белән тәэмин итеп кенә калмыйча, Идел-Кама төбәгендәге су объектларының биоресурсларын да тулыландырачак.