Татарстан тулаем төбәк продукты күләме буенча позицияләрен саклый. Росстат 2017 ел өчен Россия субъектларының тулаем төбәк продукты турында мәгълүмат бастырды
Татарстан 2017 ел нәтиҗәләре буенча Россия Федерациясе субъектлары арасында тулаем төбәк продукты күләме буенча 7 урынны саклап калды. Аеруча зур күләм Мәскәүдә, Төмән өлкәсендә, Санкт-Петербургта, Мәскәү өлкәсендә, Краснодар краенда һәм Свердловск өлкәсендә теркәлгән. Россия Федерациясе субъектлары буенча тулаем төбәк продукты суммасында Татарстан Республикасы тулаем төбәк продукты өлеше 2,8% тәшкил итте.
Әлеге күрсәткеч буенча Татарстан Идел буе федераль округы субъектлары арасында лидерлык баскычын били. 2017 ел нәтиҗәләре буенча тулаем төбәк продукты күләме 2 114,18 млрд сум тәшкил итте. Икътисад структурасында аеруча зур чагыштырма авырлык түбәндәгеләрдән гыйбарәт: сәнәгать – 45,0%, сәүдә- 12,5%, төзелеш - 9,3%, авыл хуҗалыгы - 7,1%.
ТР Икътисад министрлыгы матбугат хезмәте