НИОКР катнашучы предприятиеләр салым ташламалары алачак
Дәүләт Думасы өченче укылышта фәнни-тикшеренү һәм сынау-конструкторлык эшләрендә (НИОКР) катнашучы предприятиеләр һәм оешмалар өчен табышка салым түләүләрен азайта торган закон проектын кабул итте.
Закон табышка салым буенча салым базасын билгеләгәндә исәпкә алынмый торган керемнәрнең, мөлкәткә һәм мөлкәти хокукларга үткәрелгән инвентарьлаштыру барышында ачыкланган акыл эшчәнлеге нәтиҗәләренә мөлкәт хокуклары рәвешендәге керемнәрнең исемлеген тулыландыра. Бу норма 2017 елның 1 гыйнварыннан башлап ачыкланган мөлкәт хокукларына карата кулланылачак.
Шулай ук НИОКР башкаруда катнашучы хезмәткәрләрнең хезмәте өчен түләү чыгымнарының исемлеге дә киңәйтелә. Чыгымнарга стимуллаштыру холкындагы түләүләр, асылда, җитештерү нәтиҗәләре өчен премияләр, һөнәри осталык һәм башка шуңа охшаш күрсәткечләр өчен тариф ставкаларына һәм окладларга өстәмә түләүләр, шулай ук иминият кертемнәренә чыгымнар керәчәк. Табышка салым максатында 1.5 коэффициенты кулланыла торган чыгымнарга акыл эшчәнлеге нәтиҗәләренә хокук сатып алуга киткән чыгымнарны да кертү күздә тотыла, ләкин алар НИОКР файдасына кулланылганда гына.
Моннан тыш, закон проекты салым администрациясен гадиләштерә торган нормаларны да кертә. Документ буенча, салым түләүче, әгәр дә хисап бердәм дәүләт мәгълүмат системасында урнаштырылган булса, башкарылган НИОКР (эшләрнең аерым этаплары) турында хисапны салым органына тапшырмаска хокуклы.