Казанда «Россия регионнарының интеллектуаль мөлкәте һәм икътисады» II Халыкара форумы старт алды
2017 елның 8 февралендә Казан шәһәренең «Югары технологияләр өлкәсендә «ИТ-парк технопаркы» ГАУ мәйданчыгында Татарстан Республикасы Дәүләт Советы Рәисе Фәрит Мөхәммәтшин «Россия регионнарының интеллектуаль мөлкәте һәм икътисады» II Халыкара форумын ачты.
Форум чаралары Татарстан Республикасы Хөкүмәте, Интеллектуаль мөлкәт буенча Федераль хезмәт (Роспатент), Сәнәгать мөлкәтенең Федераль институты (ФИПС) һәм Интеллектуаль мөлкәтнең Бөтендөнья оешмасы (ВОИС) ярдәмендә оештырылды.
Форумда Россия Федерациясе Федераль Җыенының Федераль Советы Рәисе, Россия Федерациясенең Федераль Җыены Федерациясе каршындагы интеллектуаль мөлкәт мәсьәләләре буенча Совет Рәисе Ильяс Умаханов, Роспатент җитәкчесе Григорий Ивлиев, Татарстан Республикасы Дәүләт Советы Рәисе Фәрит Мөхәммәтшин, Татарстан Республикасы икътисад министры Артём Здунов һәм дәүләт власте федераль органнары җитәкчеләре, ВОИС, зур компанияләр, фәнни һәм мәгариф учреждениеләре вәкилләре, әйдәп баручы Россия һәм чит ил галимнәре катнашты.
Пленар утырыш, Россия Федерациясенең технологияләр һәм инновацияләрне яклау үзәгенең V Съезды һәм «Татарстан Республикасының интеллектуаль потенциалы» темасына күргәзмә экспозициясе форумның төп вакыйгалары булды.
Форумның пленар утырышын ачып, Фәрит Мөхәммәтшин инновацияләр инфраструктурасын үстерү, федераль рейтингларны алдынгы позицияләр белән тәэмин итү, федераль яклау программаларында катнашу буенча зур эш алып барылуын билгеләде. Татарстанда технологияләрне һәм инновацияләрне яклау үзәгенең зур челтәре гамәлдә һәм аның исәбенә техник белемнәргә һәм патент мәгълүматларына, инновацион яшьләр иҗаты үзәге челтәренә керү уңайлылана. Аларның эше талантлы яшьләр ачыклауга һәм аңарда эшмәкәрлек сыйфатларын үстерүгә юнәлтелгән. «Татарстанда без совет чорыннан ук килгән рационализаторлык һәм уйлап табучанлык рухын саклап калырга тырыштык», - диде ул.
«Потенциал бар һәм аны куллана белергә кирәк», — диде үзенең чыгышында Татарстанда теркәлгән уйлап чыгаруларны ассызыклап Роспатент җитәкчесе Григорий Ивлиев.
«Без инде берничә ел технологияләрне һәм инновацияләрне яклау үзәкләрен югарыга утыртмакчы булабыз, ә Татарстанда хәзер үк табигый үсеш бара. Бу атнада гына да без технологияләрне һәм инновацияләрне яклауның тагын ике үзәген теркәдек. Барлыгы 22 үзәк — бу илгә тәэсир итә торган технология үсеше нигезе», — диде Григорий Ивлиев.
2013 елның ноябрендә Казанда Беренче форум ачылу кысасында РФ Федерациясе Советы Рәисе Валентина Матвиенко инновацияләрне стимуллаштыруны һәм вакытында үзләштерүне мотивацияләүне киңәйтү, аларны коммерционализацияләгәндә дәүләт-шәхси партнерлык коралларын куллану кирәклегенә игътибар итте. Һәм бүген Фәрит Мөхәммәтшин билгеләгәнчә, уйлап чыгару эшчәнлегенең дәүләт һәм шәхси фонды балансын саклау һәм шулай ук юнәлтелгән бюджет акчасын максималь эффектив куллану мөһим.
Чара тәмамланганда Татарстан Республикасы Дәүләт Советы Рәисе Форум уздыру интеллектуаль мөлкәт һәм фәнни эшчәнлек темасын безнең республикада да, илдә дә популярлаштыруның мөһим звеносы булуын билгеләде.
Форум эше 10 февральгә кадәр дәвам итә.